އިސްލާމީ ކަންތައްތަކާބެހޭ ވުޒާރާގެ މަޝްރޫޢުތަކަށް މިއަހަރުގެ މިހާތަނަށް 50.7 މިލިޔަން ރުފިޔާ ދޫކޮށްފިއެވެ.

އެ ވުޒާރާއިން އާއްމުކުރި މައުލޫމާތުތަކަށް ބަލާއިރު، ރާއްޖޭގެ އެކި ސަރަޙައްދުތަކުގައި އެ ވުޒާރާގެ ބެލުމުގެ ދަށުން 25 މަޝްރޫއެއް ކުރިއަށް އެބަދެއެވެ.

އޭގެ ތެރޭގައި 21 މިސްކިތެއްގެ މަސައްކަތާއި 2 އިސްލާމިކް ސެންޓަރުގެ މަސައްކަތް ހިމެނޭ ކަމަށާއި، އަދި 1 ޤުރުއާން ސެންޓަރެއްގެ މަސައްކަތުގެ އިތުރުން ސެޓުލްމަންޓު އެއްބަސްވުމުގެ ދަށުން މަސައްކަތް ކުރިއަށްދާ 1 މިސްކިތް ހިމެނޭކަމަށް އެ ވުޒާރާއިން ބުނެއެވެ.

އިސްލާމީ ކަންތައްތަކާއި ބެހޭ ވުޒާރާގެ ދަށުން ކުރިއަށްދާ މަޝްރޫއެއް-- ފޮޓޯ: މިނިސްޓްރީ

އެ ވުޒާރާއިން ބުނީ މި މަޝްރޫއުތަކުގެ ތެރެއިން ބައެއް މަޝްރޫއުތައް ބާރު ދުވެލީގައި ކުރިއަށްދާ ކަމަށާއި އިތުރު މަޝްރޫޢުތަކުގެ ދުވެލި އަވަސް ކުރުމަށް، މަސައްކަތްތައް ކުރިއަށް ގެންދާ ކުންފުނިތަކާ ގުޅިގެން މަސައްކަތް ކުރަމުން އަންނަ ކަމަށެވެ.

އެ ވުޒާރާއިން އިތުރަށް ބުނީ،  ދައުރުގެ ތެރޭގައި ކުރިއަށް ގެންދިއުމަށް ހަމަޖެހިފައިވާ އެންމެ ބޮޑު ދެ މަޝްރޫޢު، ހުޅުމާލޭގައި އިމާރަތްކުރާ ވަޤްފް ބިލްޑިންގކަމަށްވާ ދާރުލް ސަލާމްގެ މަސައްކަތާއި މާލޭގައި އިމާރާތްކުރާ ދާރުލް އަރުޤަމްގެ މަސައްކަތް ފެށުމަށް ކުރަން ޖެހޭ މަސައްކަތްތައްވެސް ކުރަމުން އަންނަ ކަމަށެވެ.

އަދި އޭގެ ތެރެއިން  ދާރުލް ސަލާމްގެ ޑިޒައިނާއި ކުރެހުމުގެ މަސައްކަތް ނިންމައި ކޮންޓްރެކްޓާ ފައިނޭންސް އުސޫލުން ކުރިއަށް ގެންދިއުމަށް ޕްރޮޕޯސަލް ހުށަހެޅުމަށް މިހާރު ހުޅުވައިލައިފައިވާ ކަމަށާއި ދާރުލް އަރުޤަމްގެ ކޮންސެޕްޓާއި ތަފުސީލީ ކުރެހުމުގެ މަސައްކަތް މިހާރު ކުރަމުން އަންނަ ކަމަށް އިސްލާމިކް މިނިސްޓްރީން ވަނީ ބުނެފައެވެ.