އަހަރެމެންނަށް ނޭނގި އަހަރެމެން ހީވެސް ނުކުރާ ފަދަ ގޮތްގޮތަށް ޝިރުކުކުރެވޭ ކަމަށް މިއަދުގެ ޚުތުބާގައި ބުނެފިއެވެ.
”ޝިރުކުކުރުމުން ދުރުހެލިވާށެވެ!“ މައުލޫއަށް މިއަދު އިއްވި ޚުތުބާގައި ބުނި ގޮތުގައި އިންސާނާ ކުރާ އެންމެ ބޮޑު ފާފައަކީ އޭނާ ހައްދަވައި ބޮޑުކުރެއްވި الله އަށް ޝަރީކު ކުރުމެވެ. މިކަމަކީ الله ފޮނުއްވި ހުރިހާ ރަސޫލުންވެސް މަނާކުރެއްވި ކަމެއްކަން ޚަތީބު ފާހަގަކުރެއްވިއެވެ.
"ބައެއް މީހުން ޝިރުކު ކުރަނީ الله އާއި އެމީހުންނާ ދެމެދު ގުޅުން ބެހެއްޓުމަށް ވަސީލަތެއްގެ ގޮތުގައެވެ. އަނެއްބައި މީހުން ޝިރުކު ކުރަނީ الله ގެ މަޚްލޫޤުންނަށް އިލާހީ ބާރުތަކެއް ނިސްބަތްކޮށްގެންނެވެ. މިއީ ދޮގު ދަޢުވާތަކެކެވެ،" ޚަތީބު ވިދާޅުވިއެވެ.
ޚުތުބާގައި އިތުރަށް ވިދާޅުވި ގޮތުގައި މަރުވުމުގެ ކުރިން ތައުބާ ނުވާނަމަ الله ނުފުއްސަވާނެ ހަމައެކަނި ފާފައަކީ ޝިރުކެވެ. އަދި ހެޔޮ ޢަމަލުތައް الله ޤަބޫލުކުރެއްވުމަށް ދެ ޝަރުތެއް ފުރިހަމަވާންޖެހޭ ކަމަށާއި، އޭގެ ތެރެއިން އެއް ޝަރުތަކީ الله އަށް އިޚްލާޞްތެރިވުން ކަމަށް ޚަތީބު ވިދާޅުވިއެވެ.
ކީރިތި ޤުރްއާނާއި ކީރިތި ރަސޫލާ ޞއވ ޙަދީޘްފުޅުތަކުގެ މައްޗަށް ބުރަވެ ޢިލްމުވެރީން އެއްބަސްވެ ވަޑައިގެންފައިވަނީ، ކުރާ ހެޔޮ ޢަމަލުތައް ޤަބޫލުކުރެއްވުމުގައި ދެ ޝަރުޠެއް ފުރިހަމަވާން ޖެހޭކަމަށެވެ. އެ ދެ ޝަރުޠު ފުރިހަމަ ނުވާކަމުގައި ވަނީ ނަމަ އެ ޢަމަލެއް ޤަބޫލު ނުކުރެއްވޭނެ ކަމަށެވެ. ފުރަތަމަ ޝަރުޠަކީ، ނިޔަތް الله سبحانه وتعالىއަށް ޚާލިޞްކުރުމެވެ. އެހެން ޢިބާރާތަކުން ބުނާ ނަމަ މާތް ﷲއަށް އިޚުލާޞްތެރިވުމެވެ. އެކަމުގައި އެއްވެސް ކަހަލަ ކަންދެއްކުމެއް އަމިއްލަ އެދުމެއް ނެތުމެވެ. ދެވަނަ ޝަރުޠަކީ، އެ ކަމަކީ ޝަރުޢީ ދަލީލަކުން ޘާބިތުވާ ކަމަކަށްވުމެވެ. މީހަކު ކުރާ ޢަމަލެއްގައި ޝަރީކުކުރުމާއި، ކަންދެއްކުމާއި، އަދި އެނޫން ވެސް އެފަދަ އެހެން ކަންތައް ވާ ނަމަ އެ ޢަމަލެއް الله سبحانه وتعالى ޤަބޫލުނުކުރައްވާނެ
މިއާއެކު ޚުތުބާގައި ބުނީ، ޝިރުކުކުރުމަކީ ހަމަ އެކަނި ބުދަށް އަޅުކަންކުރުމެއް ނޫނެވެ. އަދި އެ ނޫން ވެސް އެފަދަ ތަކެއްޗަށް ސަޖިދަކުރުމެއް ވެސް ނޫން ކަމަށާ އަހަރެމެންނަށް ނޭނގި އަހަރެމެން ހީވެސް ނުކުރާ ފަދަ ގޮތްގޮތަށް ޝިރުކުކުރެވޭ ކަމަށެވެ.
“އަންނަނިވި ޙަދީޘުން މި ކަން ވަރަށް ރަނގަޅަށް ސާބިތުވެއެވެ. ޢަދިއްޔު ބުން ޙާތިމުގެ އަރިހުން ރިވާވެގެންވާ ޙަދީޘް ބަސްފުޅެއްގެ މާނައިގައި ވެއެވެ. ރަން ޞަލީބެއް އަޅައިގެން އަހުރެން ނަބިއްޔާ ސޢވ އަރިހަށް އައީމެވެ. އެހިނދު އެކަލޭގެފާނު ޙަދީޘްކުރެއްވިއެވެ. އޭ ޢަދިއްޔުއެވެ! އަޅުކަންކުރުމަށް ބޭނުންކުރެވޭ ތިޔަ ޞަލީބު އެއްލައިލާށެވެ! އެއަށް ފަހު އެކަލޭގެފާނު ކިޔަވައިވިދާޅުވި އާޔަތުގެ މާނާގައި ވެއެވެ.
”މާނައީ: "އެއުރެންގެ ޢިލްމުވެރިންނާއި، ފާދިރީންނަކީ الله ފިޔަވައި އިލާހުންކަމުގައި އެއުރެން ހެދޫއެވެ." ތިމަން ދެންނެވީމެވެ. اللع ރަސޫލާއެވެ! މީސްތަކުންއެބައިމީހުންނަކަށް އަޅުކަމެއް ނުކުރެއެވެ. ރަސޫލުالله ސއވ ޙަދީޘްކުރެއްވިއެވެ. "ރަނގަޅެވެ. އެހެންނަމަވެސް الله سبحانه وتعالى ޙަރާމްކުރައްވައިފައިވާ ކަންތައްތައް އެ މީހުންޙަލާލުކޮށްދެއެވެ. ދެން ފަހެ، މީސްތަކުން ވެސް އެ ކަންކަން ޙަލާލުކަމުގައި ބަލައިގަނެއެވެ.އަދި الله سبحانه وتعالى ޙަލާލު ކުރައްވައިފައިވާ ކަންތައްތައް، އެ މީހުން ޙަރާމްކުރެއެވެ. ދެން ފަހެ، މީސްތަކުން ވެސް އެ ކަންކަން ޙަރާމުކަމުގައި ބަލައިގަނެއެވެ. ފަހެ، އެއީ އެމީހުންނަށް އަޅުކަންކުރުމެވެ."
މިއާއެކު ޚުތުބާގައި މުސްލިމުންނަށް ގޮވާލެއްވީ ޝިރުކުގެ ހުރިހާ ބާވަތަކުން ދުރުހެލިވެ، الله އަށް އިޚްލާޞްތެރިވުމަށެވެ. އަދި ޝިރުކުގެ ނުރައްކާތެރިކަމާމެދު ހޭލުންތެރިވުމަށެވެ.
Advertisement
This content is created and paid for by advertisers and does not involve Voice Journalists
