އައި.ޖީ.އެމް.އެޗް ކައިރިން ފިރިހެނަކު ހުއްޓުވާ، އޭނާ ކޮޓަރިއަކަށް ގެންގޮސް ފޭރިގަތުމުގެ މައްސަލައެއްގައި 27 އަހަރުގެ ދިވެހި އަންހެނަކު ހައްޔަރުކޮށްފިއެވެ.

ފުލުހުން އާންމުކޮށްފައިވާ ގޮތުގައި ހައްޔަރުކޮށްފައިވަނީ އައްޑޫ ސިޓީ، ސ. މަރަދޫ، ކުންނާރުގެ، އުމުރުން 27 އަހަރުގެ އާއިޝަތު މަލްޖާ މޫސާ ދީދީއެވެ.

ފުލުހުން ބުނެފައިވާ ގޮތުގައި، މި ހާދިސާ ހިނގާފައިވަނީ 26 އޯގަސްޓް 2024 ވަނަ ދުވަހުގެ ރޭ 21:30 ހާއިރުއެވެ.

އެގޮތުން އައި.ޖީ.އެމް.އެޗް ކައިރިން ފިރިހެނަކު ހުއްޓުވާ، އޭނާއަށް ކޮޓަރިއަކަށް ދިއުމަށް ދަޢުވަތު ދިނުމަށްފަހު، މާފަންނު މުރަނގަ މަގުގައި ހުރި ގެސްޓްހައުސްއަކަށް ގެންގޮސް އިތުރު ފިރިހެނަކާ ބައިވެރިވެގެން ދިވެހި ފިރިހެނަކު ރަހީނުކޮށް އޭނާގެ ފޯނާއި ކޭޝް ކާޑު އަތުލާ އޭނާގެ އެކައުންޓުން 53,000 ހާސް ރުފިޔާ ފޭރިގަނެފައިވާ ކަމަށް ފުލުހުން ބުންޏެވެ. 

އަދި މި މައްސަލައިގެ ތުހުމަތުގައި ހައްޔަރުކުރެވުނު 27 އަހަރުގެ ދިވެހި އަންހެނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް ގާޒީ ވަނީ އަމުރުކޮށްފައިވާ ކަމަށްވެސް ބުންޏެވެ.

ފުލުހުން މިހާރު ދަނީ މި މައްސަލަ ތަޙުޤީޤުކުރަމުންނެވެ.