އެމެރިކާގެ ދެކުނުގެ ސްޓޭޓެއް ކަމަށްވާ މިސިސިޕީގެ ވޯރެން ކައުންޓީގައި ބަހެއް ފުރޮޅާލައި ހިނގި އެކްސިޑެންޓެއްގައި 6 އަހަރުގެ ކުއްޖަކާއި އޭނާގެ 16 އަހަރުގެ ދައްތަ ހިމެނޭ ގޮތަށް 7 މީހުން މަރުވެ، އެތައް ބަޔަކަށް އަނިޔާވެއްޖެއެވެ.

މިސިސިޕީ ހައިވޭ ޕެޓްރޯލްގެ ނޫސް ބަޔާނެއްގައި ބުނެފައިވާ ގޮތުގައި މި ހާދިސާ ހިނގީ ހޮނިހިރު ދުވަހުގެ މެންދުރު 12:40 ހާއިރުއެވެ.

ރެޖިއޯމޮންޓާނޯސް އޮޓޯބަސް އިން ހިންގާ މި ބަސް އިންޓަރސްޓޭޓް 20 ގައި ހުޅަނގަށް ދަތުރުކުރަމުން ދަނިކޮށް ފުރޮޅާލައިފައިވަނީ މަގުން ކަހަލައިގެންނެވެ. މި އެކްސިޑެންޓް ހިނގަން މެދުވެރިވި ސަބަބު އަދި ސާފުވެފައެއް ނުވެއެވެ.

ހާދިސާ ހިނގި ތަނުގައި 6 މީހުން މަރުވެފައިވާއިރު، އިތުރު މީހަކު ވިކްސްބާގްގެ މެރިޓް ހެލްތު ހޮސްޕިޓަލުގައި މަރުވިއެވެ. އަނިޔާގެ ކުޑަބޮޑުމިން އަދި ނޭނގޭ 37 މީހުން ވިކްސްބާގް އަދި ޖެކްސަންގެ ހޮސްޕިޓަލުތަކަށް ގެންދެވުނެވެ.

ވޯރެން ކައުންޓީގެ ކޮރޯނަރ ޑަގް ހަސްކީ ސީބީއެސް ނިއުސްއަށް މަޢުލޫމާތު ދެމުން ބުނެފައިވަނީ މަރުވި މީހުންގެ ތެރޭގައި ގުއަޓެމާލާގެ އުޚުވަތު ދެކުދިން ހިމެނޭ ކަމަށެވެ. މި ހާދިސާގައި އިތުރު އެހެން އެއްވެސް އުޅަނދެއް ހިމެނިފައެއް ނުވެއެވެ.

މި ހާދިސާ މިހާރު ދަނީ މިސިސިޕީ ހައިވޭ ޕެޓްރޯލް އާއި ކޮމާޝަލް ޓްރާންސްޕޯޓޭޝަން އެންފޯސްމަންޓް ޑިވިޜަނުން ތަޙުޤީޤުކުރަމުންނެވެ.