އެމެރިކާގެ ކުރީގެ ރައީސް އަދި ރިޕަބްލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕަށް އަމާޒުކޮށް ބަޑިން ހަމަލާދޭން އުޅުނުކަމަށް ތުހުމަތުކުރެވޭ މީހަކު ހައްޔަރުކޮށްފިއެވެ. 

އާދީއްތަ ދުވަހު ކޮންބައެއްކަން ނޭނގޭ ބަޔަކު ވަނީ ފްލޮރިޑާގައި ޓްރަމްޕް ދިރިއުޅުއްވާ މާރަލާގޯ ގަނޑުވަރު ކައިރީ ޓްރަމްޕަށް އަމާޒުކޮށް ހަމަލާދޭން މަސައްކަތް ކޮށްފައެވެ. ނަމަވެސް އޭނާ ފޮނުވާލި އެއްވެސް ވަޒަނެއް ޓްރަމްޕަށް އަމާޒުވެފައެއް ނުވެއެވެ.

މާރަލާގޯ ގޯލްފް ދަނޑުގެ ގަސްތަކުގެ ތެރޭގައި ފިލާ އޮތް މީހަކު ބަޑިން ދިން ހަމަލާތަކުގައި ޓްރަމްޕަށް އެއްވެސް އަނިޔާއެއް ލިބިފައި ނުވާ ކަމަށް ފުލުހުން ވަނީ ބުނެފައެވެ. އަދި މި ހަމަލާދިންކަމަށް ބެލެވޭ މީހާ ފިލައިގެން އުޅެނިކޮށް ހޯދައި މިހާރު ހައްޔަރުކޮށްފައި ވާކަމަށް ފުލުހުން ވަނީ ބުނެފައެވެ.

Advertisement

ޓްރަމްޕްގެ ކޮމިއުނިކޭޝަންސް ޑައިރެކްޓަރ ސްޓީވަން ޗުއަންގް ވިދާޅުވީ ޓްރަމްޕް ހުންނެވީ ރައްކާތެރިކަމާއެކު ކަމަށެވެ. މި ހާދިސާއާ ގުޅިގެން އެފްބީއައި އިން ވަނީ ތަޙުޤީޤު ފަށާފައެވެ. އެފްބީއައިގެ ބަޔާނެއްގައި ބުނެފައިވަނީ މިއީ ޓްރަމްޕް އަވަހާރަކޮށްލުމަށް ދިން ހަމަލާއެއްކަމަށް ތުހުމަތުކޮށްފައެވެ.

ޓްރަމްޕްގެ ގޮލްފް ކޯސް ކައިރީގައި ހުރި ގަސްތަކެއްގެ ތެރޭގައި އޭކޭ-47ގެ ރައިފަލެއް ހިފައިގެން ޓްރަމްޕަށް ހަމަލާދޭން މަސައްކަތްކުރި މީހާ ސީކްރެޓް ސާވިސްގެ އެޖެންޓުންނަށް ފާހަގަކުރެވުނުއިރު، އެމީހާ ވަނީ ހަމަލާ ދިނުމާއެކު، އެ މީހާ ވަނީ ކާރެއްގައި ފިލައިގެން ގޮސްފައި ކަމަށެވެ. އެކަމަކު އާންމުންގެ އެހީއާ އެކު އެ ކާރު ދެނެގަނެ އޭނާ ހައްޔަރުކޮށްފައިވާ ކަމަށް އެފްބީއައި އިން ވަނީ ބުނެފަ އެވެ. 

އެފްބީއައި އިން ބުނި ގޮތުން މި ހަމަލާވެސް ގިންތި ކުރާނީ ޑޮނަލްޑް ޓްރަމްޕް އަވަހާރަކޮށްލަން ދިން ހަމަލާއެއް ގޮތުގަައެވެ.

އެމެރިކާގައި އަންނަ ނޮވެމްބަރު ފަހެއްގައި އޮންނަ ރިޔާސީ އިންތިޚާބުގައި ވާދަކުރެއްވުމަށް ކެމްޕޭން ކުރައްވަނިކޮށް، ޖުލައިމަހުގެ 13 ވަނަ ދުވަހުވެސް މީހަކު ވަނީ ޓްރަމްޕް އަވަހާރަކޮށްލަން ބަޑިން ހަމަލާދީފަ އެވެ.

މި ހާދިސާގައި ޓްރަމްޕްގެ ކަނާތު ކަންފަތް ޒަޚަމްވިއެވެ.

މި ހާދިސާއާ ގުޅިގެން ޓްރަމްޕް ވިދާޅުވެފައިވަނީ އޭނާ ރައްކާތެރިކަމާއެކު ހުރި ކަމަށާއި، އަދި އެފަދަ އެއްވެސް ކަމަކުން އޭނާ މަޑުޖެހި، އަދި ފަހަތަށް ނުޖެހޭނެ ކަމަށެވެ.

އެމެރިކާގެ ރިޔާސީ އިންތިހާބުގައި ޓްރަމްޕާ ވާދަކުރައްވާ ކެނޑިޑޭޓް ނައިބު ރައީސް ކަމަލާ ހެރިސް ވަނީ ޓްރަމްޕް ސަލާމަތްވުމަކީ ލިބުނު ބޮޑު ހިތްހަމަޖެހުމެއް ކަމަށް ވިދާޅުވެފަ އެވެ. ރައީސް ބައިޑަން އާއި ނައިބު ރައީސް ކަމަލާ ހެރިސް އަށް މި ހާދިސާގެ މައުލޫމާތު ހިއްސާކުރަމުންދާ ކަމަށް ވައިޓްހައުސްއިން ނެރުނު ބަޔާނެއްގައި ބުނެފައިވާ ކަމަށް މީޑިއާތަކުން ވަނީ ބުނެފަ އެވެ.