މެލޭޝިޔާގެ ވެރިރަށުގައި މީގެ ހަފްތާގެ ކުރިން، ބިންގަނޑު ކަނޑައިގެން ގޮސްގެން ސިންކްހޯލަކަށް ވެއްޓުނު އިންޑިއާ ފަތުރުވެރިއަކު އަދިވެސް ފެނިފައިނުވާކަމަށް ނޫސްތަކުން ރިޕޯޓްކޮށްފިއެވެ.

ހޯދުމުގެ މަސައްކަތް ކުރަމުންދާ މަސައްކަތަށް ދަތިވަމުން ދަނީ ވަރުގަދަ ފެނުގެ އޮއިވަރާއި، ކައިރީގައި އިތުރު ފުންވަޅެއް ފާޅުވުމާ ގުޅިގެން ބިމުގެ ހަރުކަމާމެދު ކުރެވޭ ކަންބޮޑުވުންތަކުގެ ސަބަބުންނެވެ.

48 އަހަރުގެ ވިޖަޔަ ލަކްޝްމީ ގާލީ ކުއާލަލަމްޕޫރުގެ ދާންގް ވަންގީ ސަރަޙައްދުގައި މަގެއްގައި ހިނގަމުންދަނިކޮށް، އޭނާ ހިނގަމުންދިޔަ ތަނުގެ ދަށުން ކުއްލިއަކަށް ބިންގަނޑު ގޮސްގެން 8 މީޓަރު (26 ފޫޓު) ފުންމިނުގެ ވަޅަކަށް ވެއްޓި ގެއްލުނީ އޯގަސްޓް 23 ވަނަ ދުވަހުއެވެ.

Advertisement

އޭނާ ހޯދުމުގެ މަސައްކަތް މެލޭޝިއާގެ ކަމާ ބެހޭ ފަރާތްތަކުން މެދު ނުކެނޑި ކުރަމުން އަންނައިރު، ފެނުގެ އޮއިވަރާއި، އެ ސަރަހައްދާއި ކައިރިން އަނެއްކާވެސް ބިންގަނޑު ކަނޑައިގެން ގޮސް ސިންކްހޯލެއް އުފެދުމާއި ގުޅިގެން މިހާތަނަށް ފެނިފައިވަނީ އޭނާގެ ފައިގައި އަޅާ އެއްޗެއް އެކަންޏެވެ.

ފަތުރުވެރިޔާ ހޯދުމުގެ މަސައްކަތުގައި ކުއްތާތަކާއި، ދުރުން ބަލާ ކެމެރާތަކާއި، ރާޑާ ބޭނުންކުރެވިފައިވާއިރު، އެ މަސައްކަތުގައި އުޅޭ މީހުން ވަނީ ބާރަށް ފެންޖަހައިގެން ބިމުއަޑީގެ ފެންހިންދާ ނިޒާމުގެ ބައެއް ސަރަޙައްދުތައް ސާފުކޮށް، އެކްސްކަވޭޓަރު ބޭނުންކޮށްގެން އެ ސަރަހައްދުގައި ހުރި ކުނިތައް ނަގައިފައެވެ.

މެލޭޝިއާ ފަޔަރ އެންޑް ރެސްކިއު ޑިޕާޓްމަންޓްގެ ޑެޕިއުޓީ ޑިރެކްޓަރ ނޯރް ހިޝާމް މުޙައްމަދު ވިދާޅުވީ ހޯދުމުގެ މަސައްކަތް ކުރިއަށް ގެންދާނެ ކަމަށާއި، ރައްކާތެރި ކަމެއް ނަމަ ނަރުދަމާ ހޮޅިއަށް ސްކޫބާ ޑައިވަރުން ފޮނުވައި، ބަލާ ޗެކްކުރާނެ ކަމަށެވެ. ބުރާސްފަތި ދުވަހު ވެސް ދެ ޑައިވަރަކު އެ ސަރަހައްދަށް ވައިން ނަމަވެސް، އެ ސަރަހައްދުގެ ހާލަތު ހުރިގޮތުން، އެއީ ނުރައްކާތެރި ކަމަކަށްވާތީ، އޭރު އެމީހުން ވަނީ އެމަސައްކަތް ހުއްޓާލާފައެވެ.

ފަތުރުވެރިޔާ ގެއްލުނު ތަނާ 50 މީޓަރު ދުރުގައި ދެވަނަ ސިންކްހޯލެއް ބުދަ ދުވަހު ފާހަގަކުރެވުނެވެ. އެކަމާއި ގުޅިގެން އާންމުންގެ ސަލާމަތާމެދު ކަންބޮޑުވުން އުފެދި، އެގައުމުގެ ކަމާ ބެހޭ ފަރާތްތަކުން ވަނީ އެ ސަރަހައްދުގެ ބައެއް މަގުތައް ބަންދުކޮށްފައެވެ.

ގާލީ މެލޭޝިއާއަށް އައީ އޭނާގެ ފިރިމީހާއާއި ރައްޓެހިންނާ އެކު ގާތްގަނޑަކަށް ދެމަސް ކުރިން ޗުއްޓީއަކަށެވެ. މި ހާދިސާ ހިނގީ އެމީހުން އެނބުރި ގެއަށް ދިއުމަށް ހަމަޖެހިފައިވާ ދުވަހުގެ ކުރީ ދުވަހުއެވެ.

އޮތޯރިޓީތަކުން ބުނެފައިވަނީ މިދިޔަ އަހަރުވެސް އެތަނުން ބިންގަނޑު ވެއްޓިފައިވާ ކަމަށެވެ.

ކުއަލަލަމްޕޫރުގެ މޭޔަރު މައިމޫނާ މުޙައްމަދު ޝަރީފް ވަނީ ސިޓީގެ ރައްކާތެރިކަން އާންމުންނަށް ޔަގީންކަން ދެއްވާފައެވެ. އޭނާ ވިދާޅުވީ ނަރުދަމާ ހޮޅިތައް ބަލައި، އެ ސަރަހައްދުގެ އިމާރާތްތަކުގެ ސަލާމަތްތެރިކަން ވަޒަންކުރުމަށް ޓާސްކް ފޯހެއް އެކުލަވާލެވިފައިވާ ކަމަށެވެ.