މިއަހަރުގެ މިހާތަނަށް ރާއްޖެއަށް 1.4 މިލިއަން ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އާއްމުކުރާ ފަތުރުވެރިކަމުގެ ޑެއިލީ ރިޕޯޓްސްއިން ދައްކާގޮތުގައި، މި މަހުގެ 15 ވަނަ ދުވަހާއި ހަމައަށް ރާއްޖެއަށް ޖުމްލަ 1,675,303 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1,290,332 އާއި އަޅާ ބަލާއިރު، 10.2 އިންސައްތައިގައި ކުރި އެރުމެކެވެ.

ހިނގަމުންދާ ސެޕްޓެމްބަރު މަސް ފެށިގެން މިމަހުގެ 15 ވަނަ ދުވަހާއި ހަމައަށް ރާއްޖެއަށް ޖުމްލަ 62,561 ފަތުރުވެރިން ޒިޔާރަތްކޮށްފައިވާއިރު، މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރީ 60,251 ފަތުރުވެރިންނެވެ. މިއީ 3.8 އިންސައްތައިގެ ކުރިއެރުމެއްކަން ފާހަގަކޮށްލަން ޖެހެއެވެ.

Advertisement

މިމަހުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މިދިޔަ ހޮނިހިރު ދުވަހުއެވެ. މިގޮތުން އެދުވަހު ރާއްޖެއަށް 5,202 ފަތުރުވެރިން ވަނީ ޒިޔާރަތްކޮށްފައެވެ.

މިހާތަނަށް ރާއްޖެއަށް ޒިޔާރަތްކުރި 1.4 މިލިއަން ފަތުރުވެރިންގެ ތެރެއިން އެންމެ ގިނައީ ޗައިނާއިން ރާއްޖެއަށް ޒިޔާރަތްކުރި  ފަތުރުވެރިންނެވެ. ރާއްޖެއަށް 207,749 ފަތުރުވެރިން ޒިޔާރަތްކުރި ޗައިނާ އޮތީ  14.6 އިންސައްތައިގެ މާކެޓް ޝެއާ އާއިއެކު، ރާއްޖޭގެ ފަތުރުވެރިކަމުގެ މާކެޓްގެ އެއްވަނައިގައެވެ.

ޖުމްލަ 154,178 ފަތުރުވެރިންނާއި އެކު ރަޝިއާ ދެވަނައިގައި އޮތް އިރު މާކެޓްގެ ތިން ވަނައިގައި އޮތީ 121,903 ފަތުރުވެރިންނާއިއެކު އިނގިރޭސިވިލާތެވެ. 

މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ އަށް ގެނައުމަކީ ސަރުކާރުގެ އަމާޒެއްކަން ފާހަގަކޮށްލަން ޖެހެއެވެ.