ރޭ ދަންވަރުގެ ވަގުތެއްގައި ހުޅުމާލޭ ހިޔާ ފުލެޓްގެ އެޕާޓްމަންޓެއްގައި އަންހެނަކު ރަހީނުކޮށްގެން ތިބި ދެ ފިރިހެނުންގެ ކިބައިން އެ އަންހެން މީހާ ފުލުހުން ސަލާމަތްކޮށްފިއެވެ.
ފުލުހުންގެ މަޢުލޫމާތު ދޭ ގޮތުގައި، އެ އަންހެން މީހާ ސަލާމަތްކޮށްދިނުމަށް އެދި ގޮވައި، ރޮއި، އަޑުއިވޭތީ ރޭ ފުލުހުން ވަނީ އެޓެންޑް ވެފައެވެ. ނަމަވެސް ފުލުހުން ގޮސް އެޕާޓްމަންޓްގެ ދޮރު ހުޅުވުމަށް ބުނުމުން، އެއް ފިރިހެނަކު ދޮރު ހުޅުވުމަށްފަހު ކަމެއް ނުހިނގާ ކަމަށް ބުނެ ދޮރުލައްޕައި ތަޅުލާފައިވާ ކަމަށް ފުލުހުން ބުންޏެވެ.
އެއަށްފަހުވެސް އަންހެން މީހާ ސަލާމަތަށް އެދި ހަޅޭއްލަވާތީ ދޮރު ހުޅުވުމަށް ތަކުރާރުކޮށް ފުލުހުން އެންގުމުން ވެސް ދޮރު ނުހުޅުވުމުންން، ބާރުގެ ބޭނުންކޮށްގެން ދޮރު ހުޅުވައި އެޕާޓްމަންޓަށް ފުލުހުން ވަދެ އަންހެން މީހާ ސަލާމަތްކޮށްފައިވާ ކަމަށްވެސް ފުލުހުން މައުލޫމާތު ދެއެވެ:
މި މައްސަލައްސަލައާ ގުޅިގެން މާލެ، ހ. ލާމިޔާ، އަޙްމަދު އުވައިސް (20 އަހަރު) އަދި މާލެ، މއ. ތްރީ މޫންސް، މުޙައްމަދު މުމީތު (39 އަހަރު) ވަނީ ހައްޔަރުކޮށްފައެވެ.
މި މައްސަލާގައި ހިމެނޭ ދެ ފިރިހެނުންނާ އަންހެން މީހާއާއި އޮތް ގުޅުމާއި، އަންހެން މީހާ ރޮމުން ސަލާމަތަށް އެދެމުން ދިޔައީ އެމީހުން އަނިޔާ ކުރުމުން ކަމެއް ނުވަތަ ނޫން ކަމެއް މިހާތަނަށް ފުލުހުން ހާމައެއް ނުކުރެއެވެ.
ފުލުހުންގެ ފަރާތުން މި މައްސަލަ ދަނީ ތަޙުޤީޤު ކުރަމުންނެވެ.
Advertisement
This content is created and paid for by advertisers and does not involve Voice Journalists
