ދިވެހި ދައުލަތަށް ގިނަ އަހަރުތަކެއް ވަންދެން ހިދުމަތްކުރެއްވި ޢަބްދުލްޢަޒީޒް ޢަބްދުﷲ އަވަހާރަވުމުން، އެ މަރުޙޫމްގެ ޢާއިލާއަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާގެ ތައުޒިޔާ މެސެޖުގައި ވިދާޅުވެފައިވަނީ، ޢަބްދުލްޢަޒީޒަކީ، ދިވެހި ދައުލަތަށް 45 އަހަރަށްވުރެ ދިގު މުއްދަތަކު ޚިދުމަތްކުރައްވާ، ދައުލަތަށް ޚިދުމަތްކުރުމުގެ އިނާމު ޙާޞިލްކުރައްވާފައިވާ، އަދި ރައްޔިތުންގެ މަޖިލީހުގެ މެންބަރުކަމާ، އަތޮޅުވެރިކަންވެސް ކުރައްވާފައިވާ ބޭފުޅެއް ކަމަށެވެ.
މިކަމާ ގުޅިގެން ރައީސް ޑރ.މުއިއްޒު އެކްސްގައި ކުރެއްވި ޕޯސްޓްގައި ވަނީ، ޢަބްދުލްޢަޒީޒް ޢަބްދުﷲ އަވަހާރަވުމުގެ ހިތާމައިގާ ބައިވެރިވެ، އެ މަރުޙޫމްގެ ޢާއިލާއަށް ތަޢުޒިޔާ ވިދާޅުވެފައެވެ.
ޢަބްދުލްޢަޒީޒް ޢަބްދުﷲ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 1959 ވަނަ އަހަރުގެ ޖުލައިމަހުގެ 25 ވަނަ ދުވަހުއެވެ. އެންމެ ފުރަތަމަ އަދާކުރެއްވީ، މަޙްކަމަތުލް އަޝްޣާލްގެ ވަގުތީ ކާތިބެއްގެ ވަޒީފާއެވެ.
އެއަށްފަހު، ވުޒާރަތުލް މާލިއްޔާ (ހ) 2ގެ ވަގުތީ ކާތިބު ކަމާއި، ވުޒާރަތުއްދާޚިލިއްޔާގެ ހުވަދުއަތޮޅުގޭ ވަގުތީ ކާތިބު ކަމާއި، ވުޒާރަތުއްދާޚިލިއްޔާ (ނ) ގެ ވަގުތީ 2 ނަންބަރު ކާތިބު ކަމުގެ ވަޒީފާ އަދާކުރެއްވިއެވެ. އޭގެފަހުން، 5 ފެބުރުވަރީ 1969 ގައި ޑިޕާޓްމަންޓް އޮފް ހޯމް އެފެއާޒްގެ 1 ނަންބަރު ކާތިބު ކަމަށް ބަދަލުކުރެއްވިއެވެ. އަދި ރައީސުލްޖުމްހޫރިއްޔާގެ އޮފީހާއި، އޮފީސް އޮފް ދަ ޕްރައިމް މިނިސްޓަރުގެ 1 ނަންބަރު ކާތިބުކަންވެސް ކުރެއްވިއެވެ. ރައީސުލްޖުމްހޫރިއްޔާގެ އޮފީހުގެ ސެކްރެޓެރީއެއްގެ މަގާމަށް ޢަބްދުލްޢަޒީޒް ޢަބްދުﷲ ބަދަލުކުރެއްވީ، 23 ފެބުރުވަރީ 1977 ގައެވެ.
އޭނާ ވަނީ ޏ. އަތޮޅު އަތޮޅުވެރިކަންވެސް ކުރައްވާފައެވެ. މީގެ އިތުރުން ސަރުކާރުގެ އެކި ވުޒާރާތަކުގެ މަޤާމުތައް ވަނީ ފުރުއްވާފައެވެ.
Advertisement
This content is created and paid for by advertisers and does not involve Voice Journalists
