މާފަންނު ބޮޑުތަކުރުފާނުމަގު އެމްޓީސީސީ މައި ބަސްޓާމިނަލް ކައިރި މިރޭ، ދެ ސައިކަލް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުން ބުނީ ދެ ސައިކަލް ޖެހި އެކްސިޑެންޓް ހިނގި ސަރަހައްދުގައި ފުލުހުން ހަރަކާތްތެރިވަމުން ދާކަމަށެވެ. މި އެކްސިޑެންޓްގައި އަނިޔާވި މީހާ އައިޖީއެމް ހޮސްޕިޓަލަށް ގެންގޮސްފައިވާކަމަށް ފުލުހުން ބުނެއެވެ.

އޭނާއަށް ލިބުނީ ކިހާވަރެއްގެ އަނިޔާއެއްކަމެއް އަދި ސާފެއް ނުވެއެވެ. މިދުވަސްވަރު މާލެ އަދި ހުޅުމާލޭގައި އެކްސިޑެންޓްތައް ހިނގާލެއް ގިނައިރު، މިފަހުން މިހާތަނަށް ހިނގާފައިވާ ގިނަ އެކްސިޑެންޓްތައް ވަރަށް ނުރައްކާތެރިއެވެ. އެގޮތުން މިފަހުން ހިނގި ދެ އެކްސިޑެންޓުގައި ލިބުނު އަނިޔާތަކާ ގުޅިގެން، ދެ ޒުވާނަކު ވަނީ ނިޔާވެފައެވެ.

މީގެތެރެއިން މިދިޔަ ބުދަ ދުވަހުގެ ރޭ 12:53 ހާއިރު، ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީގައި ކާރަކާއި ސައިލެއް ޖެހިގެން ހިނގި އެކްސިޑެންޓްގައި ސައިކަލުގައި އިން ގދ. ގައްދޫއަށް ނިސްބަތްވާ އެރަށު ޖުޕިޓާ، އުމުރުން 21 އަހަރުގެ އަހުމަދު ލީވާން ނިޔާވީ ރޭގެ ވަގުތެއްގައެވެ. އެ ޒުވާނާ ދުނިޔެ ދޫކުރީ ވެންޓިލޭޓަރުގަ އޮވެއެވެ.

އަދި ހުކުރު ދުވަހު ހުޅުމާލޭގައި ކާރަކާއި ސައިކަލެއް ޖެހި ހިނގި އެކްސިޑެންޓްގައި އަނިޔާވި ހަސަން ސިމާހް ވަނީ ހަމަ އެދުވަހު ނިޔާވެފައެވެ.

ފުލުހުންގެ ތަފާސްހިސާބުތައް ދައްކާގޮތުގައި މިއަހަރުގެ މިހާތަނަށް ޖުމްލަ 1،907 އަށްވުރެ ގިނަ އެކްސިޑެންޓްތައް ވަނީ ހިނގާފައެވެ. މީގެ ތެރެއިން ގިނަ އެކްސިޑެންޓްތައް ހިނގާފައިވަނީ މާލެ އަދި ހުޅުމާލޭގައެވެ. މި ސަރަހައްދުތަކުގައި 1،171 އެކްސިޑެންޓް ހިނގާފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.