މެލޭޝިޔާގެ ވެރިރަށުގައި މީގެ ހަފްތާގެ ކުރިން، ބިންގަނޑު ކަނޑައިގެން ގޮސްގެން ސިންކްހޯލަކަށް ވެއްޓުނު އިންޑިއާ ފަތުރުވެރިޔާ ހޯދުން މެލޭޝިއާގެ ކަމާ ބެހޭ އިދާރާތަކުން ހުއްޓާލައިފިއެވެ.

48 އަހަރުގެ ވިޖަޔަ ލަކްޝްމީ ގާލީ ކުއާލަލަމްޕޫރުގެ ދާންގް ވަންގީ ސަރަޙައްދުގައި މަގެއްގައި ހިނގަމުންދަނިކޮށް، އޭނާ ހިނގަމުންދިޔަ ތަނުގެ ދަށުން ކުއްލިއަކަށް ބިންގަނޑު ގޮސްގެން 8 މީޓަރު (26 ފޫޓު) ފުންމިނުގެ ވަޅަކަށް ވެއްޓި ގެއްލުނީ އޯގަސްޓް 23 ވަނަ ދުވަހުއެވެ.

އޭނާ ހޯދުމުގެ މަސައްކަތް މެލޭޝިއާގެ ކަމާ ބެހޭ ފަރާތްތަކުން މެދު ނުކެނޑި ކުރަމުން އަންނައިރު، ފެނުގެ އޮއިވަރާއި، އެ ސަރަހައްދާއި ކައިރިން އަނެއްކާވެސް ބިންގަނޑު ކަނޑައިގެން ގޮސް ސިންކްހޯލެއް އުފެދުމާއި ގުޅިގެން މިހާތަނަށް ފެނިފައިވަނީ އޭނާގެ ފައިގައި އަޅާ އެއްޗެއް އެކަންޏެވެ.

Advertisement

މެލޭޝިއާގެ ބޮޑުވަޒީރުގެ ޑިޕާޓްމެންޓް ގެ މިނިސްޓަރެއް ކަމަށްވާ ޑރ.ޒާލިހާ މުސްތަފާ ވިދާޅުވި ގޮތުގައި މިފަދައިން އޭނާ ހޯދުމުގެ މަސައްކަތް ހުއްޓާލުމަށް ނިންމާފައިވަނީ ސަލާމަތްކުރުމުގެ މަސައްކަތުގައި ހަރަކާތްތެރިވާ މީހުންގެ ރައްކާތެރިކަމާއި ސިއްހަތާ ގުޅޭ ކަންބޮޑުވުންތައްފަދަ އެތައް ކަމެއް ހިމެނޭތީއެވެ.

މުސްތަފާ ވިދާޅުވީ، އެ މަސައްކަތް ކުރިއަށްދަނިކޮށް، އެ ސަރަހައްދުގައި އިތުރު ސިންކްހޯލެއް އުފެދުމާއި ގުޅިގެން އެ މަސައްކަތުގައި އުޅޭ މީހުންގެ ސަލާމަތްތެރިކަމާއި މެދު ވިސްނަންޖެހޭ ކަމަށެވެ.

މުސްތަފާ ވިދާޅުވީ، އެމީހުންގެ މި ނިންމުން ފަތުރުވެރިޔާގެ އާއިލާއަށް އަންގާފައިވާ ކަމަށާއި، މި ހިތާމަވެރި ހާދިސާއާ ގުޅިގެން އެ މީހުންނަށް އިތުރު އެއް ހަފްތާއަށް ވީސާ އިތުރުކޮށްދީފައިވާ ކަމަށެވެ.

ގާލީ މެލޭޝިއާއަށް އައީ އޭނާގެ ފިރިމީހާއާއި ރައްޓެހިންނާ އެކު ގާތްގަނޑަކަށް ދެމަސް ކުރިން ޗުއްޓީއަކަށެވެ. މި ހާދިސާ ހިނގީ އެމީހުން އެނބުރި ގެއަށް ދިއުމަށް ހަމަޖެހިފައިވާ ދުވަހުގެ ކުރީ ދުވަހުއެވެ.

އޮތޯރިޓީތަކުން ބުނެފައިވަނީ މިދިޔަ އަހަރުވެސް އެތަނުން ބިންގަނޑު ވެއްޓިފައިވާ ކަމަށެވެ.

ކުއަލަލަމްޕޫރުގެ މޭޔަރު މައިމޫނާ މުޙައްމަދު ޝަރީފް ވަނީ ސިޓީގެ ރައްކާތެރިކަން އާންމުންނަށް ޔަގީންކަން ދެއްވާފައެވެ. އޭނާ ވިދާޅުވީ ނަރުދަމާ ހޮޅިތައް ބަލައި، އެ ސަރަހައްދުގެ އިމާރާތްތަކުގެ ސަލާމަތްތެރިކަން ވަޒަންކުރުމަށް ޓާސްކް ފޯހެއް އެކުލަވާލެވިފައިވާ ކަމަށެވެ.