ދިވެހިރާއްޖެއިން ތުރުކީއަށް އެކްސްޕޯޓް ކުރާ ތަކެތީގެ ތެރެއިން 38 އައިޓަމަކުން ޑިއުޓީ ކަނޑާލުމަށް ހަމަޖެހިފައިވާކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ވަޒީރު ސައީދު މިފަދައިން ވިދާޅުވީ، ދައުލަތުގެ މީޑިއާ، ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި ވާހަކަފުޅު ދައްކަވަމުންނެވެ.

މިގޮތުން ވަޒީރު ސައީދު ވިދާޅުވީ، މިކަމާއި ގުޅޭގޮތުން ދެގައުމުގެ ދެމެދުގައި ކުރެވުނު މަޝްވަރާތަކުގެ ތެރެއިން 214 ބާވަތެއް ރާއްޖެއިން ހުށަހެޅިއިރު، އޭގެ ތެރެއިން 38 ބާވަތަކަށް ޑިއުޓީ ކަނޑާލުމަށް ހުށަހެޅުނު ކަމަށާއި، ބާކީ ބާވަތްތަކަށް ޑިއުޓީ ކުޑަކުރުމަށް ހުށަހެޅިފައިވާކަމަށެވެ.

 މިއީ މީގެ ކުރިން އެއްވެސް ވަރަކަށް ޑިއުޓީ އުނިކުރަން ލިބިފައިވާ ބާވަތްތަކެއް ނޫންކަން ވަޒީރު ސައީދު ފާހަގަކުރެއްވިއެވެ

”އަޅުގަނޑުމެން އެންމެ އިސްކަންދޭ އައިޓަމްތަކުގެ ގޮތުގައި ހިމެނި އައިޓަމްތައް އެބަހުރި އޭގެ ތެރޭގައި އެބޭފުޅުންވެސް ހިމަނާފައި. މިސާލަކަށް ކަޅުބިލަ މަހާއި، ރީނދޫ އުރަހަ ކަންނެލި، އަދި ލޯބޮޑު ކަންނެލި ހިމެނޭ. އޭގެ އިތުރަށް ހިކިމަހުގެ ބާވަތްތަކުން ތައްޔާރުކުރާ އުފެއްދުންތައް ހިމެނޭ.“

ރާއްޖެއާއި ތުރުކީއާ ދެމެދު ކަނޑައެޅޭ ވަކި މުދާތަކެއްގެ ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް ފެށީ، މިދިޔަ އަހަރު ފަހުކޮޅު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީވިލާތަށް ކުރެއްވި ރަސްމީ ދަތުރުފުޅުގެ ތެރެއިން ކުރެއްވި މަޝްވަރާތަކަށް ފަހުއެވެ. އެގޮތުން ދެ ޤައުމު ދެމެދު ވިޔަފާރީގެ ގުޅުން ބަދަހިކުރުމަށް ސޮއިކުރެވުނު އެއްބަސްވުމުގެ ތެރެއިން ރާއްޖެއާއެކު ޕްރިފަރެންޝަލް ޓްރޭޑް އެގްރިމެންޓް (ޕީޓީއޭ)ގައި ސޮއިކުރުމުގެ މަޝްވަރާތައް މި އަހަރުގެ މާރިޗު މަހު ވަނީ ފަށާފައެވެ.