މާދަރީ ބަހުން ދަރިވަރުން ފަރިތަކަމާއެކު ގިނަ ގިނައިން ވާހަކައްކަން ބާރުއަޅައި ގައުމީއްޔަތު މި ކުދިން ގެ ލެވެލް އިން ދަސްކޮއްދޭނެ ކަންކަމަށް އިސްކަން ދިނުމަށް ކިންޑަރ ޕްރީސުކޫލުން ”ބަސްވަނި“ ނަމުގައި ޚާއްސަ ހަވީރެއް ބާއްވައިފިއެވެ. 

އިއްޔެ ހަވީރު، 4:00 އިން 6:00 އަށް ހެންވޭރު ދަނޑުގައި ކުރިއަށް ގެންދިޔަ މި ހަވީރާއި ގުޅޭ ގޮތުން ”ވޮއިސް“ އަށް މައުލޫމާތު ދެއްވަމުން ކިންޑަރ ޕްރީސްކޫލްގެ ޕްރިންސިޕަލް އައިމިނަތު ނިސްމާ ނަސީމް ވިދާޅުވީ، ކޮންމެ އަހަރަކުވެސް މުޖުތަމައުގެ ހޭލުންތެރިކަން ބޭނުންވެފައިވާ ކަމަކަށް އަމާޒުކޮއްގެން އަންނަން އޮތް ޖީލު މިކަންކަމަށް ތައްޔާރު ކުރުމަށް ތަފާތު ބޮޑު ޙަރަކާތެއް، ބެލެނިވެރިންނާ ސުކޫލާއި ގުޅިގެން ދަރިވަރުންނަށް ހިންގާ ކަމަށެވެ. 

އެގޮތުން މި އަހަރު ބޭއްވުނު ”ބަސް ވަނި“ ހަވީރަކީ ކިންޑަރ ޕްރީސްކޫލު ކުދިންގެ ހިތްތަކުގައި ދިވެހިބަހަށް ލޯބި އުފައްދައި ބަހާއިމެދު ޝައުޤުވެރިކަން އިތުރުކުރުމުގެ މަޤުސަދުގައި ރޭވިގެން ކުރިއަށްގެންދެވުނު ޙަރަކާތެއް ކަމަށް ނިސްމާ ވިދާޅުވިއެވެ.

ނިސްމާ ވިދާޅުވީ، މި ހަވީރުގެ ތެރެއިން، އާއްމު ދިރިއުޅުމުގައި ދަރިވަރުން ބޭނުންކުރާ ބަސްތަކުގެ ދިވެހި ނަންތައް ރަމްޒުކޮށްދޭ އެއްޗެއް ނުވަތަ ކޮސްޓިއުމް ބޭނުންކޮށްގެން ކުދިންގެ ޝައުގުވެރިކަން އިތުރުވާނެ ފަދަ ގޮތަކަށް ހަރަކާތްތައް ކުރިއަށް ގެންގޮސްފައިވާ ކަމަށެވެ. އެގޮތުން، އެކުއްޖެއް އެ ރަމްޒުކޮއްދޭ އެއެއްޗެއްގެ ނަން ފެންނާނެހެން ކޮސްޓިއުމްގައު ހަރުކުރެވިފައި ވާއިރު، ދަރިވަރުން އެކުއްޖާ ރަމްޒުކޮށްދޭ ބަސް ސްޓޭޖަށް އަރާ ކިޔާލަދީފައިވެއެވެ. 

މި ހަރަކާތް ނިމިގެންދިޔައީ ހުރިހާ ދަރިވަރުންނާއި ، ބެލެނިވެރިންނާއި ހެންވޭރު ދަނޑުގެ މަޖީދީ މަގު ދޮރާށިން ނިކުމުގެން މަގުމަތީގައި ދަރިވަރުންނާއި ބެލެނިވެރިންނާ ހިނގާލުމަކާއެކުގައެވެ. 

މި ހިނގާލުމުގައި ދިވެހި ބަހާއި ބެހޭ ވުޒާރާގެ ވަޒީރުގެ ނައިބުވެސް ބައިވެރިވެވަޑައިގަންނަވާފައިވެއެވެ. 

މިއާއެކު ނިސްމާ ވިދާޅުވީ، މިހަރަކާތައް ފަހުވެސް، ދަރިވަރުން މި ބަސްތައް ސްކޫލް މާހައުލުގައި ފަރިތަކުރުވައި އާދަކުރުމަށް ކުލާސް ތެރޭގައި ކުދި އިތުރު ހަރާކައްތައް އެކި ދުވަސްތަކައް ބަހާލައިން ކުރިއަށްގެންދިއުމަށް ރޭވިފައިވާ ކަމަށެވެ.

ކިންޑަރ ޕްރީ ސްކޫލުން، 2022 ވަނަ އަހަރު ގައި ބޭއްވުނު މިފަދަ ހަރަކާތުގައި ވަނީ، ދިވެހިންގެ އެހާރާއި މިހާރުގެ ދިރިއުޅުމުގެ ވައްޓަފާޅިއަށް އައި، އަދި އަންނަމުންދާ ބަދަލުތައް ދައްކުވައިދޭ މޮޑެލްސް ތަކެއް ހަދައި ޘަޤާފީ ދުވަހެއްކުރިއަށް ގެންގޮސްފައެވެ.

އަދި 2023 ވަނަ އަހަރުގައި ލިޓްލް އެކުސްޕުލޯރާ އަދި ޖީނިއަސް ރީސައިކުލާ ނަމުގައި ދަރިވަރުންނަށް ޕްލާސްޓިކް ބޭނުން ކުރުން މަދުކުރުމަށް ބާރުއަޅައި އުކާލެވޭ ތަކެތި ބޭނުން ކޮށްގެން ދިރިއުޅުމުގައި ބޭނުން ހިފިދާނެ ފަދަތަކެތި އުފެއްދިދާނެކަން ދައްކުވާދޭ ވަރަށް ކާމިޔާބު އެގްޒިބިޝަން އެއް ބާއްވާފައިވެއެވެ.