މިއަހަރުގެ ޖުލައި މަހުގެ 31 ވަނަ ދުވަހު އީރާނުގައި ހުންނަވަނިކޮށް، ޔަހޫދީން ހަމަލާދީ އަވަހާރަކޮށްލި ހަމާސްގެ ކުރީގެ ސިޔާސީ ލީޑަރު އިސްމާޢީލް ހަނިއްޔާއާ ދެކޮޅަށް އުފުލާފައިވާ މައްސަލަ އިންޓަނޭޝަނަލް ކްރިމިނަލް ކޯޓް (އައިސީސީ) އިން ބޭރުކޮށްލައިފިއެވެ.
ހަނިއްޔާއާއި ހަމާސްގެ އެހެން އިސް އޮފިޝަލުންނާއި، އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނެތަންޔާހޫ އަދި ދިފާޢީ ވަޒީރު ޔޯވް ގަލަންޓްގެ ހައްޔަރުކުރުމަށް ކޯޓުގައި އެދިފައިވަނީ އައި.ސީ.ސީގެ ޕްރޮސެކިއުޓަރ ކަރީމް ޚާންއެވެ.
އެހެެންނަމަވެސް، އައި.ސީ.ސީން ނެރުނު ބަޔާނެއްގައި ބުނީ، ހަނިއްޔާގެ އަވަހާރަވުމުގެ ސަބަބުންހަނިއްޔާއާ ދެކޮޅަށް ހުށަހަޅާފައިވާ ދައުވާތައް ޕްރޮސެކިއުޓަރ ޚާން އަނބުރާ ގެންގޮސްފައިވާ ކަމަށެވެ.
އައި.ސީ.ސީން މިފަދައިން އިއުލާނު ކުރި ނަމަވެސް، ޣައްޒާގެ މުސްލިމުންނާއި ދެކޮޅަށް ލާއިންސާނީ އުދުވާންތައް ހިންގަމުންދާ ނެތަންޔާހޫ އަދި ގަލަންޓް ހައްޔަރުކުރުމަށް ޕްރޮސެކިއުޓަރ ޚާން ހުށަހަޅާފައިވާ އެޕްލިކޭޝަން އެ ކޯޓުން ދަނީ ދިރާސާކުރަމުންނެވެ.
އަނިޔާވެރިކަން ހައްދުފަހަނަ އަޅާފައިވާ ނަތަންޔާހޫ އާއި ގަލަންޓްގެ މައްޗަށް އައި.ސީ.ސީން ވަނީ ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތައް ކުރި ކަމަށާއި، މީގެ ތެރޭގައި އާންމު ރައްޔިތުން ބަނޑަށް ޖެއްސުން، ލޭއޮހޮރުވުން އަދި ގަސްތުގައި އާންމު ރައްޔިތުންނަށް ހަމަލާ ދިނުން ހިމެނޭ ކަމަށް ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
