މީގެ ކުރިން ގަވާއިދާއި ޚިލާފަށް އުޅޭ ބިދޭސީން ފޮނުވާލުމުގައި ދަތިތަކާއި ކުރިމަތިވީ އިމިގްރޭޝަންގެ ބެލުމުގެ ދަށަށް ބިދޭސީން ގެނައުމަށްފަހު ބަހައްޓާނެ ތަނެއް ނެތުމުން ކަމަށް އިމިގްރޭޝަނުން ބުނެފިއެވެ.
އެސްއެސްޓީވީގެ "ބާރު ހަތަރެއް" ޕްރޮގްރާމްގައި ވާހަކަފުޅު ދައްކަވަމުން ސީނިއާ އިމިގްރޭޝަން އޮފިސަރ އަދި ޑެޕިއުޓީ ހެޑް އޮފް އެންފޯސްމަންޓް އެންޑް ކޮމްޕްލަޔަންސް ޑިވިޝަން، އިސްމާއިލް ޝަރީފް ވިދާޅުވީ، ގަވާއިދާއި ޚިލާފަށް އުޅޭ ބިދޭސީންނަށް ފިޔަވަޅު އެޅުމަށް މީގެ ކުރިންވެސް އިމިގްރޭޝަނުން މަސައްކަތް ކުރާ ކަމަށެވެ.
މީގެ ކުރިން މަސައްކަތްތައް ލަސްވީ ގިނަ ބިދޭސީންތަކެއް ބެލުމުގެ ދަށަށް ގެނެސް ފުރުވާލުމުގައި ދަތިތަކެއް ހުރުމުންކަމަށާއި، އެއާއި ޚިލާފަށް މިހާރު ގަވާއިދާއި ޚިލާފަށް އުޅޭ ބިދޭސީން ހޯދައި، އެމީހުން ބައިތިއްބާނެ ތަނެއް ލިބިފައިވާކަމަށް އިސްމާއީލް ޝަރީފް ވިދާޅުވިއެވެ. އެގޮތުން، އެކަމަށްޓަކައި 180 ޖާގައިގެ ތަނެއް އެބަހުރި ކަމަށް އެބޭފުޅާ ވިދާޅުވިއެވެ.
"މިހާރު އަޅުގަނޑުމެންނަށް 180 ޖާގައިގެ ތަނެއް ހުރުމާއިއެކު، އަޅުގަނޑުމެންނަށް ބިދޭސީން ހޯދައި ފުރުވާލުމަށް ގިނަ މަސައްކަތްތަކެއް ކުރެވެމުން ދަނީ."
އިސްމާއީލް ޝަރީފް ވިދާޅުވިއެވެ.
އިސްމާއީލް ޝަރީފް ވިދާޅުވީ، އިމިގްރޭޝަންގެ ކޮންޓްރޯލަރ މުހައްމަދު ޝައްމާން ވަހީދުގެ ވިސްނުންފުޅާއި އެއްގޮތަށް ޓެކްނޮލޮޖީގެ ގޮތުން މިކަމަށްޓަކައި ފަހި ކުރަން ޖެހޭ ކަންކަން މަގުފަހިކުރަމުންދާ ކަމަށާއި، މިހާރު އޮޕަރޭޝަންތައް ފެނިގެންދަނީ އޮންނަ އިތުބާރާއި ކަންކަން ފަހިވެގެންދާތީ ކަމަށެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީން މައްސަލަ ހައްލު ކުރުމަށް ޓަކައި ސަރުކާރުންވަނީ ބޮޑެތި މަސައްކަތްތަކެއް ފަށާފައިވާއިރު، އެމަސައްކަތްތަކުގެ ތެރެއިން މިހާތަނަށް އެތައް ސަތޭކަ ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެސް، ޑީޕޯޓްކޮށްލާފައެވެ.
Advertisement
This content is created and paid for by advertisers and does not involve Voice Journalists
