ކުރީގެ ނައިބުރައީސް އަހުމަދު އަދީބު އާއެކު އޮތީ ކެބިނެޓް ވަޒީރަކަށް ވީތީ އޮތް ގުޅުމެއް އެކަނި ކަމަށާއި، އެމްއެމްޕީއާރުސީގެ ހިޔާނާތުގެ ފައިސާގައި ޖެހިވަޑައިގެންފައެއް ނޯންނާނޭކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

ސަންގް ޓީވީއަށް ދެއްވި ބަސްދީގަތުމެއްގައި ރައީސް ޑރ.މުއިއްޒު ވިދާޅުވީ، ކުރީގެ ނައިބުރައީސް އަހުމަދު އަދީބު އާ، އެމަނިކުފާނާ ހާއްސަ ގުޅުމެއް ނޯންނާނެ ކަމަށާއި އޮތަސް އޮންނާނީ ކެބިނެޓްގައި ހިމެނުނީތީވެ އެ އޮންނަ ގުޅުމެއް އެކަނި ކަމަށެވެ. މި ޕްރޮގްރާމްގައި ރައީސް ޑރ.މުއިއްޒު ވަނީ އެމްއެމްޕީއާރުސީގެ ހިޔާނާތުގެ ފައިސާގެ ތެރެއިން އަހުމަދު އަދީބު އަތުން 14 މިލިއަން ރުފިޔާ އެމަނިކުފާނު ނަންގަވާފައިވާކަމަށް ކުރީގެ ރައީސް ޔާމިނު ކުރައްވަމުން ގެންދަވާ ތުހުމަތުތައް ދޮގުކުރައްވާފައެވެ.

ރައީސް ޑރ.މުއިއްޒު ވިދާޅުވީ އަދީބުއަތުން ފައިސާ ނެންގެވިކަމަށް ދެއްކެވި ވާހަކަތަކާމެދު ހައިރާންވެ ވަޑައިގަންނަވާ ކަމަށާއި، އެފަދަ ވާހަކަތައް ދައްކަވަމުންގެންދަވާ މަޤްސަދު އެނގިވަޑައިނުގަންނަވާ ކަމަށެވެ. ރައީސް ވިދާޅުވީ އެއްވެސް އިރަކު އަދީބު އާ ބައްދަލުކުރައްވާފައި ނުވާނޭކަމަށާއި، ހާއްސަކޮށް ފިނިފެންމާ ލޯންޗްގެ ހާދިސާއަށްފަހު އަދީބު އާ އެއްގޮތަކަށްވެސް ދިމާވެފައި ނުވާނޭކަމަށެވެ. 

ރައީސް ވިދާޅުވީ އަހުމަދު އަދީބުވެސް އެމަނިކުފާނާ ބައްދަލުކުރެއްވުމަށް އެދިވަޑައިގެންފައިނުވާކަމަށާއި، މީގެކުރިން ދެމީހުން ބައްދަލުވި ނަމަވެސް ބައްދަލުވެފައި ހުންނާނީ އެހެން ވަޒީރުން ނުވަތަ އެހެންމީހުންނާއެކު ބޭއްވުނު ބައްދަލުވުންތަކުން އެކަނި ކަމަށެވެ. އެހެންކަމުން އަހުމަދު އަދީބުއާ ސިންގަޕޫރުން ނަމަވެސް ބައްދަލު ކުރެއްވިކަމަށް ދެކެވޭ ވާހަކައިގައި އެއްވެސް ކަހަލަ އަސްލެއްނެތްކަމަށް ރައީސް ފާހަގަކުރެއްވިއެވެ.

މިފަހުން ޕީއެންއެފުން ބޭއްވި ޖަލްސާއެއްގައި ކުރީގެ ރައީސް ޢަބްދުﷲ ޔާމީން ވަނީ، ޕާޓީ އޮފީހުގައި ދެކެވޭ ވާހަކަތައް ހޯދައި ޖާސޫސު ކުރެއްވުމަށް ރައީސް މުއިއްޒު، އަހުމަދު އަދީބު އަތުން 14 މިލިއަން ރުފިޔާ ނެންގެވިކަމަށް ތުހުމަތުކުރައްވާފައެވެ. މިކަން ކުރީގެ ޕޮލިސްކޮމިޝަނަރު ޢަބްދުﷲ ރިޔާޒަށް އެނގިވަޑައިގަންނަވާނޭކަމަށްވެސް ރައީސް ޔާމީނު ވަނީ ތުހުމަތު ކުރައްވާފައެވެ. ރައީސް ޔާމީނުގެ އެ ވާހަކަތައް ޢަބްދުﷲ ރިޔާޒް ވަނީ ދޮގުކުރައްވާފައެވެ.