ދިވެހި ސިނަމާއަށް އަންނަން ހުރި ފިލްމުތަކުގެ ތެރެއިން މިހާރު ބެލުންތެރިން އިންތިޒާރުކުރަމުންދާ އެއް ފިލްމަކީ، "ރޮބޯމޭން – ދަ މޫވީ" އެވެ. ސިނަމާއަށް އަންނަ އެހެން ފިލްމުތަކާ ހިލާފަށް މި ފިލްމަކީ ކުދި ބޮޑު އެންމެނަށްވެސް ހާއްސަ ފިލްމެކެވެ. ރޮބޯމޭން އަކީ މިހާރު ދިވެހިންގެ ތެރޭގައި ވަރަށް ހާއްސަ ލޯތްބެއް ދެވިފައިވާ ކެރެކްޓާއެކެވެ. ކުޑަކުދިންގެ އިތުރުން ބޮޑެތި މީހުންގެ މެދުގައިވެސް ރޮބޯމޭން ކެރެކްޓާއަށް އޮންނަ ތާއީދު ހަމަ ވަރަށް ބޮޑެވެ.

"ރޮބޯމޭން – ދަ މޫވީ" މި ފިލްމު ވެގެންދާނީ އާއިލާގެ އެންމެން އެއްތަނަކު ތިބެގެން ބަލާލެވޭނެ ފިލްމަކަށެވެ. މި ފިލްމު ހާއްސަ ވެގެންދާ އެއް ސަބަބަކީވެސް މިއެވެ. ކުދިވެރިންނާއެކު އެއްތަނަކު ތިބެ، ބަލާލަންކެރޭފަދަ ދިވެހި ފިލްމެއް މިފަހުން ދިވެހި ސިނަމާއަށް އައިދުވަސް ހަނދާނެއް ނެތެވެ.

"ރޮބޯމޭން – ދަ މޫވީ" މި ފިލްމުގެ ޓިކެޓް ވިއްކަން ފަށާފައިވާއިރު، ފިލްމް ޕްރިމިއާ ކުރުމަށް ހަމަޖެހިފައިވަނީ، މިހިނގާ ސެޕްޓޭމްބަރުމަހުގެ 26 ވަނަ ދުވަހުއެވެ. ރޯބޯ މޭން ދަ މޫވީ ޕްރިމިއާ ކުރާ ދުވަހަށް ބެލުންތެރިންގެ ޑިމާންޑް ބޮޑުވުމާއެކު، އެންމެފަހުން މި ފިލްމު ޕްރޮޑަކްޝަން ޓީމުން މިހާރު ވަނީ ޕްރިމިއާ ޑޭގައި ދެ ޝޯ ބޭއްވުމަށް ނިންމާފައެވެ.

Advertisement

ރޮބޯމޭން ދަ މޫވީ، ޕްރިމިއާ ޑޭގެ ފުރަތަމަ ޝޯ ބޭއްވުމަށް ތާވަލުކޮށްފައިވަނީ، ސްކޫލްތަކުގެ މިޑްޓާމް ބަންދާ ދިމާކޮށް މިމަހުގެ 26 ވަނަ ދުވަހުގެ 14:00 އަދި 16:00 ގައެވެ. ރޮބޯމޭން ޕްރިމިއާ ކުރާ ދުވަހުން ފެށިގެން ޖެހިގެން އަންނަ އޮކްޓޯބަރުމަހުގެ 5 ވަނަ ދުވަހާ ހަމަޔަށް ކޮންމެ ދުވަހަކު ދެ ޝޯ ކުރިއަށްގެންދިއުމަށް ވަނީ ނިންމާފައެވެ.

ރޮބޯމޭން..

"ރޮބޯމޭން – ދަ މޫވީ"  އުފައްދައި ޕްރޮޑިއުސްކުރަނީ، މުހައްމަދު މުންތަސީރް (މުންކޮ)ގެ އޯކޭޒްއިންކުންނެވެ. ޑައިރެކްޓަރަކީ އިބްރާހިމް ވިސާމް (ކަނޑި)  އެވެ. މި ފިލްމުގެ ސްކްރިޕްޓް ލިޔުނީ، މަހުދީ އިމާދެވެ.

"ރޮބޯމޭން – ދަ މޫވީ"  ވެގެންދާނީ މިހާތަނަށް އެންމެގިނަ ކުޑަކުދިންގެ ބައިވެރިވުމާއެކު ހެދި ފިލްމަށެވެ. މި ފިލްމު ގެނެސްދީފައިވަނީ  "ދަ ރޮބޯ ޖޫނިއާ ޗެލެންޖު" ކުޑަކުދިންގެ ޑާންސް މުބާރާތެއްގެ ތެރެއިން ކުރިމަތިވާ އެކި ކަހަލަ ކަންތައްތަކެވެ.

މި ފިލްމުގެ ކާސްޓިންގައި 60 ހަށްވުރެ ގިނަ ކުޑަކުދިން އެކި ބައިތަކުން ފެނިގެންދާއިރު، އެކުދިން ނަގާފައިވަނީ 100 އަށްވުރެ ގިނަ ކުދިން ބައިވެރިވި  އޮޑިޝަނުގެ ތެރެއިންނެވެ.

"ރޮބޯމޭން – ދަ މޫވީ" ގެ މެއިން ކާސްޓުންގެ ގޮތުގައި ފެނިގެންދާނީ، އަމީލިއާ ނަސްރުﷲ އާއި މިޝާ އިސްމާއިލެވެ. ފިލްމުގައި ރޮބޯމޭން ފެނިގެންދާނީ ހަމަ އެ ކެރެކްޓާގެ ގޮތުގައެވެ. ރޮބޯމޭންގެ ޓްރެއިލާ މިހާރު ދައްކާލާފައިވާއިރު، ޓްރެއިލާވެސް އެހާމެ ޝައުގުވެރިއެވެ.

ރޮބޯމޭންއަކީ މިހާރު ކުޑަކުދިންގެ އިތުރުން އެކި އުމުރުފުރާގެ މީހުންގެ މެދުގައި ވަރަށްބޮޑު މަޤްބޫލުކަމެއް ލިބިފައިވާ ކެރެކްޓާއެކެވެ. ހާއްސަ ކޮސްޓިއުމާކާއެކު މޫނުގައި އަޅިކުލައިގެ މާސްކެއް އަޅާފައި ހުންނަ ރޮބޯމޭން ރާއްޖޭގެ އެކި ކަންކޮޅުތަކުގައި ޝޯތައް ދެމުން އަންނައިރު، ރޮބޯމޭންގެ ކެރެކްޓާ ވަނީ ރާއްޖޭގެ އަސްދަނޑިން ބޭރަށް ޔޫރަޕްގެ ޤައުމުތަކުގައިވެސް ޝޯތައް ދީފައެވެ.

ރޮބޯމޭންއަކީ ދިވެއްސަކު އޭނާގެ އަމިއްލަ ހިޔާލަށް ބިނާކޮށް އުފައްދާފައިވާ ކެރެކްޓާއެކެވެ. ހުނަރުވެރި ފަންނުވެރި، މަސައްކަތްތެރި ޒުވާނުން ޤައުމީ ތަރައްޤީއަށް ކުރާ އުފެއްދުންތެރި އީޖާދީ މަސައްކަތުގައި ފާހަގަކޮށްލެވޭ ފަދަ ކާމިޔާބީއެއް ހޯދާފައިވާތީވެ، ރޮބޯމޭންގެ ކެރެކްޓާއަށް ވަނީ ރައީސުލްޖުމްހޫރިއްޔާ ދެއްވާ ޚާއްޞަ އިނާމުވެސް ހާސިލްކޮށްފައެވެ. މިއީ ދިވެއްސަކު އީޖާދުކުރި މިފަދަ ކެރެކްޓާއެއް ރައީސުލްޖުމްހޫރިއްޔާ ދެއްވާ ހާއްސަ އިނާމް ހާސިލްކުރި ފުރަތަމަ ފަހަރެވެ.