ޑިމޮކްރެޓް ރިޕަބްލިކް އޮފް ކޮންގޯ ގައި ބަޣާވާތް ކުރަން އުޅުނު 37 މީހެއްގެ މައްޗަށް މަރުގެ ހުކުމް އިއްވައިފިއެވެ.
ކޮންގޯގެ ރައީސް ވެރިކަމުން ދުރުކުރަން އުޅުނު މައްސަލައިގައި މަރުގެ ހުކުމް އިއްވި މީހުންގެ ތެރޭގައި އެމެރިކާ އަށް ނިސްބްތވާ 3 މީހުންނާއި އިނގިރޭސިވިލާތާއި، ބެލްޖިއަމް އަދި ކެނެޑާ އަށް ނިސްބަތްވާ ތިން މީހުން ވެސް ހިމެނެއެވެ.
މިމީހުންގެ މައްޗަށް ކޮށްފައިވަނީ މިދިޔަ މެއި މަހު ރިޔާސީ ގަނޑުވަރަށާއި ކޮންގޯގެ ރައީސް ފެލިކްސް ޝިސެކެޑީގެ އެކުވެރިއެއްގެ ގެއަށް ވެސް ދިން ހަމަލާގައި އިސްކޮށް ހަރަކާތްތެރިވި ކަމުގެ ތުހުމަތެވެ.
މި ހަމަލާގެ ތެރޭގައި ކޮންގޯ ނަސްލުގެ އެމެރިކާ ރައްޔިތެއް ކަމަށްވާ އަދި އެ ރޭވުމުގެ ލީޑަރެއް ކަމަށް ބެލެވޭ ކްރިސްޓިއަން މަލަންގާ އާއި އިތުރު ފަސް މީހުން މަރުވެފައިވާއިރު، ޖުމްލަ 51 މީހެއްގެ މައްޗަށް މި މައްސަލައިގައި ވަނީ ޝަރީއަތް ކުރިއަށް ގެންގޮސްފައެވެ.
ޝަރީއަތް ހިންގި 51 މީހުންގެ ތެރެއިން 14 މީހުން އެ ހަމަލާއާ އެމީހުންގެ އެއްވެސް ގުޅުމެއް ނެތް ކަމަށް ކޯޓުން ނިންމައި، ވަނީ މިނިވަން ކޮށްފައެވެ.
Advertisement
This content is created and paid for by advertisers and does not involve Voice Journalists
