ކަޝްމީރު ވާދީގެ ޝޯޕިއަން ސަރަޙައްދުގައި، ޕީއެޗްޑީ ޙާޞިލުކޮށްފައިވާ ޑރ. މަންޒޫރު ޙަސަން، އޭނާގެ ޢާއިލާ ބެލެހެއްޓުމަށްޓަކައި ގާޑިއެއްގައި މޭވާއާއި ކުދި ކާނާ ވިއްކާ ވާހަކައަކީ، މިހާރު ސޯޝަލް މީޑިއާގައި އެންމެ ވައިރަލް އެއް ވާހަކައެވެ.

މަތީ ތަޢުލީމުގެ ދާއިރާގައި 10 އަހަރުގެ ތަޖުރިބާ ލިބިފައިވާ، ސިޔާސީ ޢިލްމުވެރިކަމުގެ ޕީއެޗްޑީ ހާސިލުކޮށްފައިވާ ޑރ. ޙަސަނަށް އޭނާގެ އަސްލު ޕްރޮފެޝަން ދޫކޮށްލަން ޖެހުނީ، އޭނާ މަސައްކަތްކުރާ ތަންތަނުން މުސާރަ ދިނުން ލަސްވުމުގެ ސަބަބުންނެވެ.

ޑރ. ޙަސަން ހާސިލްކޮށްފައިވާ ތައުލީމީ ސެޓްފިކެޓްތަކަށް ބަލާއިރު، ސިޔާސީ ޢިލްމާއި ޢާންމު އިދާރީ ހިންގުމުގެ ދެ މާސްޓަރސް ޑިގްރީއާއި، ދެ ބީއެޑް ޑިގްރީއާއި، އަދި ކޮމްޕިއުޓަރ އެޕްލިކޭޝަނާއި ކާރިސާ ބެލެހެއްޓުމުގެ ޕޯސްޓްގްރެޖުއޭޓް ޑިޕްލޮމާ ހިމެނެއެވެ. މިހުރިހާ ތައުލީމީ ސެޓްފިކެޓްތައް ހުރި ނަމަވެސް، ކުރާ މަސައްކަތަކަށް މުސާރަ ނުދޭތީ، ޑރ.ޙަސަން އަންނަނީ ގާޑިޔަލުގައި ހިކި މޭވާ ވިއްކަމުންނެވެ.

Advertisement

އިންޑިއާގެ ބައެއް މީޑިއާތަކަށް ދެއްވި ބަސްދީގަތުމެއްގައި ޑރ.ޙަސަން ގެ މި ހާލަތު ކިޔައިދެއްވަމުން ވިދާޅުވީ، އޭނާގެ މި މަސައްކަތް ކުރާކަން ދަރިންނަށް ނޭނގޭ ކަމަށެވެ. ޑރ. ހަސަން ކިޔަވައިދިން ބައެއް ދަރިވަރުންނަށް އޭނާގެ މިއަދުގެ ހާލަތު ފެނުމުން ރޮއި ހަދާ ކަމަށާއި އަދި އެފަދަ ވަގުތުތަކުގައި އޭނާ އަށް ރޮވޭ ކަމަށް ވިދާޅުވިއެވެ.

ޑރ.ޙަސަން ވިދާޅުވީ، ބައެއް ދުވަސްތަކުގައި ހެނދުނު 6:30 ގައި ގެއިން ނުކުންނަ ގޮތަށް މަސައްކަތް ނިންމުމަށް ފަހު ގެޔަށް ދެވެނީ ރޭގަނޑު 9 ޖަހާ ބޮޑުވާ ފަހުން ކަމަށެވެ.

ޑރ.ޙަސަނުގެ ވާހަކަތަކުން އެނގޭގޮތުގައި އޭނާ ވަނީ، ޖަމްމޫ އަދި ކަޝްމީރުގެ އެކި ޑިގްރީ ކޮލެޖުތަކުގައި 13 އަހަރަށްވުރެ ގިނަ ދުވަހު ލެކްޗަރާއެއް ގޮތުގައި 38 މާއްދާ ކިޔަވައިދީފައެވެ. މި ހުރިހާ މާއްދާއަކީވެސް ކަމާބެހޭ ތަޢުލީމީ އިދާރާއިން ހުއްދަ ދީފައިވާ މާއްދާތަކަށްވާއިރު، އޭނާ އަކީ ޔުނިވަރސިޓީ ފެންވަރުގެ އިމްތިޙާނު ކަރުދާސްތައް މާކުކޮށް ހަދާ މީހެކެވެ.

ޑރ.ޙަސަން ވިދާޅުވީ، ގާޑިޔަލުގެ ވިޔަފާރި ފެށުމަށް ނިންމީ، އޭނާ އަށް އިތުރު އެހީތަކެއް ނުލިބޭނެކަން އެނގޭތީކަމަށާއި، އަމިއްލަ ވިޔަފާރިއެއް ފެށުމަކީ އާމްދަނީއެއް ހޯދުމަށް ފެނުނު އެންމެ ރަނގަޅުގޮތް ކަމަށް ވިސްނުމުން ކަމަށެވެ.

ޑރ.ހަސަން. އޭނާގެ މޭވާ ވިއްކުމުގެ ވިޔަފާރީގައި...

ޑރ.ޙަސަން ވަނީ މިފަދައިން ވަޒީފާގެ ދަތިކަން ކުރިމަތިވާނަމަ، އެގައުމުގެ ޒުވާން ޖީލަށް އޮތީ ކަޅު ދުވަސްތަކެއްކަން ފާހަގަކުރައްވާ، އެކަމުގެ ކަންބޮޑުވުން ފާޅުކުރައްވާފައެވެ. އަދި މިފަދަ ހާލަތްތަކާއި މެދު ކަންބޮޑުނުވެ، އަބަދުވެސް ކޮންމެވެސް ގޮތެއް ހޯދުމަށް ޑރ.ޙަސަން ވަނީ ޒުވާނުންނަށް އިލްތިމާސް ކުރައްވާފައެވެ.

ޑރ.ޙަސަން ގާޑިޔަލުގައި ތަފާތު އެކި ބާވަތްތަކުގެ މޭވާ ވިއްކާ މަންޒަރު ފެންނަ ވީޑިއޯއެއް ފޭސްބުކްގައި އާއްމު ވުމާއިއެކު، ގިނަ ބައެއްގެ ސަމާލުކަން ވަނީ އެކަމަށް ލިބިފައެވެ. އަދި ޑރ.ޙަސަން ގެ މި ބުރަ މަސައްކަތަށް ގިނަ ބަޔަކު އަންނަނީ ތައުރީފު ކުރަމުންނެވެ.

މި ވީޑިއޯ އަށް ކޮމެންޓް ކުރި ބައެއް ފަރާތްތަކުން ބުނާ ގޮތުގައި، ކަޝްމީރުގައި ތައުލީމީ ޒުވާނުން ގިނަ ނަމަވެސް، އެމީހުންނަށް އެކަށީގެންވާ ވަޒީފާއެއް ނުލިބެއެވެ. 

އިންޑިއާގެ ބާރުގެ ދަށުގައި އޮންނަ ކަޝްމީރުގެ ސޯފިއަން ވާދީގައި ދެ ލައްކައަށްވުރެ ގިނަ މީހުން ދިރިއުޅެއެވެ. ސޯފިއަނަށް ނިސްބަތްވާ 98 އިންސައްތައަށްވުރެ ގިނަ މީހުންނަކީ މުސްލިމުންނެވެ. އެތަނުގައި ދެން އެންމެ ގިނައީ ހިންދޫންނެވެ. ސޯފިއަންގެ އިގްތިސާދު ބިނާވެފައިވަނީ ދަނޑުވެރިކަމުގެ މައްޗަށެވެ.