ޔުއެފާ ނެޝަނަލް ލީގުގައި ބުރާސްފަތި ދުވަހުގެ ރޭ އަމިއްލަ ދަނޑުގައި ކްރޮއޭޝިއާއި އަތުން 2-1 ގެ ނަތީޖާއަކުން ޕޯޗުގަލް މޮޅުވި މެޗުގައި އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ކާމިޔާބުކުރި ލަނޑާއެކު ކެރިއަރުގައި 900 ލަނޑު ކާމިޔާބުކުރި ފުރަތަމަ ކުޅުންތެރިއާގެ ޝަރަފު ރޮނާލްޑޯއަށް ލިބިއްޖެއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިމެޗުގައި ފުރަތަމަ ލަނޑުޖަހައި ކުރިހޯދީ ޕޯޗުގަލް އިންނެވެ. މިލަނޑު ފުރަތަމަ ހާފު ފެށިފެން ހަތް ވަނަ މިނެޓުގައި ކާމިޔާބުކޮށްދިނީ ޑިފެންޑަރު ޑިއޭގޯ ޑަލަޓް އެވެ. މިއީ އެޓީމުގެ މިޑްފީލްޑަރު ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޕޯޗުގަލް އިން ލީޑު ފުޅާކުރި ލަނޑު ފުރަތަމަ ހާފުގެ 34 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ ޕޯޗުގަލް ގައުމީ ޓީމަށް އޭނާ ކާމިޔާބުކޮށްދިން 131 ވަނަ ލަނޑެވެ.

ކްރޮއޭޝިއާ އިން ނަތީޖާގެ ފަރަގު ކުޑަކުރި ލަނޑަކީ ފުރަތަމަ ހާފުގެ 41 ވަނަ މިނެޓުގައި ޕޯޗިގަލްގެ ޑިފެންޑަރު ޑަލަޓް އަތުން ބައިކޮޅަށް ވަން ލަނޑެކެވެ. އަދި މީގެ އިތުރުން ވެސް މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

ޔުއެފާ ނެޝަނަލް ލީގުގައި ބުރާސްފަތި ދުވަހުގެ ރޭ ކުޅެވުނު އިތުރު މެޗުތަކަށް ބަލާއިރު، އިތުރުވަގުތެ ތެރޭގައި ކާމިޔާބުކުރި ޕެނަލްޓީއާއެކު 3-2 ގެ ނަތީޖާއަކުން ސްކޮޓްލޭންޑް އަތުން ޕޮލެންޑް މޮޅުވިއިރު، ޑެންމާކުން ވަނީ،ނުވަ ކުޅުންތެރިންނާއެކު ކުޅުނު ސްވިޒަލޭންޑް 2-0 ގެ ނަތީޖާއަކުން ބަލިކޮށްފައެވެ. އަދި އެންމެ ފަހުގެ ޔޫރޯ ކާމިޔާބުކުރި ސްޕެއިން އާއި ސާބިއާ ވާދަކުރި މެޗު ނިމުނީ ދެޓީމުންކުރެ ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްޗަރުވެފައި އޮވެގެންނެވެ.