ރާއްޖޭގައި ލޭނު މަސްވެރިކަން ކުރުމަށް މަސްވެރިކަމުގެ މިނިސްޓްރީން ރާވާފައިވާ ޕްލޭން އުވާލުމަށް ރައީސް މުޢިއްޒު ނިންމެވި ނިންމެވުމަށް، ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.

ނަޝީދު މިކަމާ ގުޅޭގޮތުން އެކްސްގައި ކުރެއްވި ޓްވީޓެއްގައި ވިދާޅުވެފައިވަނީ، ލޭނު މަސްވެރިކަމަށް ހުއްދަ ދިނުމުން ރާއްޖޭގެ ފަތުރުވެރިކަމުގެ ބްރޭންޑަށާއި، ދިވެހި މަސްވެރިކަމުގެ ދުނިޔޭގެ ނަމަށް ގެއްލުން ލިބޭނެ ކަމަށެވެ. އަދި މިއީ ރަނގަޅު ނިންމުމެއް ކަމަށްވެސް ނަޝީދު ވިދާޅުވެފައިވެއެވެ.

ރާއްޖޭގައި ލޭނު މަސްވެރިކަން ކުރުމަށް ހުއްދަ ދިނުމުގެ މައްސަލައަކީ ފަހަކަށް އައިސް ގިނަ ފަރާތްތަކުން ކަންބޮޑުވުން ފާޅުކުރަމުން އައި މައްސަލައެކެވެ. މިކަމުގެ ސަބަބުން ރާއްޖޭގެ ތިމާވެށްޓަށާއި މަސްވެރިކަމުގެ ދާއިރާއަށް ނޭދެވޭ އަސަރުތަކެއް ކުރާނެ ކަމަށް ގިނަ ފަރާތްތަކުން ވަނީ ބުނެފައެވެ.

ރައީސް މުޢިއްޒުގެ މި ނިންމެވުމަކީ ރާއްޖޭގެ މަސްވެރިކަމުގެ ދާއިރާއަށާއި، ތިމާވެށި ރައްކާތެރިކުރުމަށް އެޅުނު މުހިންމު ފިޔަވަޅެއްގެ ގޮތުގައި ގިނަ ފަރާތްތަކުން ދެކެމުންދާ ކަމެކެވެ.