ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ޙަމާސް ޖަމާޢަތުން ރަހީނު ކޮށްފައިވާ އަސީރުންގެ ތެރެއިން ތިން މީހަކު އިސްރާއީލް ފައުޖުން ދިން ވައިގެ ޙަމަލާއެއްގައި މަރުވެފައިވާ ކަމަށް އިސްރާއީލް ފައުޖުން ނުސީދާކޮށް އެއްބަސްވެއްޖެއެވެ.

މިދިޔަ އަހަރުގެ ނޮވެންބަރު މަހުގެ 10 ވަނަ ދުވަހު، ހަމާސް ޖަމާޢަތުން ބޭނުން ކުރަމުންދިޔަ ބިންގަރާހަކަށް އަމާޒުކޮށް ޔަހޫދީ ފައުޖުން ދިން ބޮމުގެ ހަމަލާއެއްގައި އިސްރާއީލް ތިން އަސީރުން މަރުވި ކަމަށް ހަމާސް އިން ވަނީ ބުނެފައެވެ. އޭރު އެވާހަކަ އިސްރާޢީލް ވަނީ ދޮގު ކޮށްފައެވެ.

ހަމާސްއިން މީގެ ކުރިން ދީފައިވާ މައުލޫމަތުން އެނގޭ ގޮތުން، އިސްރާއީލް ފައުޖުގެ ހަމަލާއާއި ގުޅިގެން މަރުވީ އެމީހުންގެ ސިފައިންގެ ދެ މީހުންނާއި ޔަހޫދީ ޢާންމުންގެ މީހެކެވެ. އަދި އެ މީހުންގެ ހަށިގަނޑު ފެނުނީ ޑިސެންބަރު 14ވަނަ ދުވަހުއެވެ.

އެ މީހުންގެ މަރުތައް ތަޙުޤީޤު ކުރުމަށް ފަހު އިސްރާއީލް ފައުޖުން ބުނީ, އެ ތިން މީހުން މަރުވެފައި ވަނީ ޙަމާސްގެ އިސް ކޮމާންޑަރެއް ކަމުގައިވާ އަޙްމަދު ޣަންދޫރު ޝަހީދު ކޮށްލަން ނޮވެންބަރު 10ވަނަ ދުވަހު ދިން ވައިގެ ޙަމަލާތަކެއްގައި ކަމަށް ބެލެވޭ ކަމުގައެވެ. މި ހަމަލާތައް އަމާޒު ކުރީ, ޣަންދޫރު ފިއްލަވައިގެން ހުންނެވި ކަމަށް ބެލެވޭ ބިންގަރާހަށް ކަމަށާ އެތަނުގައި އަސީރުންގެ ތިބި ކަން ކުރިން އެނގިފައި ނުވާ ކަމަށްވެސް އިސްރާޢީލުން މިހާރު ބުނެއެވެ.

ނަމަވެސް, އެ މީހުން މަރުވީ ޔަހޫދީންގެ ވައިގެ ޙަމަލާތަކުގައި ކަން ކަށަވަރު ކޮށް ބުނަން އިސްރާޢީލް ފައުޖުން އަދިވެސް ދަނީ ދެކޮޅު ހަދަމުންނެވެ.

2023 ވަނަ އަހަރުގެއޮކްޓޯބަރ 7 ވަނަ ދުވަހު، ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސްގެ މުޖާހިދުން، ފަލަސްތީނުގެ ބިމަށް ގަދަކަމުން ވެރިވެގެން ތިބި އިސްރާއިލްގެ ޔަހޫދީން ތިބި ރަށްތަކަށް ދިން ޙަމަލާތަކަށްފަހު ޔަހޫދީ ފައުޖުން ދަނީ ޣައްޒާއަށް ކެނޑިނޭޅި ރަހުމު ކުޑަ ހަމަލާތައް ދެމުންނެވެ.

އެގޮތުން، ޔަހޫދީ ފައުޖުގެ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 41,206އަށް އުފުލިފައިވާއިރު، ޒަޚަމްވި މީހުންގެ ޢަދަދު ވަނީ 95,337އަށް އުފުލިފައެވެ. ޝަހީދުވި މީހުންގެ ތެރެއިން 16،000އަށްވުރެ ގިނައީ މައުސޫމު ކުޑަކުދިންނެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ބުނެއެވެ.