އދ ގެ އިންސާނީ ހައްޤުތަކާއިބެހޭ 57 ވަނަ ސެޝަންގައި ރާއްޖެއިން ބައިވެރިވުމަށް ނިންމައިފިއެވެ.

ޚާރިޖީ ވުޒާރާއިން ނެރުނު ބަޔާނެއްގައި ބުނީ، އިންސާނީ ހައްގުތަކާއި ބެހޭ 57 ވަނަ ސެޝަން މިމަހު 9 އިން 11 އޮކްޓޫބަރާއި ހަމައަށް  ސްވިޓްޒަލޭންޑްގެ ޖެނީވާގައި ކުރިއަށްދާނެ ކަމަށެވެ.

މި ސެޝަންގައި އދ ގެ އިންސާނީ ހައްގުތަކާއި ބެހޭ ކައުންސިލުން ޚާއްޞަ އިޖުރާއަތުތަކުގެ މެންޑޭޓް ހޯލްޑަރުންނާއި، ފަންނީ މެކޭނިޒަމްތަކާއި، ތަޙްޤީޤީ މެކޭނިޒަމްތަކާއެކު ތިރީސް އިންޓަރެކްޓިވް ޑައިލޮގް ބާއްވާނެކަމަށާއި، އޭގެ ތެރެއަށް އިތުރުކުރެވިފައިވާ ދެ އިންޓަރެކްޓިވް ޑައިލޮގްއާއި ހަ ޕެނަލް މަޝްވަރާ ބޭއްވޭނެކަމަށް އެ ވުޒާރާއިން ބުނެއެވެ.

މި މަޝްވަރާތަކުގައި އިންސާނީ ޙައްޤުތަކާ ގުޅޭ މުހިންމު މައްސަލަތަކާ ބެހޭގޮތުން ވަރަށް ފުޅާ ދާއިރާއެއްގައު މަޝްވަރާކުރެވޭނެކަން ފާހަގަކުރަމުން ޚާރިޖީ ވުޒާރާއިން ބުނީ، މި ސެޝަންގައި ފަންސާސް ޤައުމެއްގެ ޙާލަތާ ބެހޭ ރިޕޯޓުތަކާއި އަށްޑިހައަށްވުރެ ގިނަ ތީމެޓިކް ރިޕޯޓު މުރާޖަޢާކުރެވޭނެކަމަށެވެ.

މިއީ ދުނިޔޭގެ އިންސާނީ ޙައްޤުތަކުގެ ގޮންގޮންޖެހުންތަކަށް ޙައްލު ހޯދުމަށާއި، ޢަދުލުވެރި އަދި ހަމަހަމަ ދުނިޔެއަކަށް ބައިނަލްއަޤްވާމީ އެއްބާރުލުން ލިބޭނެ މަގެއްކަން އެ ވުޒާރާއިން ފާހަގަކުރިއެވެ.

އެ ވުޒާރާއިން ބުނީ، މި ސެޝަންގައި، ދިވެހިރާއްޖޭގެ ވަފުދުން އެޖެންޑާގެ އެކި ބައިތަކުގެ ދަށުން ޤައުމީ ބަޔާންތައް ދޭނެކަމަށާއި، މި ބަޔާންތަކުގައި ސަރުކާރުގެ މައިގަނޑު ސިޔާސަތުތަކާއި އިސްކަންދޭ ކަންތައްތައް ފާހަގަކުރެވޭނެކަމަށެވެ. އަދި ޚާއްޞަކޮށް، ދިވެހިރާއްޖެ ހިމެނޭ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) ގެ ފަރާތުން، ސެކްރެޓަރީ ޖެނެރަލްގެ މޫސުމަށް އަންނަ ބަދަލުތަކާ ބެހޭ ތަޙްލީލީ ދިރާސާއާ ގުޅޭ އިންޓަރެކްޓިވް ޑައިލޮގްގައި ބަޔާނެއް ދޭނެކަމަށާއި، މި ބަޔާނުގައި މައިގަނޑު ގޮތެއްގައި އަލިއަޅުވާލާނީ މޫސުމަށް އަންނަ ނޭދެވޭ ބަދަލުތަކުގެ ސަބަބުން ލިބޭ ގެއްލުމާއި އުނިކަމުގެ ސަބަބުން އިންސާނީ ޙައްޤުތައް ފުރިހަމައަށް ބޭނުންހިފުމާއި މެދު ކުރާ އަސަރުތަކަށް ކަމަށެވެ. 

މީގެ އިތުރުން، ނޮން-އެލައިންޑް މޫވްމަންޓް އަދި އިސްލާމިކް ކޯޕަރޭޝަން ޖަމްޢިއްޔާގެ މެންބަރެއްގެ ހައިސިއްޔަތުން، ދުނިޔޭގެ އެކި ކަންކޮޅުތަކުގައި އިންސާނީ ޙައްޤުތަކަށް އަރައިގަތުން އިތުރުވަމުންދާ މިންވަރާމެދު ދިވެހިރާއްޖެއިން ކަންބޮޑުވުން ފާޅުކޮށްފައިވާއިރު، މި ސެޝަންގެ ތެރެއިން ދިވެހިރާއްޖެއިން މި މައްސަލަތަކުގެ ތެރެއިން ބައެއް މައްސަލަތަކަށް އަލިއަޅުވާލާނެކަމަށާއި، މީގެ ތެރޭގައި މިޔަންމާއާ ބެހޭ ޚާއްޞަ ރެޕޯޓަރާއެކު ބޭއްވޭ އިންޓަރެކްޓިވް ޑައިލޮގްގައި ޤައުމީ ބަޔާން އިއްވުމާއި، އެޖެންޑާގެ އެކި ބައިތަކުގައި ފަލަސްޠީނުގެ އިންސާނީ ހާލަތަށް އަލިއަޅުވާލުން ހިމެނޭ ކަމަށް ވެސް ޚާރިޖީ ވުޒާރާއިން ބުނެއެވެ.

އިންސާނީ ޙައްޤުތަކާބެހޭ ކައުންސިލްގެ 57 ވަނަ ޖަލްސާގައި ދިވެހިރާއްޖޭގެ ވަފުދުގެ އިސްވެރިޔަކަށް ހަމަޖައްސާފައިވަނީ އެމްބެސެޑަރ ޑރ. ސަލްމާ ރަޝީދެވެ. މި ވަފުދުގައި ހިމެނެނީ ޖެނީވާގައި ހުންނަ އދ. ގެ އޮފީސްތަކަށް ކަނޑައަޅާފައިވާ ދިވެހިރާއްޖޭގެ ދާއިމީ މިޝަންގެ ކައުންސެލަރ އާދަމް ޙާމިދު، ކައުންސެލަރ އުޒ. އާމިނަތު ޝިފާޔާ އިބްރާހީމް، ދެވަނަ ސެކްރެޓަރީ މަރްޔަމް ފަތިކާ ފައްޔާޟް، ތިންވަނަ ސެކްރެޓަރީ އާމިނަތު ޝަދާ އަދި އެޓާޗޭ ރާއިދު ސަޢީދެވެ.