ސްޓެލްކޯގެ ނެޓްވޯކު ސްމާޓު ގްރިޑަކުން ގުޅާލުމުގެ މަސައްކަތް ނިމުމާއި ވަރަށް ގާތްވެއްޖެ ކަމަށާ، އެ ކުންފުނިން މިހާރު މަސައްކަތް ކުރަމުންދަނީ އެ ކުންފުނިން ކަރަންޓުގެ ހިދުމަތް ދޭ ރަށްރަށުގައި ސްމާޓު މީޓަރު ހަރުކުރަން ކަމަށް ކުންފުނީގެ އެމްޑީ ހުސައިން ފަހުމީ ވިދާޅުވެއްޖެއެވެ.
ސްޓެލްކޯއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ސްޓެލްކޯގެ ޖެނެރަލް މެނޭޖަރު، ޓްރާންސްމިޝަން އެންޑް ޑިސްޓްރިބިއުޝަން އިބްރާހިމް ނާޝިދު ވަނީ، ސްޓެލްކޯގެ ސްމާޓް ގްރިޑްގެ މަޝްރޫޢު އާއެކު މާލެ އަދި ރަށްރަށުގައި ވެސް އޮފީހުގައި ތިބެގެން ޓްރާންސްފޯމަރުތަކުގެ ލޯޑު ބަލައި ޓްރާންސްފޯމަރު ނިއްވާ އަދި ޖެއްސޭނެ ނިޒާމެއް މިހާރު ގާއިމް ކުރެވިފައިވާކަން ފާހަގަކުރައްވާފައެވެ.
އަދި އެ މަސައްކަތް ނުނިމި ހުރީ ތިން ރަށެއްގައި ކަމަށާ، އަންނަ އަހަރުގެ ފުރަތަމަ ކުއާޓާ ނިމޭއިރު އެ ތިން ރަށުގައިވެސް އެ ޕްރޮޖެކްޓް ނިމޭނެ ކަމަށް ލަފާލުރެވޭއިރު، އެއާއެކު “އެކިއެކި ސަބަބު ތަކާއިހުރެ ކަރަންޓް ކެނޑުމުން އެ ދިމާވާ އުނދަގޫތައް ވަރަށް ބޮޑުތަނުން ހައްލުވެގެންދާނެ” ކަމަށް އޭނާ ވިދާޅުވިއެވެ.
މީގެ އިތުރުން، ސްމާޓް ގްރިޑްގެ މަސައްކަތް ނިމުމާއެކު ސްމާޓު މީޓަރު ހަރުކުރުމުގެ މަސައްކަތް ފައްޓަވާނެކަމަށް އެމްޑީ ފަހުމީ ވަނީ މިއަދު ވިދާޅުވެފައެވެ.
އަދި ސްމާޓް މީޓަރު ހަރުކުރުމުގެ ސަބަބުން ބިލަށް އަރާވަރު ކަސްޓަމަރުންނަށް ފޯނުން އެޕް މެދުވެރިކޮށް ބަލާލެވިގެންދާނެ ކަމަށާއި، ވަގުތުން ވަގުތަށް މީޓަރަށް އަރާ އަދަދު ފެނިގެންދާނެ ކަން އޭނާ ފާހަގަކުރެއްވިއެވެ.
“ސްމާޓް މީޓަރ ހަރުކުރުމުން، ކަސްޓަމަރުންނަށް ބަލާލެވޭނެ އެބޭފުޅުންގެ އޭސީ ކޮންޒަޕްޝަން. އޭސީ ނިއްވާލީމަ އެސީ ހިނގަނީ ކިހިނެއްތޯ އަދި އިތުރަށް އޭސީ ޖައްސާލީމަ ވާގޮތް ފެނިގެން ދާނެ.”
ހުސައިން ފަހުމީ
މިއާއެކު ފަހުމީ ވިދާޅުވީ އެކުންފުނީގެ އަމާޒަކީ ކުރިއަށް އޮތް 3 ވަރަކަށް އަހަރުގެ ތެރޭގައި ހުރިހާ މީޓަރުތައް ސްމާޓް މީޓަރުތަކަށް ބަދަލުކުރުން ކަމަށެވެ.
Advertisement
This content is created and paid for by advertisers and does not involve Voice Journalists
