ސްޓެލްކޯއިން ބިލް ކުރަމުންދަނީ ޤަވާއިދާ އެއްގޮތަށްކަން ބެލުމަށް ބޭނުންވާ ހުރިހާ ފަރާތްތަކަށް ދަޢުވަތު ދީފިއެވެ.
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ކަރަންޓު ބިލް ކުރަމުންދަނީ ޤަވާއިދުތަކާއި އުސޫލުތަކާ އެއްގޮތަށްކަން ބެލުމަށް ކަމާ ގުޅުންހުރި ހުރިހާ ފަރާތްތަކަށް ދަޢުވަތު ދީފައިވަނީ އެކުންފުނިން ނެރުނު ބަޔާނެއްގައެވެ.
މިއަދު ނެރުނު ބަޔާނެއްގައި ސްޓެލްކޯއިން މިކަން ހާމަކޮށްފައިވަނީ ކުރީގެ ރައީސް ޔާމީން ސްޓެލްކޯއާ ދެކޮޅަށް ކުރި ތުހުމަތުތަކަކާ ގުޅިގެންނެވެ.
75 އަހަރުގެ ޚިދުމަތުގެ ތާރީޚެއް އޮތް މި ކުންފުނިން ބުނެފައިވަނީ މުވައްޒަފުންގެ އިޚްލާޞްތެރި މަސައްކަތާއި އަޚްލާޤީ މިންގަނޑު ދަމަހައްޓާފައިވާ ކަމަށެވެ. އަދި ކަރަންޓު އުފެއްދުމާއި ފޯރުކޮށްދިނުމުގެ މަސައްކަތް 24 ގަޑިއިރު ކުރިއަށްދާ ކަމަށްވެސް ބުނެފައިވެއެވެ.
ސްޓެލްކޯއިން އިތުރަށް ހާމަކޮށްފައިވަނީ މީޓަރު ރީޑިންގ ނެގުމާއި ބިލް ކުރުމުގެ މަސައްކަތް ކުރަނީ ހަރުދަނާ ޤަވާއިދުތަކާއި އުސޫލުތަކުގެ ތެރެއިންކަމަށެވެ. އަދި އުސޫލުތަކާ ޚިލާފަށް ޢަމަލު ނުކުރާނެކަމުގެ ޔަޤީންކަން ރައްޔިތުންނަށް ދީފައިވެއެވެ.
ސްޓެލްކޯއާ ދެކޮޅަށް ފަތުރާ ނޭދެވޭ ވާހަކަތައް ކުށްވެރިކުރަމުން، ކުންފުނިން ބުނެފައިވަނީ ސްޓެލްކޯގެ މުވައްޒަފުންނަށްވެސް ބިލް ކުރަނީ އެހެން ކަސްޓަމަރުންނާ އެއް އުސޫލަކުންކަމަށެވެ. އަދި ރީޑިންގ ނުނަގައި ނުވަތަ ބޭނުން ނުކުރާ ކަރަންޓަށް ބިލް ނުފޮނުވާނެކަމަށްވެސް ޔަޤީންކަން ދީފައިވެއެވެ.
Advertisement
This content is created and paid for by advertisers and does not involve Voice Journalists
