ސޯސަންމަގުކޮޅުގައި ހުންނަ ހެންވޭރު ދޫހިމެރިގޭ ތިރީބައިގަ ހުންނަ ހޮޓަލުގައި މިއަދު ހިނގި އަލިފާނުގެ ހާދިސާގައި އެ އިމާރާތް ބޭނުން ނުކުރެވޭވަރަށް އަނދައި ބޮޑެތި ގެއްލުންތަކެއް ލިބިއްޖެއެވެ.

މޯލްޑިވްސް ނެޝަނަލް ޑިފެންސްފޯސް (އެމްއެންޑީއެފް) އިން ބުނީ މި ހާދިސާގެ މައުލޫމާތު އެފަރާތަށް ލިބިފައިވަނީ 14:47 ހާއިރުކަމަށެވެ. އަލިފާނުގެ ހާދިސާ ހިނގިކަމުގެ ރިޕޯޓް ލިބުމާއެކު، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން އެސަރަހައްދަށްގޮސް އަލިފާންގަނޑު ނިއްވުމުގެ މަސައްކަތް ފެށިކަމަށް އެމްއެންޑީއެފުން ބުނެއެވެ.

މި ހާދިސާ އާ ގުޅޭގޮތުން އެތަނުގައި ހަރަކާތްތެރިވި ވޮއިސްގެ ރިޕޯޓަރު ބުނެފައިވަނީ ކެފޭގައި އަލިފާންގަނޑު ރޯވިތާ މާ ގިނައިރުތަކެއް ނުވެ މުޅި އިމާރާތުގައި އަލިފާން ހިފިކަމަށެވެ. އަލިފާންގަނޑު ރޯވެ ބޮޑަށް ހުޅުގަނޑު ފަޅައިގެން ގޮސްފައިވަނީ ގޭސްފުޅީގައި ރޯވި ހިސާބުންކަމަށްވެސް ރިޕޯޓަރު ބުންޏެވެ. 

 ހެންވޭރު ދޫހިމެރިގޭގައި ހިނގި އަލިފާނުގެ ހާދިސާގެ ތެރެއިން... ފޮޓޯ/ ވޮއިސް

ހާދިސާ ހިނގުމާއެކު ކުޑަ ވަގުތުކޮޅެއްގެ ތެރޭގައި ރޯވެފައިވާ އިމާރާތާ ޖެހިގެންހުރި ގޭތަކުން ވަނީ މީހުން ހުސްކޮށްފައެވެ.

އަލިފާންގަނޑު ކޮންޓްރޯލްވިއިރު، ކެފޭހުރި އިމާރާތުގެ އިތުރުން ޖެހިގެންހުރި އިމާރާތުގައިވެސް އަލިފާންގަނޑު ހިފިއެވެ. މިހާދިސާގައި ކެފޭގައި ހުރި ހުރިހާ އެއްޗެއް އަނދާފައިވާއިރު، މުޅި އެ އިމާރާތްވަނީ އަލުން ބޭނުން ނުކުރެވޭވަރަށް އަނދާފައެވެ.

މި ހާދިސާގައި ދުމުގެ އަސަރުކޮށްގެން ދެ މީހަކު ހޮސްޕިޓަލަށް ގެންގޮސްފައިވާކަމަށް ފުލުހުން ބުނެއެވެ. އޭގެ ތެރެއިން އެކަކީ ދިވެހި އަންހެނެކެވެ. އަނެއްމީހާއަކީ ބިދޭސީ ފިރިހެނެކެވެ. ދުމުގެ އަސަރު ކުރިއިރު ދެމީހުންވެސް ތިބީ މަގުމަތީގައެވެ.

ނެޝަނަލް ޑިޒާސްޓާ އޮފީހުން ބުނީ އަލިފާނުގެ ހާދިސާއާ ގުޅިގެން 56 މީހަކަށް ރައްކާތެރިކަން ފޯރުކޮށްދޭން ޖެހުނު ކަމަށެވެ. މިހާދިސާގައި މީހަކަށް ސީރިއަސް އަނިޔާތަކެއް ލިބުނުކަމެއް އަދި ނޭނގެއެވެ.