ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ހިއްސާ އާއްމުނަށް ވިއްކުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވިސްނުމެއްކަމަށް ހައުސިން މިނިސްޓަރު ޑރ އަލީ ހައިދަރު ވިދާޅުވެއްޖެއެވެ.

މިއަދު ބޭއްވި ކެބިނެޓް ބައްދަލުވުމުގައި ނިންމާފައިވަނީ އެޗްޑީސީގެ ސަބްސިޑަރީ ކުންފުންޏެއްގެ ގޮތުގައި ފަހި ދިރިއުޅުން ކޯޕަރޭޝަން ހަމަޖެއްސުމަށެވެ. ކެބިނެޓުން މިއަދު ނިންމެވި ނިންމެވުންތަް ނޫސްވެރިންނާ ހިއްސާކުރުމަށް ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހައުސިން މިނިސްޓަރު ޑރ.އަލީ ހައިދަރު ވިދާޅުވީ، އެޗްޑީސީގެ ހިއްސާ އާއްމުނަށް ވިއްކުމަކީ ރައީސް ޑރ.މުހައްމަދު މުއިއްޒުގެ ވިސްނުން ފުޅެއްކަމަށެވެ.

މިއަދު ކެބިނެޓުން މިކަން ނުނިންމެވި ނަމަވެސް ރައީސް ޑރ.މުއިއްޒުގެ ވިސްނެވުމަކީ އެޗްޑީސީގެ ހިއްސާ ރައްޔިތުންނަށް ވިއްކެވުންކަމަށް މިނިސްޓަރު ހައިދަރު ވިދާޅުވިއެވެ.

މިނިސްޓަރު ވިދާޅުވީ އެޗްޑީސީގެ ދަށަށް ފަހިދިރިއުޅުން ބަދަލުކުރުމާއެކު މީގެ ފަހުން ރައްޔިތުންނަށް ސޯޝަލް ހައުސިން މަޝްރޫޢުތައް ހިންގާނީ އެޗްޑީސީން ކަމަށެވެ.

ސަރުކާރުން މިހާރު ނިންމާފައިވަނީ ފަހިދިރިއުޅުން ކޯޕަރޭޝަނުން ރާއްޖޭގެ އެކި ސަރަހައްދުތަކުގައި އިޖުތިމާއީ ބޯހިޔާވަހިކަމުގެ މަޝްރޫޢުތައް ކުރިއަށް ގެންދާށެވެ. ނަމަވެސް އެ މަޝްރޫޢުތައް ދެން ކުރިއަށްގެންދާނީ އެޗްޑީސީގެ ސަބްސިޑިއަރީ ކުންފުންޏެއްގެ ގޮތުގައި އޮވެކަމަށް މިނިސްޓަރު ހައިދަރު ވިދާޅުވިއެވެ. މިނިސްޓަރު ހައިދަރު ވިދާޅުވީ، އެޗްޑީސީ އާއި ފަހިދިރިއުޅުން ކޯޕަރޭޝަނަކީ ދާދި އެއްގޮތް މަސައްކަތްތަކެއް ކުރާ ދެކުންފުންޏަކަށް ވުމުން ރައީސް ނިންމެވީ ހަރަދުތައްވެސް ކުޑަކުރުމުގެ ނިޔަތުގައި އެޗްޑީސީގެ ދަށަށް ފަހިދިރިއުޅުން ބަދަލުކުރާށެވެ.

އެޗްޑީސީން މިހާރު ބަލަހައްޓަމުންދާ ތަންތަނުގެ ތެރޭގައި ހުޅުމާލޭގެ އިތުރުން ގުޅީފަޅާއި ތިލަފުށި ހިމެނެއެވެ.