އާސަންދައިގެ ދަށުން ދިވެހިން އާއްމުކޮށް އިންޑިއާއަށް ބޭސްފަރުވާއަށް ގޮސް ފަރުވާ ހޯދަމުން އަންނަ ދެ ހޮސްޕިޓަލަކުން ވަގުތީގޮތުން އާސަންދަ ކަނޑާލައިފިއެވެ. އާސަންދައިގެ ހިދުމަތް ވަގުތީގޮތުން މެދުކަނޑާލާފައިވަނީ، ބެންގަލޫރުގައި ހުންނަ ސައިޓް ކެއާ ހޮސްޕިޓަލްގެ އިތުރުން އެސްޓާ ސީއެމް އައި ހޮސްޕިޓަލެވެ.

މިކަމާ ގުޅޭގޮތުން ވޮއިސްއަށް މައުލޫމާތު ދެއްވަމުން އާސަންދައިގެ އޮފިޝަލު ވިދާޅުވީ، އެ ދެ ހޮސްޕިޓަލުން އާސަންދަ މެދުކަނޑާލާފައިވަނީ، ނުދައްކާހުރި ބިލްތައް ގިނަވުމުގެ ސަބަބުންކަމަށެވެ. އަދި އެއީ އެ ހޮސްޕިޓަލްތަކުގެ ނިންމުމެއްކަމަށްވެސް އޭނާ ފާހަގަކުރިއެވެ.

އިންޑިއާގެ އެ ދެ ހޮސްޕިޓަލުން އާސަންދަ މެދުކަނޑާލިއިރު، މަނިޕާލް ހޮސްޕިޓަލުންވެސް މިހާރު އާސަންދައިގެ ހިދުމަތެއް ނުލިބެއެވެ. އާސަންދައިގެ ދަށުން ޖުލައިމަހުން ފެށިގެން މަނިޕާލް ހޮސްޕިޓަލަށް މީހުން ފޮނުވުން ހުއްޓާލީ އެ ހޮސްޕިޓަލްގެ އަގުތައް ބޮޑުވެ، އަގުތައް ބޮޑުވުމުގެ ސަބަބުންނެވެ. އާސަންދައިން ބުނީ އެ ހޮސްޕިޓަލުގެ އަގުތައް މުރާޖައާކުރަމުން އަންނަ ކަމަށެވެ.

Advertisement

ބިލްތައް ނުދައްކައިގެން އާސަންދައިގެ ހިދުމަތް އިންޑިއާގެ ބައެއް ހޮސްޕިޓަލްތަކުން ކަނޑާލާފައިވާއިރު، އާސަންދައިގެ ހިދުމަތް ބޭރުގެ 57 ހޮސްޕިޓަލަކުން އާސަންދައިގެ ހިދުމަތް ދިނުމަށް ވަނީ ރަޖިސްޓަރކޮށްފައެވެ. މީގެ ތެރެއިން އެންމެ ގިނައީ އިންޑިއާގެ ހޮސްޕިޓަލްތަކެވެ.