މާލޭގެ އާންމު ދަތުރުފަތުރުގެ ނިޒާމުގެ ތެރެއިން ދެމުންދާ ބަހުގެ ޚިދުމަތް ފަތިހު 5:00 އިން ފެށިގެން ފޯރުކޮށްދިނުމަށް އެމްޓީސީސީން ނިންމައިފިއެވެ.

މިހާރު ބަހުގެ ދަތުރުތައް ފަށަމުންދަނީ ކޮންމެ ދުވަހަކު ހެނދުނު 6:00 ގައެވެ. އަދި މެންދަމު 12:30 ގައި ދަތުރުތައް ނިންމާލަމުންދެއެވެ.

އެމްޓީސީސީން މަޢުލޫމާތު ދެއްވިގޮތުގައި، ޚިދުމަތް ހޯދާ ފަރާތްތަކުގެ އެދުމުގެ މަތިން ބަހުގެ ދަތުރުތައް ފަށާ ގަޑި އަވަސްކުރުމަށް ނިންމާފައިވަނީއެވެ. މި ބަދަލާއެކު، އަންނަ އާދީއްތަ ދުވަހުން ފެށިގެން ބަހުގެ ޚިދުމަތް ފަތިހު 5:00 އިން ފެށިގެން ލިބެން ފަށާނެކަމަށް އެ ކުންފުނިން ހާމަކުރެއްވިއެވެ.

މާލެއާއި ހުޅުމާލެއާ ދެމެދު މެދުނުކެނޑި ބަހުގެ ޚިދުމަތް ދެމުންދާއިރު، މެންދަމު 12:30 އިން ފެށިގެން ފަތިހު 5:30 އާ ހަމައަށް ގަޑިއިރަކު އެއްފަހަރު ބަސް ދަތުރުތައް ކުރިއަށްދާނެއެވެ.

އާންމު ދަތުރުފަތުރުގެ ނިޒާމު ފަސޭހަކުރުމުގެ މަޤްޞަދުގައި، ސަރުކާރުން މާލޭގައި މިނީ ބަހުގެ ޚިދުމަތް ތަޢާރަފުކުރީ 2022 ވަނަ އަހަރުގެ ސެޕްޓެންބަރު 5 ވަނަ ދުވަހުއެވެ.

މި ޚިދުމަތް ފެށުމާއެކު، އޭގެ ބޭނުންހިފާ ފަރާތްތަކުގެ އަދަދު ވަނީ މިހާރު ވަރަށްބޮޑަށް އިތުރުވެފައެވެ.