ރަޝިއާގެ މަޝްހޫރު "ސްޕައި ވޭލް" ނޯވޭ ކައިރިން މަރުވެފައި އޮއްވާ ފެނިއްޖެއެވެ.

ހްވަލްޑިމީރު ގެ ނަމުން ނަންދެވިފައިވާ މި ވޭލް އަށް "ސްޕައި ވޭލް" ގެ ލަގަބު ދެވުނީ އެސޮރުގެ ގައިގައި އަޅުވާފައިވާ  ހާނަސްގެ ސަބަބުން އެއީ ރަޝިއާއަށް ޖާސޫސުކޮށްދޭ އެއްޗެއް ކަމަށް ޝައްކު ކުރެވުމާއި ގުޅިގެންނެވެ.

ވޭލްގެ ހަށިގަނޑު ފެނިފައިވަނީ ނޯވޭގެ ދެކުނުގައިވާ ރިސަވިކާ ކަނޑުއޮޅިން މަސްބޭނުމަށް ދިޔަ ބައްޕައަކާއި ދަރިއަކަށް ކަމަށް ނޯވޭގެ ޕަބްލިކް ބްރޯޑްކާސްޓަރު އެން.އާރު.ކޭ އިން ވަނީ ރިޕޯޓުކޮށްފައެވެ.

މި ވޭލްގެ ހަރަކާތްތައް ދިރާސާކުރަމުން ދިޔަ މެރިން މައިންޑް ޖަމިއްޔާއިން ބުނީ، ހްވަލްޑިމީރަކީ ހަމައެކަނި ބެލޫގާ ވެލެއް ނޫންކަމަށާއި، އެއީ، އިންސާނުންނާއި ގުދުރަތީ ދުނިޔެއާ ދެމެދު އޮންނަ ފުން ގުޅުމުގެ ރަމްޒެއް ކަމަށެވެ.

ހްވަލްޑިމީރަކީ ނޯވޭ ބަހުން ވޭލަށް ކިޔާ "ހްވަލް" އާއި ރަޝިޔާގެ ރައީސް ވްލަދިމީރު ޕޫޓިންގެ ނަމުގެ ކުރީބައި އެއްކޮށްލައިގެން ކިޔާފައިވާ ނަމެކެވެ. މި ވޭލް ފުރަތަމަ ފެނުނީ 2019 ވަނަ އަހަރު ނޯވޭގެ އެންމެ އުތުރުގެ އައްސޭރިފަށުންނެވެ.

އެސޮރުގެ ގައިގައި އިންސާނުން ހަދާފައިވާ ހާނަސްގައި ކެމެރާއެއް ހަރުކުރެވޭ ގޮތަށް ހުރުމާއި، "އިކުއިޕްމަންޓް ސެންޓް ޕީޓަރސްބާގް" މި ލިޔުން ޖަހާފައި ހުރުމުން، އެއީ ޖާސޫސުކޮށްދޭ އެއްޗެއް ކަމަށް ޝައްކު ކުރެވުނެވެ.

އެހެންނަމަވެސް މިވާހަކަތަކަށް ރަޝިއާއިން ރައްދުދީފައެއް ނުވެއެވެ.

ދިގު މިނުގައި 4.2 މީޓަރު އަދި ބަރުދަނުގައި 1،225 ކިލޯ ހުންނަ ހްވަލްޑިމީރް މަރުވިއިރު އެސޮރުގެ އުމުރަކީ ގާތްގަނޑަކަށް 14 އަހަރެވެ. 

މި ވޭލްގެ ހަށިގަނޑު މިހާރު ވަނީ އިތުރަށް ބެލުމަށްޓަކައި ކައިރީގައި ހުރި އައްސޭރިއަކަށް ގެންގޮސްފައެވެ.

ގްރީންލޭންޑާއި، ނޯވޭ އަދި ރަޝިއާ ހިމެނޭ ސަރަހައްދުން ފެންނަ ހްވަލްޑިމީރް ނިސްބަތްވާ ނަސްލުގެ ބެލޫގާ ވޭލްސް ދުނިޔޭގައި އާއްމުގޮތެއްގައި 40 އާއި 60 އަހަރާއި ދެމެދުގެ މުއްދަތަކަށް ދިރިހުރެއެވެ.