މާލެ ސިޓީގައި އިމާމުވެ ހުކުރު ނަމާދުކުރާ މީހުންގެ ދަފްތަރު އެކުލަވާލުމުގެ ގޮތުން އިންޓަވިއުތަކެއް ބޭއްވުމަށް އިސްލާމީ ކަންތައްތަކާބެހޭ ވުޒާރާއިން ނިންމައިފިއެވެ.

އެ ވުޒާރާއިން ބުނީ، މާލެ ސިޓީގައި ހުކުރު ނަމާދުކުރާ އިމާމުންގެ ދަފްތަރު އެކުލަވާލުމަށްޓަކައި، އިމާމުންގެ ފެންވަރު ވަޒަންކުރުމަށް އިންޓަވިއުތަކެއް ބޭއްވުމަށް ހަމަޖެހިފައިވާ ކަމަށެވެ. އެއަށްފަހު މާލޭގައި ހުކުރު ކުރުމުގެ ފުރުސަތު ދޭނީ ވުޒާރާއިން ކަނޑައަޅާ އިމާމުންނަށްކަމަށް ވެސް އެ ވުޒާރާއިން ހާމަކުރެއެވެ.

އިސްލާމީ ކަންތައްތަކާއި ބެހޭ ވުޒާރާއިން ބުނީ، މި އިންޓަވިއުގައި ބައިވެރިވާނެ ބޭނުންވާ އިމާމުންނަށް މިމަހުގެ 15 ވަނަ ދުވަހުގެ ކުރިން ފުރުސަތު ހުޅުވާލާފައިވާ ކަމަށާއި، އިންޓަވިއުގައި ބައިވެރިވުމަށް ހުށައަޅަންޖެހޭ ގޫގުލް ފޯމު އިސްލާމީ ކަންތައްތަކާބެހޭ ވުޒާރާގެ ވެބްސައިޓުން ލިބޭނެކަމަށެވެ.

Advertisement

މާލޭ ސިޓީގެ މިސްކިތްތަކުގައި ހުކުރު ޚުޠުބާ އިއްވާ ފަރާތްތަކުގެ ދަފްތަރު މުރާޖަޢާކޮށް އަލުން އެކުލަވާލަން ނިންމާފައި މިވަނީ ޚުޠުބާ އިއްވުމުގައި ބައެއް އިމާމުން ކުށްކިޔާ ކަމަށް ބުނެ، ބައެއް ފަރާތްތަކުން ކަންބޮޑުވުން ފާޅުކޮށްފައި ވަނިކޮށެވެ.