ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ ކާލް ސްޓުމްކަ އިއްޔެ އެ މަގާމުން އިސްތިއުފާދެއްވައިފިއެވެ.

ބީއެމްއެލުން މިއަދު ބުނީ، ކާލް ސީއީއޯކަމުން އިސްތިއުފާ ދެއްވީ އިއްޔެ ކަމަށެވެ. ނަމަވެސް މި މަހު 21 ގައި ބާއްވާ ޚާއްސަ އާންމު ޖަލްސާ (އީޖީއެމް)އާ ހަމައަށް އޭނާ އެ މަގާމުގައި ދެމިހުންނަވާނެ ކަމަށެވެ.

އެފަހުން، ބީއެމްއެލަށް އާ ސީއީއޯއެއް އައްޔަންކުރަންދެން ސީއީއޯގެ ޒިންމާތައް އަދާކުރައްވާނީ ޑެޕިއުޓީ ސީއީއޯ ޢާއިޝަތު ނޫރައްދީނެވެ.

Advertisement

ކާލް ސްޓުމްކަ އިސްތިއުފާ ދެއްވާފައިވާއިރު، ބޭންކުން ކާޑް ލިމިޓަށް ގެނަ ބަދަލާއެކު، ގިނަ ބައެއްގެ ނުރުހުން ސަރުކާރަށާއި އެ ބޭންކަށް އަމާޒުވެފައި ވަނިކޮށް، އެދުވަހު، އެމްއެމްއޭގެ އެދުމަށް އެ ނިންމުން ބޭންކުން ބަދަލުކޮށްފައިވާ ކަން ފާހަގަކޮށްލަން ޖެހެއެވެ.

އެފަހުން، ކާޑް ލިމިޓަށް ބަދަލު ގެނެސް ބީއެމްއެލް އިން މަސައްކަތް ކުރީ މާލީ ބަޣާވާތެއް ކުރުމަށް ކަމަށް ސަރުކާރުންނާއި ރައީސް ޑރ މުހައްމަދު މުޢިއްޒުވެސް ތުހުމަތު ކުރެއްވިއެވެ. އަދި ސަރުކާރުން ބޭންކަށް ބޮޑެތި ފާޑުކިޔުންތައްވެސް އަމާޒުކޮށްފައިވެއެވެ.