އެމެރިކާގެ ޑިމޮކްރެޓިކް ޕާޓީގެ ކެންޑިޑޭޓް އަދި ނައިބު ރައީސް ކަމަލާ ހެރިސްއަށް، ރިޕަބްލިކަން ޕާޓީގެ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕްއަށްވުރެ ހުރިހާ ގޮތަކުންވެސް ވޯޓަރުންގެ ތާއީދު އިތުރުކަން ފަހުގެ ޕޯލްތަކުން ދައްކައިފިއެވެ.

ރޮއިޓަރސް/އިޕްސޮސް އިން ހަފްތާ ބަންދުގައި ހެދި ސަރވޭއަކުން ދައްކާގޮތުގައި ނޮވެމްބަރު 5 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ހެރިސްއަށް 47 އިންސައްތަ މީހުންގެ ތާއީދު ލިބޭއިރު، ޓްރަމްޕްއަށް ލިބެނީ 42 އިންސައްތައެވެ.

މި ދެ ކެންޑިޑޭޓުންގެ މެދުގައި އަންގާރަ ދުވަހު ބޭއްވުނު ޑިބޭޓުގައި ހެރިސް މޮޅުވި ކަމަށް ވެސް ގިނަ ބަޔަކު ދެކޭކަން ސަރވޭއިން ދައްކައެވެ. ޑިބޭޓާ ބެހޭ ގޮތުން އެއްޗެއް އަޑުއިވިފައިވާ މީހުންގެ ތެރެއިން 53 އިންސައްތަ މީހުން ބުނެފައިވަނީ ހެރިސް މޮޅުވި ކަމަށެވެ. އަދި 24 އިންސައްތަ މީހުން ބުނެފައިވަނީ ޓްރަމްޕް މޮޅުވި ކަމަށެވެ.

Advertisement

59 އަހަރުގެ ހެރިސްއާއި 78 އަހަރުގެ ޓްރަމްޕްއާ ދެމެދު ކުރިޔަށްދިޔަ ޑިބޭޓުގައި ހެރިސް ވަނީ ޓްރަމްޕްގެ އުމުރާއި ޤާނޫނީ މައްސަލަތަކާ ބެހޭ ގޮތުން ވަރުގަދަ ސުވާލުތަކެއް ކޮށްފައެވެ. 52 އިންސައްތަ މީހުން ބުނެފައިވަނީ ޓްރަމްޕް ޑިބޭޓުގައި ހަރުދަނާކަމެއް ނެތި ވާހަކަދެއްކި ކަމަށެވެ. އަދި 21 އިންސައްތަ މީހުން އެގޮތަށް ބުނެފައިވަނީ ހެރިސްއާ ދޭތެރޭގައެވެ.

ޖޫންމަހު ބޭއްވުނު ޑިބޭޓެއްގައި ރައީސް ޖޯ ބައިޑަންގެ ފަރާތުން ދެރަ ޕަފޯމަންސެއް ފެނުމާ ގުޅިގެން އޭނާ ވަނީ ރިޔާސީ ވާދައިން ތަނާޒުލުވެފައެވެ. އޭގެ ފަހުން ހެރިސް ވަނީ ޑިމޮކްރެޓިކް ޕާޓީގެ ކެންޑިޑޭޓަކަށް ހޮވިފައެވެ.

މި ސަރވޭގައި 1،690 އެމެރިކާ ރައްޔިތުން ބައިވެރިވެފައިވާއިރު، އޭގެ ތެރޭގައި ވޯޓުލާން ރަޖިސްޓްރީވެފައިވާ 1،405 މީހުން ހިމެނެއެވެ. ނަމަވެސް މި ސަރވޭއަކީ މުޅި ޤައުމުގެ ހާލަތު ދައްކުވައިދޭ އެއްޗެއް ކަމުގައި ވިޔަސް، އެމެރިކާގެ ރިޔާސީ އިންތިޚާބު ނިމިގެންދާނީ ވަކިވަކި ސްޓޭޓުތަކުގެ ނަތީޖާއަށް ބަލައިގެންކަން ފާހަގަކުރެވެއެވެ.