ރާއްޖޭގެ ތަޖުރިބާކާރު ހޭންޑްބޯޅަ ކޯޗު، ހުސައިން އަޒްހަމް ޔުނިވާސިޓީ އޮފް ލެއިޕްޒިގް އިން ހިންގާ ހަ މަސް ދުވަހުގެ އިންޓަނޭޝަނަލް ކޯޗިންގ ޕްރޮގުރާމެއްގައި ބައިވެރިވުމަށް ޖަރުމަނަށް ދިއުމަށްޓަކައި އާދިއްތަ ދުވަހު ފުރައިފިއެވެ.

މި ޕްރޮގުރާމަކީ ޖަރުމަނުގެ ޔުނިވާސިޓީ އޮފް ލެއިޕްޒިގުގެ ކޯޗިން ކޯސްތަކުގައި ހިމެނޭ ފިނި މޫސުމުގެ ކޯޗިންގ ޕްރޮގްރާމްތަކުގެ ތެރެއިން ހޭންޑްބޯޅައަށް ޚާއްސަ ހަ މަސް ދުވަހުގެ ކޯހެކެވެ. އަދި މި ކޯސް ކުރިއަށްދާނީ 01 ސެޕްޓެމްބަރުން ފެށިގެން އަންނަ އަހަރުގެ ޖެނުއަރީ މަހާ ހަމައަށެވެ. 

ހޭންޑްބޯޅަ މޯލްޑިވްސްއަށް މިކޯހުގައި ކޯޗަކު ބައިވެރިކުރުމަށް ފުރުސަތު ދީފައި ވަނީ ރައްޖޭގައި ހުންނަ ޔުނިވާސިޓީ އޮފް ލެއިޕްޒިގްގެ އެމްބެސެޑަރ މެދުވެރިކޮށް، ސްރީ ލަންކާގައި ހުންނަ ޖަރުމަނު އެމްބަސީންނެވެ. އަދި އެސޯސިއޭޝަނުން ކޯހަށް ޝަރުތު ހަމަވާ ފަރާތްތަކަށް ކުރިމަތިލުމަށް ފުރުސަތު ހުޅުވާލުމުން އަޒްހަމް އާއެކު އިތުރު ތިން ކޯޗަކު ވަނީ ކޯހުގައި ބައިވެރިވުމަށް އެދި ފޯމު ހުށަހަޅާފައެވެ.

އެސޯސިއޭޝަނުން ހުޅުވާލި ފުރުސަތުގައި ކޯހުގައި ބައިވެރިވުމަށް ހުރިހާ ކޯޗުންވެސް ލިޔެކިޔުންތައް ހުށަހަޅާފައި ވަނީ ލަންކާގައި ހުންނަ ޖަރުމަނު އެމްބަސީއަށެވެ. އަދި އެމްބަސީން ޔުވާސިޓީއަށް ލިޔުންތައް ފޮނުވުމުން، ކޯހަށް ހޮވުނު ފަރާތް ކަނޑައަޅާފައި ވަނީ ލެއިޕްޒިގް ޔުނިވާސިޓީންނެވެ.

މީގެ އިތުރުން ހޭންޑްބޯޅަ އެސޯސިއޭޝަންގެ ރައީސް ވިދާޅުވީ މި ޓްރެއިނިންގ ޕްރޮގްރާމުގެ ސަބަބުން ދިވެހި ހޭންޑްބޯޅައަށް އިތުރު ކުރިއެރުންތަކެއް ލިބިގެންދަނެކަމަށް ގަބޫލުފުޅު ކުރައްވާކަމަށެވެ. އަދި ހޭންޑްބޯޅަ ކުރިއެރުވުމަށް މިދާއިރާ އިން ޓެކްނިކަލް މީހުން ބިނާކުރުމަށް ހޭންޑްބޯޅަ އެސޯސިއޭޝަނުން ވަރަށް ބޮޑު އިސްކަމެއްދީގެން މަސައްކަތް ކުރަމުން އަންނަކަމަށެވެ.

މި ޓްރޭނިންގ ޕްރޮގްރާމުގައި ރާއްޖެއިން ބައިވެރިވި އަޒްހަމްއަކީ 2019 ވަނަ އަހަރުން ފެށިގެން އިންޓަނޭޝަނަލް ހޭންޑްބޯލް ފެޑަރޭޝަން (އައިއެޗްއެފް) ގެ ސަޓިފައިޑް ބީ ލައިސަންސް ކޯޗެއްގެ ގޮތުގައި މަސައްކަތް ކުރަމުން އަންނަ ފަރާތެކެވެ. އަދި މީގެ އިތުރުން އަޒުހަމް ވަނީ 2017 ވަނަ އަހަރު ގައުމީ ޖޫނިއާ ޓީމުތަކާ އެކު މަސައްކަތް ކުރުމުގެ އިތުރުން، 2023 ވަނަ އަހަރު އައިއެޗްއެފްގެ މުބާރާތުގެ 19 އަހަރާއި 17 އަހަރުން ދަށުގެ ޓީމު ލޯ މެޑަލް ހޯދިއިރު އެ ދެޓީމުގެ ކޯޗިން ޓީމުގައިވެސް ހިމެނިފައެވެ.