ޗައިނާއިން އެމެރިކާގެ 2024ގެ ރިޔާސީ އިންތިޚާބަށް ނުފޫޒު ފޯރުވުމަށް މަސައްކަތްކުރާކަން ހާމަވެއްޖެއެވެ.

ގްރަފިކާ ނަމަކަށް ކިޔާ ދިރާސާ ކުންފުންޏަކުން އާ ދިރާސާއެއް ކުރުމަށްފަހު ހާމަކޮށްފައިވާ ގޮތުގައި، ޗައިނާ ސަރުކާރާ ގުޅުންހުރި ފަރާތްތަކުން އެމެރިކާގެ 2024 ވަނަ އަހަރުގެ ރިޔާސީ އިންތިޚާބަށް ނުފޫޒު ފޯރުވުމަށް ކުރާ މަސައްކަތްތައް އިތުރުވެފައިވާކަން ފާހަގަކޮށްފައިވެއެވެ.

މި މަސައްކަތުގައި، އޭއައި އިން އުފައްދާފައިވާ ދޮގު އެމެރިކާ ވޯޓަރުންގެ ޕްރޮފައިލްތައް ސޯޝަލް މީޑިއާގައި ބޭނުންކޮށްގެން، އިންތިޚާބާ ގުޅޭ ހައްސާސް އިޖްތިމާއީ މައްސަލަތަކާއި ވާހަކަތައް ދައްކައި، މުޖުތަމައުގައި ބައިބައިވުން އުފެއްދުމަށް މަސައްކަތްކޮށްފައިވާކަން ފާހަގަކުރެވިފައިވެއެވެ. މި ކެމްޕޭންތަކުގައި ބޭނުންކޮށްފައިވަނީ އިނގިރޭސިވިލާތުގެ އޭއައި ވީޑިއޯ އުފެއްދުމުގެ ޕްލެޓްފޯމެއް ކަމަށް ބެލެވެއެވެ.

ނަމަވެސް މި ކެމްޕޭންތަކަކީ "ސްޕެމޮފްލާޖް" ގޮތުގައި ގިންތިކުރެވިފައިވާ، ދަށް ފެންވަރުގެ ވީޑިއޯތަކެއް ކަމަށްވާތީ، 300 އަށްވުރެ ގިނަ މީހުން ބަލާފައިނުވާ އަދި މާބޮޑު ސަމާލުކަމެއް ލިބިފައިނުވާ ވީޑިއޯތަކެކެވެ. މިއިން ދޭހަވަނީ ޤަބޫލުކުރެވޭ ފަދަ ސިޔާސީ މައުލޫމާތު އުފެއްދުމުގެ ދަތިކަމެވެ.

މި ރިޕޯޓުގައި ފާހަގަކޮށްފައިވާ ގޮތުގައި، މި ފޭކް އެކައުންޓުތަކުން އެއް މައުލޫމާތެއް ތަކުރާރުކޮށް ޙިއްސާކޮށްގެން "ކޯޑިނޭޓެޑް އެމްޕްލިފިކޭޝަން" ގެ އުކުޅު ބޭނުންކޮށްފައިވެއެވެ. މި ކޮންޓެންޓްތަކުގެ މަޤްޞަދަކީ އެމެރިކާގެ ޑިމޮކްރަސީއާއި ސިޔާސީ ނިޒާމަށް އިތުބާރު ގެއްލުވާލުމާއި، 2020 ވަނަ އަހަރުގެ އިންތިޚާބުގެ ސައްޙަކަމާމެދު ސުވާލު އުފެއްދުމެވެ.

މީގެ ކުރިންވެސް ޗައިނާއިން އެމެރިކާގެ ރައްޔިތުންނަށް ނުފޫޒު ފޯރުވުމަށް މަސައްކަތްކުރާކަން ދައްކުވައިދޭ ރިޕޯޓުތައް ނެރެފައިވެއެވެ.

ޗައިނާއިން ވަކި ކެންޑިޑޭޓަކަށް ތާއީދުކުރުމުގެ ބަދަލުގައި، އެމެރިކާގެ ރައްޔިތުން ބައިބައިކޮށް، އެމެރިކާގެ ސިޔާސީ ނިޒާމަށް އޮތް އިތުބާރު ގެއްލުވާލުމަށް މަސައްކަތްކުރާކަން ފާހަގަކުރެވެއެވެ.

ސިޔާސީ ނުފޫޒު ފޯރުވުމުގެ ކެމްޕޭންތަކުގައި އޭއައި ބޭނުންކުރުން ދެމިގެންދާނެ ކަމަށާއި، ޓެކްނޮލޮޖީ ކުރިއަރަމުންދާ ވަރަކަށް މިފަދަ މަސައްކަތްތައް ދެނެގަތުމަށް އުނދަގޫވަމުންދާނެ ކަމަށް ބެލެވެއެވެ.