ކްރެޑިޓް ރޭޓިން އޭޖެންސީއެއް ކަމަށްވާ މޫޑިސްއިން އެންމެފަހުން ރާއްޖެއާ ބެހޭގޮތުން އެކުލަވާލި ކްރެޑިޓް ރޭޓިންގައި ރާއްޖޭގެ ރޭޓިން ދަށްކުރިނަމަވެސް، އިޤްތިސާދީ ހާލަތު އޮތީ ތަހައްމަލުކުރެވޭ ހާލަތެއްގައިކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ އެމްއެމްއޭއިން ބުނެފިއެވެ.

މޫޑިސް އިން އެންމެފަހުން ނެރުނު ރާއްޖޭގެ ކްރެޑިޓް ރޭޓިން ރިޕޯޓްގައި އެ އޭޖެންސީން ވަނީ، ރާއްޖޭގެ ރޭޓިން ސީއޭއޭ1 އިން ސީއޭއޭ 2އަށް ދަށްކޮށްފައެވެ. މާނައަކީ ކުރިން އޮތް ހާލަތަށްވުރެ ގޯސްވީއެވެ. ރާއްޖޭގެ ރޭޓިން ދަށްކުރި ހުއްޖަތެއްކަމަށް މޫޑިސްގެ ރިޕޯޓްގައި ބުނެފައިވަނީ، އިގްތިސާދީ ހާލަތު އޮތްގޮތުން އަންނަ އަހަރު އަނބުރާ ދައްކަންޖެހޭ ދަރަނި ބޮޑުވުމުންނެވެ. މޫޑިސްއިން ވަނީ އަންނަ އަހަރު ރާއްޖެއިން 600 މިލިއަން ޑޮލަރު އޮތްކަން ފާހަގަކޮށްފައެވެ. މީގެ އިތުރުން 2026 ވަނަ އަހަރު ދައްކަންޖެހޭ 1 ބިލިއަން ޑޮލަރު އޮތުމަކީވެސް ރޭޓިން ދަށްކުރަން ޖެހުނު ސަބަބެއްކަމަށް މޫޑިސް އިން ފާހަގަކުރިއެވެ.

މޫޑިސްގެ ރިޕޯޓާ ގުޅިގެން އެމްއެމްއޭއިން ބުނީ, ރާއްޖޭން ނަގާފައިވާ ބޮންޑަށް އަންނަ މަހު ދައްކަންޖެހޭ ޕޭމެންޓް ދެއްކުމުގައި އެއްވެސް ދަތިކަމެއް ނެތްކަމަށެވެ. އެގޮތުން އެ ޕޭމެންޓް ދައްކަންޖެހޭ ތާރީޚަށް ބަރާބަރަށް ދައްކާނެ ކަމުގެ ފުރިހަމަ ޔަގީންކަން ދޭކަމަށްވެސް މަރުކަޒީ ބޭންކުން ބުންޏެވެ. 

އަދި އެމްއެމްއޭ އާއި ސަރުކާރުގެ ކަމާގުޅޭ ހުރިހާ ވުޒާރާތަކާ ގުޅިގެން ރާއްޖޭން ދައްކަންޖެހޭ ދަރަނި ކުރިއަށް އޮތްތަނުގައި ވެސް ދެއްކޭނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް އެމްއެމްއޭއިން މިއަދު ނެރުނު ބަޔާނުގައި ބުންޏެވެ.

އެމްއެމްއޭއިްން ބުނީ، ކުރިއަށް އޮތް އަހަރުތަކުގައި ރާއްޖޭގެ އުފެއްދުންތެރިކަން ކުރިއަރާނޭކަމަށް ލަފާކުރެވޭ ކަމަށާއި އޭގެ މައިގަނޑު ސަބަބަކީ ފަތުރުވެރިކަމުގެ ސިނާއަތަށް ލިބޭނޭ ކުރިއެރުން ކަމަށެވެ.

މިއަހަރުގެ އޮގަސްޓް މަސް ނިމުނު އިރު ރާއްޖެ އަށް ވަނީ 1.3 މިލިއަނަށް ވުރެ ގިނަ ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މުމުއްދަތާއި އަޅާބަލާއިރު 10 އިންސައްތައިގެ ކުރިއެރުމެކެވެ. މިއަހަރުގެ ޖުލައި މަހާއި މިދިޔަ އަހަރުގެ ޖުލައި މަހާ އަޅާބަލާއިރު ފަތުވެރިން ރާއްޖޭގައި ހޭދަކުރާ މުއްދަތުވެސް ވަނީ 7 އިންސައްތަ އިން އިތުރުވެފައެވެ.  

އެމްއެމްއޭއިން ބުނީ ރާއްޖޭގެ ރަސްމީ ރިޒާވާއި ބޭނުންކުރެވޭ ރިޒާވްވެސް ވަނީ އޮގަސްޓު މަސް ނިމުނުއިރު އިތުރުވެފައި ކަމަށެވެ. އެގޮތުން ޖުމްލަ ރިޒާވް އޮގަސްޓު މަސް ނިމުނުއިރު ހުރީ 444 މިލިއަން ޑޮލަރަށް އަރާފައެވެ. ޖުލައި މަހު މި ރިޒާވް ހުރީ 395 މިލިއަން ޑޮލަރުގައެވެ. އަދި ބޭނުންކުރެވޭ ރިޒާވްގައި އޮގަސްޓު މަސް ނިމުނުއިރު ހުރީ 61.22 މިލިއަން ޑޮލަރެވެ.

މިއަހަރުގެ ނިޔަލަށް ބޭނުންކުރެވޭ ރިޒާވާއި ސޮވެރިން ޑިވެލޮޕްމަންޓް ހިމަނައިގެން ރާއްޖޭގެ ރަސްމީ ރިޒާވް 2024ގެ ބަޖެޓަށް އަންދާޒާ ކުރި އަދަދު ކަމުގައިވާ 606 މިލިއަން ޑޮލަރަށްވުރެ އިތުރުވެގެންދާނެ ކަމަށް އަންދާޒާކުރެވޭކަމަށް އެމްއެމްއޭއިން ބުނެއެވެ.

ފައިސާ ޗާޕްކުރުމުގެ ސަބަބުން ބޭންކިން ނިޒާމުގައި ސާޕްލަސް ލިކުއިޑިޓީ އިތުރުވެފައިވާކަމަށް މޫޑީސް ރިޕޯޓްގައި ވަނީ ފާހަގަކޮށްފައިވާއިރު، ފައިސާ ޗާޕްކުރުމުގެ ސަބަބުން ބޭންކިން ނިޒާމުގައި ސާޕްލަސް ލިކުއިޑިޓީ ހުރީ އެވްރެޖްކޮށް 6.7 ބިލިއަން ރުފިޔާގައެވެ.

އެކަމާ ގުޅޭގޮތުން އެމްއެމްއޭއިން ބުނީ، ދިވެހި ރުފިޔާގެ އެކްސްޗޭންޖް ރޭޓް ހިފެހެއްޓުމަށް ކުރިމަތިވެފައިވާ ގޮންޖެހުންތައް ކުޑަކުރުމަށްޓަކައި، ބޭންކިން ނިޒާމުގައި އިތުރުވެފައިވާ ސާޕްލަސް ލިކުއިޑިޓީ މަނިޓަރީ ވަސީލަތްތައް ބޭނުން ކޮށްގެން ބޭންކިން ނިޒާމުން ނެގުމަށް އޮޕަން މާކެޓް އޮޕަރޭޝަން މެދުވެރިކޮށް ފައިސާ މޮޕްއަޕް ކުރުމުގެ މަސައްކަތް މިއަހަރު ފެށިގެންދާނޭ ކަމަށެވެ.

މީގެ އިތުރުން ބޭރުފައިސާގެ ބާޒާރަށް ދިމާވެފައިވާ ގޮންޖެހުންތައް ހައްލުކުރުމަށްޓަކައި ރާއްޖޭގެ ބޭންކިން ނިޒާމަށް ވަންނަ ބޭރުފައިސާ އިތުރުކުރެވޭނެ ގޮތަށް މަނިޓަރީ ގަވައިދު އިސްލާހުކޮށް މި ބަދަލުތައް މިމަހުގެ ތެރޭގައި އިއުލާންކުރެވޭނޭކަމަށްވެސް އެމްއެމްއޭއިން ވަނީ ބުނެފައެވެ.

މޫޑިސްގެ ރިޕޯޓާ ގުޅޭގޮތުން ފިނޭންސް މިނިސްޓަރީން ބުނެފައިވަނީ، މޫޑިސްގެ ރިޕޯޓްގައި ފާހަގަކޮށްފައި އެވަނީ ފިޗުންވެސް ފާހަގަކުރި ކަންކަން ކަމަށެވެ. ކްރެޑިޓް ރޭޓިން އޭޖެންސީން ފާހަގަކޮށްފައިވާ ކަންކަން ރަނގަޅުކުރުމުގެ ގޮތުން މާލީ ސިޔާސަތު ހަރުދަނާކޮށް ފިޔަވަޅުތައް އަޅައި ތަންފީޒުކުރަމުންދާކަމަށް މާލީ ވުޒާރާއިން މިއަދު ވަނީ ބުނެފައެވެ.