މަސްވެރިކަމުގެ ރޯ މެޓީރިއަލް ޓެރިފެއްނެތި ތުރުކީއަށް ވެއްދޭނެ އިންތިޒާމް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފަހިކޮށްދެއްވާފައިވާކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ނޭޝަނަލް ސިންގަލް ވިންޑޯ ޕްރޮޖެކްޓްގެ ފުރަތަމަ ފިޔަވަހީގެ ދަށުން ފޯރުކޮށްދޭ ހިދުމަތްތައް ރަސްމީކޮށް އިފްތިތާހްކުރުމަށް މިއަދު ބޭއްވި ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ތުރުކީ އާއި އެކު ސަރުކާރުން ވެފައިވާ ޕްރިފަރެންޝަލް ޓްރޭޑް އެގްރިމެންޓް (ޕީޓީއޭ) ނިމިފައިވާ ކަމަށާއި، %0 ގައި ތުރުކީ އަށް ވެއްދޭނެ 34 އައިޓަމެއް ލިބިފައިވާ ކަމަށެވެ.

ވަޒީރު ވިދާޅުވީ، ދުނިޔޭގެ ބާޒާރަށް ސަރުކާރުގެ ތެރެއިން ވިޔަފާރިވެރިންނާއި ވިޔަފާރިތައް ގެންދެވޭނެ ގޮތަކީ މިއީ ކަމަށެވެ. އަދި މި މަސައްކަތް ރެއާއި ދުވާލު ވަރުބަލި ކަމެއް ނެތި ކުރައްވަމުން ގެންދަވާނެ ކަމަށް ވަޒީރު ސައީދު ވިދާޅުވިއެވެ.

މީގެ ކުރިން ދައުލަތުގެ މީޑިއާ، ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި ވާހަކަފުޅު ދައްކަވަމުން ވެސް ވަޒީރު ސައީދު ވަނީ ދިވެހިރާއްޖެއިން ތުރުކީއަށް އެކްސްޕޯޓް ކުރާ ތަކެތީގެ ތެރެއިން 38 އައިޓަމަކުން ޑިއުޓީ ކަނޑާލުމަށް ހަމަޖެހިފައިވާކަމަށް ވިދާޅުވެފައެވެ.

މިކަމާއި ގުޅޭގޮތުން ދެގައުމުގެ ދެމެދުގައި ކުރެވުނު މަޝްވަރާތަކުގެ ތެރެއިން 214 ބާވަތެއް ރާއްޖެއިން ހުށަހެޅިއިރު، އޭގެ ތެރެއިން 38 ބާވަތަކަށް ޑިއުޓީ ކަނޑާލުމަށް ހުށަހެޅުނު ކަމަށާއި، ބާކީ ބާވަތްތަކަށް ޑިއުޓީ ކުޑަކުރުމަށް ހުށަހެޅިފައިވާކަމަށާއި، މިއީ މީގެ ކުރިން އެއްވެސް ވަރަކަށް ޑިއުޓީ އުނިކުރަން ލިބިފައިވާ ބާވަތްތަކެއް ނޫންކަމަށް ވަޒީރު ސައީދު ވަނީ ވިދާޅުވެފައެވެ.

ރާއްޖެއާއި ތުރުކީއާ ދެމެދު ކަނޑައެޅޭ ވަކި މުދާތަކެއްގެ ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް ފެށީ، މިދިޔަ އަހަރު ފަހުކޮޅު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީވިލާތަށް ކުރެއްވި ރަސްމީ ދަތުރުފުޅުގެ ތެރެއިން ކުރެއްވި މަޝްވަރާތަކަށް ފަހުއެވެ. އެގޮތުން ދެ ޤައުމު ދެމެދު ވިޔަފާރީގެ ގުޅުން ބަދަހިކުރުމަށް ސޮއިކުރެވުނު އެއްބަސްވުމުގެ ތެރެއިން ރާއްޖެއާއެކު ޕްރިފަރެންޝަލް ޓްރޭޑް އެގްރިމެންޓް (ޕީޓީއޭ)ގައި ސޮއިކުރުމުގެ މަޝްވަރާތައް މި އަހަރުގެ މާރިޗު މަހު ވަނީ ފަށާފައެވެ.