އޯލެވެލް އަދި އޭލެވެލް އިމްތިހާނުން ފާސްވާ ކުދިންގެ އަދަދު އިތުރުކުރުމަށް، ޕްރައިމަރީ ގްރޭޑްތަކުން ފާސްވާ ކުދިންގެ ނިސްބަތް އިތުރުކުރަން ޖެހޭ ކަމަށް ތައުލީމާ ބެހޭ ވަޒީރު ޑރ. އިސްމާއިލް ޝަފީއު ވިދާޅުވެއްޖެ އެވެ.

މަތީ އަރުތަވެރިންގެ އިނާމު ދިނުމުގެ ރަސްމިއްޔާތު 2022-2023 ގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، ޕްރައިމަރީ ގްރޭޑްތަކުން ފާސްވާ ކުދިންގެ އަދަދު ވަރަށް ބޮޑަށް ދަށްވެފައިވާކަމަށެވެ.

މިގޮތުން ގްރޭޑް 3 ގެ ދިވެހި މާއްދާއިން ފާސްވާ ކުދިންގެ ނިސްބަތް 40 ޕަސެންޓަށްވުރެ ދަށްވެފައިވާކަމަށާއި، ގްރޭޑް 6 ގައި ކިޔަވާ ދަރިވަރުންގެ އިނގިރޭސި އާއި ހިސާބު އަދި ދިވެހި މާއްދާ އިން ފާސްވާ ކުދިންގެ އަދަދު 50 ޕަސެންޓަށްވުރެ ދަށްވެފައިވާކަން ވަޒީރު ޝަފީއު ފާހަގަކުރެއްވިއެވެ.

Advertisement

މިއީ ވަރަށް ކަންބޮޑުވާކަމެއްކަން ފާހަގަކުރައްވާ ތަޢުލީމާބެހޭ ވަޒީރު ވިދާޅުވީ އޭލެވެލްއާއި އޯލެވެލްއިން ގިނަކުދިން ފާސްވާން ބޭނުންވާނަމަ ޕްރައިމަރީ ގްރޭޑުން ފާސްވާ ކުދިންގެ އިންސައްތަ އިތުރު ކުރަންޖެހޭކަމަށެވެ.

ވަޒީރު ޝަފީއު ވިދާޅުވީ، ސެކެންޑްރީ ގްރޭޑްތަކަށްވުރެ ޕްރައިމަރީ ގްރޭޑްތަކަށް ނިސްބަތުން ފައިސާ ޚަރަދުކުރެވޭ މިންވަރު މަދުކަމަށާއި، ޒަމާނުއްސުރެން ޕްރައިމަރީ ގްރޭޑަށް ދެވިފައި އޮތް އަހަމިއްޔަތުކަން ކުޑަކަމަށެވެ.

އެހެންނަމަވެސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިރުޝާދާއި އެއްގޮތަށް ޕްރައިމަރީ ގްރޭޑްއިން ފާސްވާ ކުދިންގެ ނަތީޖާ ރަނގަޅު ކުރުމަށް އެ ވުޒާރާއިން މަސައްކަތް ކުރާނެކަމުގެ ޔަގީންކަން ވަޒީރު ވަނީ ދެއްވާފައެވެ.