ޓިކްޓޮކް ޓްރެންޑެއްގެ ސަބަބުން، އައިސްލޭންޑް އިން ކިއުކަންބާ ލިބުން ދަތިވެއްޖެއެވެ.
މި ޓްރެންޑް ފެށިގެން އައީ "ކިއުކަންބާ މޭން" ގެ ނަމުން މަޝްހޫރު ލޯގަން މޮފިޓް ފަދަ އިންފްލުއެންސަރުން ޓިކްޓޮކްގައި ކަކުނި ސަލަޑުގެ ރެސިޕީތައް ހިއްސާކުރަން ފެށުމާއެކުގައިއެވެ.
'ކިއުކަންބާ ސެލެޑް' ހޭޝްޓެގްގެ ދަށުން ޓިކްޓޮކްގައި ގާތްގަނޑަކަށް 150،000 ވީޑިއޯ އަޕްލޯޑުކުރެވިފައިވާއިރު، މި ވައިރަލް ޓްރެންޑްގެ ސަބަބުން އައިސްލެންޑުގައި ކިއުކަންބާ އަށް އޮތް ޑިމާންޑު އިތުރުވެ، އައިސްލެންޑުގެ ފިހާރަތަކަށް މި ޑިމާންޑު ފުއްދުމަށް ދަތިވެފައިވާ ކަމަށް އައިސްލެންޑުގެ ނޫސް އައުޓްލެޓް އާރްޔޫވީން ބުދަ ދުވަހު ރިޕޯޓުކޮށްފައިވެއެވެ.
އެގައުމުގެ ރެއިކްޖަވީކްގައި ދިރިއުޅޭ ޑެނިއަލް ސިގްތޯސަން ވަނީ ކިއުކަންބާ ސެލެޑެއް ތައްޔާރުކުރަން އުޅެފައެވެ. ނަމަވެސް އޭނާގެ އަވަށުގެ ގްރޯސަރީ ފިހާރައިގައި ކިއުކަންބާ ނެތްކަން ފާހަގަވުމާއިއެކު، އެ އަވަށުގެ އިތުރު ތިން ފިހާރައެއް ވެސް ބެލިއެވެ. އެ ހުރިހާ ތާކުން ކިއުންކަންބާ ހުސްވެފައިވާކަމަށް އޭނާ ބުންޏެވެ.
އައިސްލެންޑްގެ އެންމެ ބޮޑެތި ގްރޯސަރީ ފިހާރަތަކުގެ ތެރެއިން އެއް ފިހާރައެއް ކަމުގައިވާ ކްރޯނަން އިން ބުނެފައިވަނީ، އެ ގައުމުގެ ހުރިހާ ފިހާރަތަކުން ކިއުކަންބާ ގާތްގަނޑަކަށް ހުސްވެފައިވާ ކަމަށެވެ.
"ފަހަކަށް އައިސް މާކެޓިންގ ދާއިރާގައި ސޯޝަލް މީޑިއާގެ ވަރަށް ބޮޑު އަސަރެއް ކޮށްފައިވޭ. މި ދާއިރާ މުޅިން ބަދަލުވެފައިވާއިރު، ކުންފުނިތަކުން ޓްރެންޑް ވަމުންދާ ކަންކަމަށް ވަރަށް ބޮޑަށް ސަމާލުކަން ދިނުން މުހިންމު،"
ކްރޯނަން އިން ބުނެފައިވެއެވެ.
އިންފްލުއެންސަރ ލޯގަން މޮފިޓް، ޕްލާސްޓިކް ޑެލީ ކޮންޓެއިނަރެއްގައި ތައްޔާރުކުރާ ކިއުކަންބާ ސެލެޑްގެ ރެސިޕީތައް ވައިރަލްވެ ގިނަ ބަޔަކު އަންނަނީ އެ ރެސިޕީތަކަށް ވީޑިއޯ ހަދަމުންނެވެ.
Advertisement
This content is created and paid for by advertisers and does not involve Voice Journalists
