އިކޮނޮމިކް މިނިސްޓަރު މުހައްމަދު ސައީދު އައްޑޫސިޓީއަށް ވަޑައިގެން އެ ސިޓީގެ ވިޔަފާރިވެރިންނަށް ކުރިމަތިވެފައި ހުރި ގޮންޖެހުންތައް އޮޅުންފިލުވައިފިއެވެ.
އިގްތިސާދީ ވަޒީރު މުހައްމަދު ސައީދު، އައްޑޫސިޓީއަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ އެ ސިޓީގެ ވިޔަފާރިވެރިންނަށް ހުރި ގޮންޖެހުންތައް ދެނެގަނެ އެެކަންކަން ހައްލު ކުރުމަށް ކުރެވިދާނެ ކަންތައްތަކާއި ގުޅޭގޮތުން، ވިޔަފާރިވެރިންނާއި ބައްދަލު ކުރައްވައި މަޝްވަރާ ކުރައްވާފައެވެ.
މި ބައްދަލު ކުރެއްވުމުގައި މިނިސްޓަރު ވަނީ އައްޑޫސިޓީގައި ސަރުކާރުން ކުރިއަށް ގެންދިއުމަށް ރާވާފައިވާ މަޝްރޫޢުތަކުގެ މަޢުލޫމާތު ވިޔަފާރިވެރިންނާއި ހިއްސާ ކުރައްވާފައެވެ.
މި ބައްދަލުކުރެއްވުމުގައި ވިޔަފާރިވެރިން މައިގަނޑު ގޮތެއްގައި މަޝްވަރާކޮށްފައިވަނީ، ވިޔަފާރިތައް ކުރިއެރުވުމަށް ހުރި ފުރުޞަތުތަކާއި، ސަރުކާރުން އައްޑޫ ސިޓީގައި ކުރިއަށް ގެންދާ މަޝްރޫއުތައް ބާރު ސްޕީޑެެއްގައި ކުރިއަށް ގެންދެވޭނެ ގޮތްތަކާއި ގުޅޭގޮތުންނެވެ.
މިނިސްޓަރ ސަޢީދު ވަނީ ރާއްޖޭގެ އިޤްތިޞާދުގައި އައްޑޫސިޓީގެ ވިޔަފާރިވެރިން އަދާކުރާ މުހިންމު ދައުރު ފާހަގަ ކުރައްވައި ވިޔަފާރިތަކާއި ގާތުން މަސައްކަތް ކުރައްވާނެކަމުގެ ޔަޤީންކަން ދެއްވާފައެވެ. އަދި ސަރުކާރުން އެ ސަދަހައްދުގައި ކުރިއަށް ގެންދާ މަޝްރޫޢުތައް އަވަހަށް ނިންމައި ރައްޔިތުންނަށް އޭގެ މަންފާ އެންމެ ފުރިހަމަ ގޮތުގައި ލިބޭނެ މަގު ފަހިކޮށްދެއްވުމަކީ ސަރުކާރުގެ އަމާޒެއް ކަން ވެސް މިނިސްޓަރ ވަނީ ފާހަގަ ކުރައްވާފައެވެ. އައްޑޫ ސިޓީގައި ތަފާތު އެކި ވިޔަފާރިތައް ޙަރަކާތްތެރިވަމުންދާކަން ފާހަގަ ކުރައްވައި މިނިސްޓަރ ވަނީ ކުދި އަދި މެދުފަންތީގެ ވިޔަފާރިތަކަށް ފަހި ފުރުޞަތުތަކެއް ހޯދައި ދިނުމަށް މުހިންމު މަސައްކަތްތަކެއް ކުރައްވާނެ ކަމުގެ ޔަޤީންކަން ވެސް ދެއްވާފައެވެ. އަދި ވިޔަފާރިތަކަށް ފުރުޞަތުތައް ފަހި ކޮށްދިނުމަށްޓަކައި ޤާނޫނުތަކަށް ގެންނަންޖެހޭ އިސްލާހުތައް ދެނެގަނެ، އެކަންކަން ފަހި ކުރުމަށް ކުރެވެންހުރި މަސައްކަތްތައް ކުރައްވާނެ ކަމަސް ވެސް މިނިސްޓަރ ވަނީ ވިދާޅުވެފައެވެ.
އިގްތިސާދީ ވަޒީރު މުހައްމަދު ސައީދު، އައްޑޫގެ ވިޔަފާރިވެރިންނާ ބައްދަލުކުރެއްވުމުގެ ތެރެއިން..
މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދު އައްޑޫ ސިޓީއަށް ކުރައްވަ ދަތުރު ފުޅުގައި، ބިޒްނަސް ސެންޓަރ ކޯޕަރޭޝަނުގެ މެނޭޖިންގ ޑިރެކްޓަރ އިބްރާހިމް ޟިޔާއު މުޙައްމަދާއި ޑެޕިއުޓީ މެނޭޖިންގ ޑިރެކްޓަރ ވެސް ވަނީ ބައިވެރިވެ ވަޑައިގެންފައެވެ.
ރާއްޖޭގެ އިޤްތިޞާދުގައި ކުދި އަދި މެދުފަންތީގެ ވިޔަފާރިތަކުގެ ދައުރު ފުޅާކޮށް، އެ ވިޔަފާރިތަކަށް އެހީތެރިވުމަށްޓަކައި މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި ބިޒްނަސް ސެންޓަރ ކޯޕަރޭޝަނުން ދަނީ މުހިންމު މަސައްކަތްތަކެއް ކުރައްވަމުންނެވެ. މިނިސްޓަރ ސަޢީދުގެ އައްޑޫ ސިޓީއަށް ކުރެއްވި މި ދަތުރު ފުޅަކީވެސް މި މަސައްޕުޅުގެ ދަށުން ކުރެއްވި ދަތުރުފުޅެކެވެ.
Advertisement
This content is created and paid for by advertisers and does not involve Voice Journalists
