ސޯސަންމަގުކޮޅުގައި ހުންނަ ހެންވޭރު ދޫހިމެރިގޭ ތިރީބައިގަ ހުންނަ ހޮޓަލުގައި އިއްޔެ ހިނގި އަލިފާނުގެ ހާދިސާ އާއި ގުޅިގެން އެއިމާރާތުގައި ބިދޭސީން ދިރިއުޅެމުން ދިޔަ ތަން ބޭނުން ނުކުރެވޭވަރަށް އަދާފައިވާކަމަށް ނޭޝަނަލް ޑިސާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

"ވޮއިސް" އަށް މައުލޫމާތު ދެއްވަމުން އެންޑީއެމްއޭގެ މީޑިއާ އޮފިޝަލް ވިދާޅުވީ، މި ހާދިސާގައި ހާލުގައި ޖެހުނު ދިވެހިންނާއި ބިދޭސީންގެ ހާލު ރަނގަޅު ކަމަށާއި، އެއްވެސް ބޭފުޅަކަށް ޖިސްމާނީ ގެއްލުމެއް ލިބިފައި ނުވާ ކަމަށެވެ.

އަލިފާނުގެ ހާދިސާއާއި ގުޅިގެން ވަގުތީ ބޯހިޔާވަހިކަން ބޭނުންވާ ފަރާތްތަށް ދެނެގަނެ އެ ފަރާތްތަކަށް ދޭންޖެހޭ ވަގުތީ ބޯހިޔާވަހިކަމާއި ކެއިންބުއިމާއި އަންނައުނު އެންޑީއެމްއޭއިން ވަނީ ހަމަޖައްސައިދީފައެވެ. 

އެންޑީއެމްއޭއިން ހާމަކުރި ގޮތުގައި، ބިދޭސީން އުޅުނު ތަން އެއްކޮށް އަނދާފައިވާއިރު، އެއިމާރާތުގައި އެއްވެސް ދިވެއްސެއް ދިރިއުޅެމުން ދިޔަ ތަނެއް އަދާފައެއް ނުވެއެވެ.

އެ އިދާރާއިން ބުނީ،  މި ހާދިސާއާއި ގުޅިގެން އަމިއްލަ ހާލަތަށް  އެނބުރި އައުމަށް ހިނގާނެ ޚަރަދާއި ނަގާނެ މުއްދަތު ދެނެގަނެވޭނީ ފިޒިކަލް އެސެސްމެންޓް ހެދުމަށްފަހުކަމަށާއި، މިހާރު އެ މަސައްކަތް ކުރެވެމުންދާ ކަމަށެވެ.

އެންޑީއެމްއޭ އިން ހާމަކޮށްފައިވާ ގޮތުގައި، އެ ހާދިސާގައި ޖުމްލަ 57 މީހުން ހާލުގައި ޖެހިފައިވާއިރު، އޭގެ ތެރޭގައި 37 ދިވެހިންނާއި 20 ބިދޭސީން ހިމެނެއެވެ. މި ފަރާތްތަކަށް އެ އިދާރާއިން ވަނީ އެހީތެރިކަން ފޯރުކޮށްދީފައެވެ.

މި ހާދިސާ ހިނގި ސަރަޙައްދުގައި ހަރަކާތްތެރިވި ވޮއިސްގެ ރިޕޯޓަރު ބުނެފައިވަނީ ކެފޭގައި އަލިފާންގަނޑު ރޯވިތާ މާ ގިނައިރުތަކެއް ނުވެ މުޅި އިމާރާތުގައި އަލިފާން ހިފިކަމަށެވެ. އަދި އަލިފާންގަނޑު ރޯވެ ބޮޑަށް ހުޅުގަނޑު ފަޅައިގެން ގޮސްފައިވަނީ ގޭސްފުޅީގައި ރޯވި ހިސާބުންކަމަށްވެސް ރިޕޯޓަރު ބުންޏެވެ.

ހާދިސާ ހިނގުމާއެކު ކުޑަ ވަގުތުކޮޅެއްގެ ތެރޭގައި ރޯވެފައިވާ އިމާރާތާ ޖެހިގެންހުރި ގޭތަކުން ވަނީ މީހުން ހުސްކޮށްފައެވެ.

އަލިފާންގަނޑު ކޮންޓްރޯލްވިއިރު، ކެފޭހުރި އިމާރާތުގެ އިތުރުން ޖެހިގެންހުރި އިމާރާތުގައިވެސް އަލިފާން ހިފިއެވެ. މިހާދިސާގައި ކެފޭގައި ހުރި ހުރިހާ އެއްޗެއް އަނދާފައިވާއިރު، މުޅި އެ އިމާރާތްވަނީ އަލުން ބޭނުން ނުކުރެވޭވަރަށް އަނދާފައެވެ.