ރާއްޖޭގެ އެއްވަަނަ ޕްރޮޑަކްޝަން ހައުސްކަމަށް މިހާރު ގިނަ ބަޔަކު ގަބޫލުކުރާ ޑާކްރެއިން އެންޓަރޓައިންމެންޓުން އޮލިމްޕަހުގައި އެޅުވުމަށް ތައްޔާރުވަމުން އަންނަ "ބިބީ" ގެ ޓިކެޓް ވިއްކަން ފަށައިފިއެވެ.

ބިބީގެ ޓިކެޓް ވިއްކަން ފަށާފައިވަނީ މިއަދު އެވެ. މިކަމާ ބެހޭގޮތުން ވޮއިސް އާ ވާހަކަދައްކަވަމުން "ބިބީ"ގެ ޕްރޮޑިއުސަރު، މުހައްމަދު އަލީ (މޮގަ) ބުނީ މިއަދު ހެނދުނު 10:00 އިން ފެށިގެން ފިލްމުގެ ޓިކެޓް އޮލިމްޕަސް ސިނަމާއިން ލިބެން ހުންނާނޭ ކަމަށެވެ.

ޑާކްރެއިނުން ވަނީ އޮލިމްޕަހަށް ނުގޮސްވެސް ޓިކެޓް ގަނެވޭނޭ އިންތިޒާމް ހަމަޖައްސާފައެވެ. "ބިބީ" ގެ ހޮޓްލައިން ނަމްބަރު 9911229 އަށް ވައިބާ /ވަޓްސްއަޕް މެދުވެރިކޮށް މެސެޖް ކޮށްލުމުން ބޭނުންވާ ޝީޓެއް ޓިކެޓް ނެގުމަށް، އޮންލައިނުކޮށް ޓިކެޓަށް ފައިސާ ދައްކާލެވޭނެއެވެ.

Advertisement

އާއިޝަތު ފުއާދު އަދި މުހައްމަދު އަލީ (މޮގަ) ޕްރޮޑިއުސް ކުރާ "ބިބީ" އަކީ،  ހޮރޯ/ކޮމެޑީ ފިލްމެކެވެ. މި ފިލްމް ލިޔެ ޑައިރެކްޓްކޮށްފައިވަނީ ޝަހުދާ މަހުމޫދެވެ. މިއީ އޭނާގެ ލިޔެ ޑައިރެކެޓްކުރާ ފުރަތަމަ ފީޗާ ފިލްމެވެ. މި ފިލްމުގެ ޕޯސްޓަރު ޑިޒައިންކޮށްފައިވަނީ ހޫދު އިބްރާހިމެވެ. ޕޯސްޓަރުގެ ލެޓަރިން އަބޯޝަފީއުއެވެ. އަދި ފިލްމުގެ ޓައިޓުލް މިއުޒިކް ތައްޔާރުކޮށްދިނީ ހުސައިން ތައުފީގެވެ.

"ބިބީ" މި ފިލްމުން ބިރުވެރި އަދި ހެއްވާ މަޖާ މަންޒަރުތައް ފެނިގެންދާއިރު، މި ފިލްމަކީ ޑާކްރެއިނުން މީގެ ކުރިން ގެނެސްދީފައިވާ ފިލްމްތަކާ މުޅިން ތަފާތު ފިލްމެކެވެ. ޑާކްރެއިނުން މީގެ ކުރިންވެސް ގެނެސްދީފައިވަނީ މުޅިން ތަފާތު ފިލްމުތަކެކެވެ.

ބިބީ

ފިލްމުގެ މެއިން ކާސްޓުންގެ ގޮތުގައި ފެނިގެންދާނީ މިހާރު ސިނަމާގައި އެންމެ ނަންހިނގާ އެކްޓަރު ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. މި ފިލްމުން ތަޖުރިބާކާރު ފިލްމީތަރި ޝީލާ ނަޖީބުގެ އިތުރުން އިތުރު ތައާރަފަކަށް ބޭނުންނުވާ، އަހުމަދު ސައީދު، މަލީހާ ރަޒާން ރާމިޒުވެސް ފެނިގެންދާނެއެވެ. އަދި ހާއްސަ ފެނިލުމެއްގެ ގޮތުން ދިވެހި އެތައް ފިލްމަކުން ފެނިގެންދިޔަ ކުޅަދާނަ އެކްޓަރު އިސްމާއީލް ވަޖީހުވެސް މި ފިލްމުން ފެނިގެންދާނެއެވެ.

"ބިބީ" ސިނަމާގައި އެޅުވުމަށް ނިންމާފައިވަނީ އަންނަ އޮކްޓޫބަރުމަހުގެ 7 ވަނަ ދުވަހުއެވެ. މި ފިލްމް ވެގެންދާނީ ޑާކްރެއިނުން މިއަހަރު ބެލުންތެރިންނަށް ގެނެސްދޭ ދެވަނަ ފިލްމަށެވެ. ޑާކުރެއިނުން މިއަހަރު ގެނެސްދިން ފުރަތަމަ ފިލްމަކީ ތަފާތު ފިލްމެއްގެ ގޮތުގައި ގިނަބަޔަކު ފާހަގަކުރި "ފުރޭތަ" އެވެ. މި ފިލްމަށްވެސް ބެލުންތެރިންގެ ވަރަށްބޮޑު މަގްބޫލުކަމެއް ވަނީ ލިބިގެންގޮސްފައެވެ.

އިއްްޔެއަކީ ޑާކްރެއިނުން ރާއްޖޭގެ ސިނަމާގައި ވަކިހިއްޕާލިތާ 18 އަހަރު ފުރުނު ދުވަހެވެ. ދިވެހި ފިލްމީ އިންޑަރސްަޓްރީގައި ޑާކްރައިން ފާހަގަކުރެވިފައިވަނީ، ރާއްޖޭގެ މިހާރު އެއްވަނަ ޕޮރޮޑަކްޝަން ހައުސްގެ ގޮތުގައެވެ. "ބިބީ" އާ ނުލައިވެސް ކުރިއަށް އަދި ޑާކްރެއިނުގެ 7 ފިލްމު ނިކުންނަން އެބައޮތެވެ.