ވާވޭ ކުންފުނިން ތިންފަށްކުރެވޭ ފޯނެއް ލޯންޗުކޮށްފިއެވެ.

މިއީ މިހާތަނަށް ތިންފަށަށް ފަތްޖަހާލެވޭގޮތަށް އުފައްދާ ބާޒާރަށް ނެރޭ ފުރަތަމަ ފޯނެވެ. ކަޅުކުލަ އާއި ރަތްކުލައިން ތަޢާރަފްކުރި ވާވޭ މެޓް އެކްސް.ޓީ ފޯނު ލޯންޗުކުރިތާ ދެތިން ގަޑިއިރުތެރޭ ވަނީ 3 މިލިއަނެއްހާ ޕްރީއޯޑަރު ލިބިފައެވެ. އަދި މީސްމީޑިއާގައިވެސް ވަނީ މިފޯނުގެ ޑިޒައިނަށް ބޮޑު މަޤުބޫލުކަމެއް ލިބިފައެވެ.

ޗައިނާގެ ޝެންޒެންއަށް ނިސްބަތްވާ ކުންފުނި، ވާވޭއިން މިފޯނު ލޯންޗުކޮށްފައި މިވަނީ އެޕަލް އައިފޯން 16 ޢިއުލާނުކުރިތާ ދެތިން ގަޑިއިރުތެރޭގައެވެ. މިދެފޯނުވެސް ބާޒާރުގައި އާއްމުކޮށް ވިއްކަން ފަށަނީ ސެޕްޓެމްބަރ 20އިން ފެށިގެންނެވެ.

Advertisement

ވާވޭ ކުންފުންޏަކީ މީގެ ކުރިން އެމެރިކާއިން ދަތިކުރުމުގެ ފިޔަވަޅުތައް އަޅާފައިވާ ކުންފުންޏެކެވެ. އެގޮތުން 2019 ވަނަ އަހަރު އޭރުގެ އެމެރިކާގެ ރައީސް ޑޯނަލްޑް ޓްރަމްޕްވަނީ ވާވޭ ކުންފުންޏަކީ އެމެރިކާގެ ސެކިއުރިޓީ ހިރާހެއްގެ ގޮތުގައި ސިފަކޮށްފައެވެ. އަދި 2020 ވަނަ އަހަރު ޔޫކޭއާއި ސްވިޑަންއިންވެސް ވަނީ އެޤައުމުތަކުގެ 5ޖީ ވިއުގައިގެ ތެރޭގައި ވާވޭ ބޭނުން ނުކުރެވޭގޮތް ހަދާފައެވެ. އޭރު އެޅި ދަތިކުރުމުގެ ފިޔަވަޅުތަކާގުޅިގެން ވާވޭ ކުންފުންޏައް ބޮޑެތި ގެއްލުންތަކެއް ކުރިމަތިވިނަމަވެސް 2023 ވަނަ އަހަރު އަދި 2024 ވަނަ އަހަރު ވާވޭ ކުންފުނިންވަނީ ބޮޑެތި ކުރިއެރުންތަކެއް ހޯދާފައެވެ.

ވާވޭ މެޓް އެކްސް.ޓީ ފޯނު ފަރުމާކޮށްފައިވަނީ ފަށްޖަހާލާފައި އޮންނައިރު އާންމު ފޯނުތަކެކޭ އެއްފަދައިން ބޭނުންކުރެވޭ ގޮތަށެވެ. އަދި މި ފޯނު ދެފަށަށް ނިއުޅާލުމުން ވެބް ބްރައުސިންގއާއި ފޮތް ކިޔުމަށް ބޭނުންކުރެވޭއިރު، އެއްކޮށް ތިންފަށް ނިއުޅާލުމުން މަސައްކަތްކުރުމަށާއި ކިޔެވުމަށް ބޭނުންކުރެވެއެވެ.

މީސްމީޑިއާގައި ބޮޑު މަޤުބޫލުކަމެއް ޑިޒައިނަށް ލިބެމުންދާ މިފޯނަކީ 2،800 ޑޮލަރުގެ އަގުހުރި ފޯނެކެވެ.