ޝިއާއު މުހައްމަދު ސައީދު މަރާލި މައްސަލާގައި ދައުވާ ލިބިފައިވާ އަލީ ޝާހިލް، އެ މައްސަލަ ކުރިއަށް ގެންދަން ބޭނުންވަނީ ވަކީލަކާ ނުލައި އަމިއްލައަށް ކަމަށް މިއަދު ކޯޓުގައި ބުނެފިއެވެ.

މީގެ ކުރިން ދައުލަތުގެ ފަރާތުން ޝާހިލަށް ތިން ވަކީލަކު ހަމަޖައްސައިދިން ނަމަވެސް، އޭނާ އެ ވަކީލުންނާ ވާހަކަދައްކާފައި ނުވާ ކަމަށް ބަންޑާރަ ނައިބުގެ އޮފީހުން ކުރިން ބުނެފައިވެއެވެ. މިކަމުގެ ސަބަބުން މައްސަލައިގެ އަޑުއެހުންތައް ވަނީ މަޑުޖެހިފައެވެ.

މިއަދުގެ އަޑުއެހުމުގައި މައްސަލަ ބައްލަވާ ގާޒީ މުހައްމަދު މިސްބާހް ވަނީ، ކުރިން ވަކީލުންނަށް ދޫކޮށްފައިވާ ލިޔެކިއުންތައް ޝާހިލަށް ހަވާލުކުރުމަށް ދައުލަތަށް އަންގަވާފައެވެ. އަދި ހެކި ރައްކާތެރިކުރުމަށް ނެރެފައިވާ އަމުރުތައް ކޯޓުގައި ބެލޭނެ އިންތިޒާމު ހަމަޖައްސައިދިނުމަށްވެސް އަންގަވާފައިވެއެވެ.

ދެން އޮންނަ އަޑުއެހުމުގައި ދައުވާ ހުށަހަޅައި ޖަވާބުދާރީވުމުގެ ބައި ކުރިއަށް ގެންދާނެ ކަމަށް ގާޒީ މިސްބާހް ވިދާޅުވިއެވެ.

ޝިއާއު މަރާލި މައްސަލާގައި ޝާހިލްގެ މައްޗަށް ކޮށްފައިވާ ދައުވާތަކުގެ ތެރޭގައި ގަސްދުގައި މީހަކު މެރުމާއި، އޮރިޔާން ކާޑު ގެންގުޅުމާއި، ކެނެބިސް ބޭނުންކުރުން ހިމެނެއެވެ. މީގެ އިތުރުން ސިއްރުކޮށްފައިވާ ދެ ދައުވާއެއްވެސް އޭނާގެ މައްޗަށް އުފުލާފައިވެއެވެ.

މި މައްސަލައިގެ ތަފްސީލަށް ބަލާއިރު، 22 އަހަރުގެ ޝިއާއު މަރާލާފައި އޮއްވާ ފެނުނީ 2022 ވަނަ އަހަރުގެ އޮގަސްޓް 6 ވަނަ ދުވަހު، ހ. ޝީރީންވިލާ ގޭގެ ނުވަ ވަނަ ބުރީގައި ހުންނަ އެޕާޓްމަންޓެއްގެ ތެރެއިންނެވެ. ހަމަ އެ ރޭ، 23 އަހަރުގެ ޝާހިލް ވަނީ ކުށުގެ ވެށިން ހައްޔަރުކޮށްފައެވެ. ޝިއާއުގެ ހަށިގަނޑު އިންޑިއާއަށް ފޮނުވައިގެން ހެދި ޕޯސްޓްމޯޓަމްގެ ވަގުތީ ނަތީޖާއިން ދައްކާގޮތުގައި، ޝިއާއު މަރުވި ފަހުން ވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވާ ކަމަށް ފާހަގަކުރެވިފައިވެއެވެ.

މިހާތަނަށް ޝާހިލް މި ދައުވާތަކަށް އިއުތިރާފުވެފައި ނުވާ ކަމަށް ކުރިން ފުލުހުންނާއި ބަންޑާރަ ނައިބުގެ އޮފީހުން ބުނެފައިވެއެވެ. ފުލުހުން ބުނާ ގޮތުގައި، ތަހުގީގުގެ މަރުހަލާގައި ޝާހިލް ވަނީ ފުލުހުންނަށް އެއްބާރުލުން ދިނުމަށް ފުރަތަމަ ދެކޮޅުހަދާފައެވެ. ނަމަވެސް، ގަސްތުގައި މީހަކު މަރާލުމުގެ ދައުވާ ކުރެވޭ ވަރަށް އޭނާއާ ދެކޮޅަށް ހެކި ލިބިފައިވާ ކަމަށް ފުލުހުން ބުނެފައިވެއެވެ.

މި މައްސަލައިގެ އަޑުއެހުންތައް ކްރިމިނަލް ކޯޓުގައި ފެށީ 2023 ވަނަ އަހަރުގެ ޖެނުއަރީ މަހުގައެވެ. މައްސަލައިގެ އަޑުއެހުންތައް ކުރިއަށް ގެންދަނީ ސިއްރުކޮށްގެންނެވެ.