ޕްރޮސެކިއުޓަރ ޖެނެރަލްގެ މަޤާމަށް އައްބާސް ޝަރީފް އައްޔަނުކުރަން ފެންނަކަމަށް މަޖިލީހުގެ ޖުޑިޝަރީ ކޮމިޓީން ރުހުންދީފިއެވެ.
ޖުޑިޝަރީން ކޮމިޓީން އައްބާސްއަށް ރުހުންދީފައިމިވަނީ، މިއަދު ބޭއްވި އެ ކޮމިޓީގެ ބައްދަލުވުމަށް ފަހުއެވެ. ރުހުން ލިބުނީ ކޮމިޓީގެ އިއްތިފާގުންނެވެ.
ޖުޑިޝަރީ ކޮމިޓީން މިއަދު ވަނީ އައްބާސް އާ އިންޓަވިއުކޮށްފައެވެ. މި އިންޓަވިއުގައި އައްބާސް ވިދާޅުވީ، ޕީޖީގެ މަގާމަށް އޭނާ ކުރިމަތިލެއްވީ ސިޔާސީ އެއްވެސް މީހަކު ބުނެގެން ނޫންކަމަށާއި، އެހެންކަމުން އޭނާއަކީ އެއްވެސް މީހެއްގެ ނުފޫޒަށް ލެނބޭނެ މީހެއް ނޫންކަމަށެވެ. އައްބާސް ވިދާޅުވީ އޭނާ ޕީޖީގެ މަގާމަށް ކުރިމަތިލެއްވިކަން އެއްވެސް ބޭފުޅަކަށް ނޭނގޭނެ ކަމަށާއި، އެކަން އާއްމުންނާ ހަމަޔަށް ފޯރާފައިވަނީ ކުށުގެ ރެކޯދް ސާފްކުރަން ފޮނުވި ހިސާބުން މީޑިއާތަކަށް އެކަން އެނގިގެން ކަމަށެވެ.
ޕީޖީގެ މަގާމަށް އައްބާސް އައްޔަނުކުރުމަށް ނިންމާފައިވަނީ ކުރިން އެމަގާމުގައި ހުންނެވި ޝަމީމް، މަގާމުން ވަކިކުރެއްވުމާ ގުޅިގެންނެވެ.
ޕީޖީގެ މަޤާމަށް އައްބާސްގެ އިތުރުން އިތުރު ހަ ބޭފުޅަކު ކުރިމަތިލައްވާފައިވެއެވެ. އޭގެތެރޭގައި ކްރިމިނަލް ކޯޓުގެ ކުރީގެ އިސްޤާޟީ އަޙްމަދު ހައިލަމް، ކުރީގެ ޑެޕިއުޓީ ޕްރޮސިކިއުޓަރ ޖެނެރަލް މަރިޔަމް ނިހާޔަތު، އަދި މިހާރުގެ ޑެޕިއުޓީ ޕްރޮސިކިއުޓަރ ޖެނެރަލް ޢަލީ ޝަމީރު ހިމެނިވަޑައިގަންނަވައެވެ.
ރައީސް ޑރ. މުޙައްމަދު މުޢިއްޒު ވަނީ އައްބާސްގެ ނަން މަޖިލީހަށް ފޮނުއްވާފައެވެ. އައްބާސްއަކީ ޔުނިވަރސިޓީ އޮފް ޓެސްމޭނިއާއިން ޤާނޫނީ ދާއިރާގެ މަތީ ތަޢުލީމު ޙާޞިލުކުރައްވާފައިވާ ބޭފުޅެކެވެ. އޭނާ ވަނީ 2011 އިން 2015 އަށް ހައިކޯޓުގެ ފަނޑިޔާރުކަން ކުރައްވާފައެވެ. އަދި ކުރީގެ ދެ ރައީސުންގެ ވަކީލުކަންވެސް ކުރައްވާފައިވެއެވެ.
Advertisement
This content is created and paid for by advertisers and does not involve Voice Journalists
