ޤައުމިއްޔަތުގެ ނަމުގައިވިޔަސް ފިތުނައާއި ނަފުރަތު ފެތުރުމަށް ޖާގަ ދެވިގެންނުވާނެ ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، ޤައުމީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
މިގޮތުން ޝާހިދު ވިދާޅުވީ، ދިވެހި ޤައުމިއްޔަތު ބިނާކުރެވިފައިވަނީ އެކުވެރިކަމާއި އެއްބައިވަންތަކަމުގެ މައްޗަށްކަމަށާއި، ދިވެހިންނަކީ އެއްދީނެއްގައި ތިބި، އެެއްބަހަކުން ވާހަކަދައްކާ، އެއްނަސްލެއްގެ އެއްބައެއްކަމަށެވެ. އަދި މިއީ ދުނިޔޭގެ މަދުބަޔަކަށް ނޫނީ ލިބިފައިނުވާ މަތިވެރި ނަސީބެއްކަން ޝާހިދު ފާހަގަ ކުރެއްވިއެވެ.
ޝާހިދު އިތުރަށް ވިދާޅުވީ، ޤައުމިއްޔަތުގެ ނަމުގައިވިޔަސް ދިވެހިންގެ މެދުގައި ބައިބައިވުން އުފައްދައި، ފިތުނައާއި ނަފުރަތު ފެތުރުމަށް ޖާގަ ދެވިގެންނުވާނެކަމަށާއި، އެކަން ވެގެންދާނީ ގައުމިއްޔަތަށް އޮތް އެންމެ ބޮޑު ނުރައްކަލަށް ކަމަށެވެ.
ޝާހިދުގެ މި ޕޯސްޓްގައި އޭނާ ވަނީ އެންމެހާ ދިވެހި ރައްޔިތުންނަށް ގައުމީ ދުވަހުގެ ހެޔޮއެދުމާއި ތަހުނިޔާ އަރިސްކުރައްވާފައެވެ.
Advertisement
This content is created and paid for by advertisers and does not involve Voice Journalists
