މާރަންދޫ ކައުންސިލްގެ ބައިއިލެކްޝަން ޕީއެންސީން ކާމިޔާބުކޮށްފިއެވެ.
ހއ. މާރަންދޫ ކައުންސިލްގެ ހުސްވެފައިވާ ގޮނޑިއަށް މިއަދު ބޭއްވުނު ބައިއިލެކްޝަނުގައި ވެރިކަންކުރާ ޕާޓީ، ޕީއެންސީގެ ކެންޑިޑޭޓް އަބްދުލް ހަމީދު އަބްދުއް ސައްތާރު ވަނީ ވާދަވެރި މުބާރާތެއްގައި ކުރިހޯދައިފައެވެ.
އިދިކޮޅު އެމްޑީޕީގެ ކެންޑިޑޭޓް ޝިހާމް މުހައްމަދާ ވާދަކޮށް، އަބްދުލްހަމީދު ކައުންސިލް މެންބަރުކަމުގެ ގޮނޑި ހޯއްދެވީ ވޯޓުލީ މީހުންގެ ތެރެއިން 51 އިންސައްތައިގެ ތާއީދާ އެކުގައެވެ.
އިލެކްޝަންސް ކޮމިޝަނުން އިއުލާންކުރި ވަގުތީ ނަތީޖާގައިވާ ގޮތުން، އަބްދުއްސައްތާރަށް 285 ވޯޓު ލިބިފައިވާއިރު، އެމްޑީޕީގެ ކެންޑިޑޭޓް ޝިހާމަށް ލިބިފައިވަނީ 250 ވޯޓެވެ.
މި ބައިއިލެކްޝަން ބޭއްވުމަށް މަގުފަހިވީ، މާރަންދޫ ކައުންސިލްގެ ނައިބު ރައީސްގެ މަގާމުގައި ހުންނެވި އަހުމަދު ރަމީޒު، ވޭތުވެދިޔަ ޖުލައި މަހުގެ 13 ވަނަ ދުވަހު އަވަހާރަވުމާ ގުޅިގެންނެވެ.
މި ނަތީޖާއާއެކު، ވެރިކަންކުރާ ޕީއެންސީން ވަނީ ފަހަކަށް އައިސް ބޭއްވުނު ގިނަ ބައިއިލެކްޝަންތަކުގައި ކާމިޔާބީ ހޯދައިފައެވެ. އެންމެ ފަހުން ބޭއްވުނު ރައްޔިތުންގެ މަޖިލިސް އިންތިޚާބުގައި ވެސް ޕީއެންސީން ވަނީ ސުޕަމެޖޯރިޓީއެއް ހޯދާފައެވެ.
Advertisement
This content is created and paid for by advertisers and does not involve Voice Journalists
