އޭޝިއާ އަށް މިއަހަރު އައި އެންމެ ބާރުގަދަ ތޫފާންކަމަށްވާ ޔާގީ ގެ އަސަރު ފިލިޕީންސް އާއި ޗައިނާގެ އިތުރުން ވިއެޓްނާމަށް ވެސް ކުރަން ފަށައިފިއެވެ.

މި ތޫފާން ހުކުރު ދުވަހު ޗައިނާގެ ހައިނާން އަށް އަރާފައިވާއިރު، މިކަމުގެ ސަބަބުން ގަދަ ވައި އަދި ބޯކޮށް ވާރޭވެހި، އެ ސަރަހައްދުން ކަރަންޓު ކެނޑި، ފަތުރުވެރިކަމަށް މަޝްހޫރު ހައިނާންގެ ފަތުރުވެރިކަން ހުއްޓުމަކަށް އައިސް، ގާތްގަނޑަކަށް އެއް މިލިއަން މީހުން ވަނީ ވަގުތީ ހިޔާތަކަށް ބަދަލުކޮށްފައެވެ.

ގަޑިއަކު 234 ކިލޯމީޓަރުގެ ބާރުމިނުގައި ވައިޖެހޭ މި ތޫފާނަކީ ކެޓަގަރީ-5 އެޓްލާންޓިކް ހަރިކޭން ބެރިލްއަށް ފަހު މިއަހަރު ދުނިޔޭގައި ދެވަނައަށް އެންމެ ވަރުގަދަ ޓްރޮޕިކަލް ސައިކްލޯންއެވެ. އަދި މިއީ 4 ވަނަ އަހަރު ޕެސިފިކް ސަރަޙައްދަށް އައި އެންމެ ވަރުގަދަ ތޫފާނެވެ.

މިތޫފާނުގެ އަސަރު މިހަފްތާގެ ކުރީކޮޅު ފިލިޕީީންސްގެ އުތުރަށް ކުރުމުގެ ސަބަބުން އެ ސަރަހައްދުން 16 މީހުން މަރުވެފައިވާއިރު، ތޫފާން ޗައިނާގެ ހައިނާން އަށް އެރިއިރު، އޭގެ ބާރު ވަނީ ދެ ގުނައަށް އިތުރުވެފައެވެ.

ޓައިފޫނުގެ ސަބަބުން މިހާރުވެސް ހޮންގ ކޮންގ، މަކާއޯ އަދި ގުއަންގްޑޮންގ ޕްރޮވިންސްގެ ސްކޫލްތަކާއި، ވިޔަފާރިތަކާއި އަދި ދަތުރުފަތުރުގެ ވަސީލަތްތައް ވަނީ ބަންދުކޮށްފައެވެ. އަދި ހަމައެހެންމެ، މި ތޫފާނުގެ އަސަރު މި ހަފްތާގެ ތެރޭގައި ކުރާނެކަމަށް ލަފާކުރެވޭ ވިއެޓްނާމް އަދި ލާއޯސްގެ ވައިގެ ބަނދަރުތައްވެސް ބަންދުކޮށްފައިވާކަން ފާހަގަކޮށލަން ޖެހެއެވެ.

ހުކުރު ދުވަހުގެ ރޭ، ޔާގީ ގުއަންގްޑޮންގްއަށް ދެވަނަ ފަހަރަށް އަރާފައިވާއިރު، މި ވަގުތުވެސް ވައިގެ ބާރުމިން ގަޑިއަކު 200 ކިލޯމީޓަރަށްވުރެ މަތިކަމަށް ނޫސްތަކުން ރިޕޯޓްކުރެއެވެ. 

ޔާގީގެ ސަބަބުން ޗައިނާ އަށް ލިބިފައިވާ ގެއްލުންތައް-- ފޮޓޯ: ޑީޑަބްލިއު

ޔާގީ އަކީ 2014 ގައި ޓައިފޫން ރަމަސޫން ހައިނާން އަށް އެރި ފަހުން، އެ ޕްރޮވިންސްއަށް އެރި އެންމެ ވަރުގަދަ ތޫފާނެވެ. ރަމަސޫން އެރީ ކެޓަގަރީ-5 ގެ ޓްރޮޕިކަލް ސައިކްލޯނެއްގެ ގޮތުގައެވެ. ރަމަސޫންގެ ސަބަބުން ހައިނާން، ގުއަންގްދޯންގް، ގުއަންގްޒީ އަދި ޔުނާންގައި 88 މީހުން މަރުވި އަދި 44 ބިލިއަން ޔުއާން (6.25 ބިލިއަން އެމެރިކާ ޑޮލަރު) އަށްވުރެ ގިނަ އަދަދެއްގެ އިޤްތިޞާދީ ގެއްލުން ލިބުނެވެ.

ފިލިޕީންސްގެ އިރުމަތީގައިވާ ކަނޑުގައި އުފެދި، ރަމަސޫންއާއި ދާދި އެއްގޮތަކަށް ޗައިނާއަށް އައި ޔާގީ އެރީ ކެޓަގަރީ-4 ގެ ޓައިފޫނެއްގެ ގޮތުގައެވެ. އެހެންނަމަވެސް، މިހާތަނަށް ހައިނާންގައި އެއްވެސް މަރެއް ރިޕޯޓުކުރެވިފައެއް ނުވެއެވެ.

ސައިންސްވެރިން ބުނާ ގޮތުގައި މޫސުމަށް އަންނަ ބަދަލުތަކާ ގުޅިގެން ކަނޑުތައް ހޫނުވަމުން ދިއުއުމުގެ ސަބަބުން ތޫފާންތައް އަންނަނީ އިތުރުވަމުންނެވެ. މިގޮތުން، ފާއިތުވި ހަފްތާގައި ތޫފާން ޝަންޝަން ޖަޕާނުގެ ދެކުނު-ހުޅަނގަށް އަރާފައިވާއިރު، މިއީ ވަރަށް ގިނަ އަހަރުތަކަކަށް ފަހު އެ ޤައުމަށް އެރި އެންމެ ބާރުގަދަ ތޫފާނެވެ.