ރަޝިޔާއިން ދެމުންދާ ނިއުކްލިއަރ އިންޒާރުތަކަށް ބިރުގަންނާކަށް ނުޖެހޭ ކަމުގައި ސީއައިއޭގެ ވެރިޔާ ވިދާޅުވެއްޖެއެވެ.

އެމެރިކާގެ ސެންޓްރަލް އިންޓެލިޖެންސް އޭޖެންސީ (ސީއައިއޭ) ގެ ވެރިޔާ ބިލް ބާރންސް ވިދާޅުވެފައިވަނީ ހަނގުރާމަ އިތުރަށް ގޯސްވެދާނެކަމުގެ ބިރަށްޓަކައި ރަޝިޔާގެ އިންޒާރުތަކަށް ހުޅަނގުގެ ލީޑަރުން ބިރުގަންނަން ނުޖެހޭނެ ކަމަށެވެ. މި ވާހަކަ އޭނާ ވިދާޅުވެފައިވަނީ އެންގްލޯ-ފްރެންޗް ސްޓޯމް ޝެޑޯ މިސައިލްތައް ރަޝިޔާގެ އެތެރޭގައި ބޭނުންކުރުމާމެދު ބަހުސްކުރެވެމުންދާ ދަނޑިވަޅެއްގައެވެ.

އެމްއައި6ގެ އިސްވެރިންނާއެކު ލަންޑަނަށް ކުރެއްވި ދަތުރުފުޅެއްގައި ބާރންސް ވިދާޅުވީ ރަޝިޔާގެ ރައީސް ވްލަޑިމިރް ޕުޓިންއަކީ "ބުލީއެއް" ކަމަށާއި، އޭނާގެ "ސޭބަރ ރެޓްލިންގ" އަށް އަބަދުވެސް އެހާ ސީރިއަސްކޮށް ނުބަލަންވީ ކަމަށެވެ. 2022 ވަނަ އަހަރުގެ ފަހުކޮޅު ރަޝިޔާއިން ދިން ނިއުކްލިއަރ އިންޒާރަކަށް އެމެރިކާއިން އަހަންމިއްޔަތުކަމެއް ނުދިން ކަމަށް ވެސް ބާރންސް ވިދާޅުވިއެވެ.

ބާރންސް އިތުރަށް ވިދާޅުވެފައިވަނީ 2022 ވަނަ އަހަރުގެ ފަހުކޮޅު ޔުކްރެއިންގެ ހަނގުރާމައިގައި ރަޝިޔާއިން އެކްޓިކަލް ނިއުކްލިއަރ ހަތިޔާރު ބޭނުންކުރުމުގެ ނުރައްކާ އޮތް ކަމަށް ސީއައިއޭއިން ގަބޫލުކުރި ކަމަށެވެ. ނަމަވެސް، މިފަދަ އިންޒާރުތަކަށް އެހާ ބޮޑު އަހަންމިއްޔަތުކަމެއް ދޭކަށް ނުޖެހޭ ކަމަށް ބާރންސް ވިދާޅުވިއެވެ.

ރަޝިޔާގެ އިންޓެލިޖެންސް ސަރވިސްގެ ވެރިޔާ ސަރގޭ ނަރިޝްކިންއާ 2022 ވަނަ އަހަރުގެ ނޮވެމްބަރު މަހު ބައްދަލުކޮށް، އެމެރިކާގެ ރައީސް ޖޯ ބައިޑެންގެ ފަރާތުން ސީދާ އިންޒާރެއް ދިން ކަމަށް ވެސް ބާރންސް ވިދާޅުވިއެވެ. އޭރު ރަޝިޔާގެ ސިފައިން ޔުކްރެއިންގެ އުތުރާއި ދެކުނުން ފަހަތަށް ޖެހެމުންދިޔައެވެ.

މި ވަގުތު، ސްޓޯމް ޝެޑޯ ފަދަ ދުރަށް ދަތުރުކުރާ މިސައިލްތައް ރަޝިޔާގެ އެތެރޭގައި ބޭނުންކުރުމުގެ ހުއްދަ ދިނުމާމެދު ވޮޝިންގްޓަން އަދި އެހެނިހެން ހުޅަނގުގެ ވެރިރަށްތަކުގައި ޚިޔާލުތަފާތުވުން އޮތް ކަމަށް ބާރންސް ވިދާޅުވިއެވެ. މިއީ ޔުކްރެއިންގެ ރައީސް ވޮލޮޑިމިރް ޒެލެންސްކީ ތަކުރާރުކޮށް އެދެމުންދާ ކަމެކެވެ.