ފަތުރުވެރިކަން ތަރައްޤީކުރަން ބީލަމަށް ހުޅުވާލި ފަޅުތަކާއި ރިސޯޓުތަކުގެ ލިސްޓަށް ފަތުރުވެރިކަމާ ބެހޭ ވުޒާރާއިން ބަދަލު ގެނެސްފިއެވެ.

 އެ ވުޒާރާއިން މި ލިސްޓުން ތިން ރަށެއް ވަނީ އުނިކޮށްފައިވާއިރު، އެ ތިން ރަށަކީ ޅ.މައިދޫ އާއިއެކު ޅ.ދިއްފުށި، ތ.ކަނިމީދޫ އަދި ގދ.ކަޅުހުއްޓާ އެވެ.

މީގެ އިތުރުންވެސް، މި ލިސްޓަށް ގެނައި ބަދަލުތަކުގެ ތެރޭގައި އެ ވުޒާރާއިން ވަނީ 6 ފަޅަކާއި 1 ރަށެއް މި ލިސްޓަށް އިތުރުކޮށްފައެވެ. މިގޮތުން ގދ.ރާވެރިންކޮޅިހުއްޓާ އިތުރުކުރިއިރު، މި ލިސްޓަށް އިތުރުކުރި 6 ފަޅުގެ ތެރޭގައި ބ އަތޮޅުގެ 1 ފަޅާއި، ކ އަތޮޅުގެ ތިން ފަޅާއި، ވ އަތޮޅުގެ 1 ފަޅު އަދި އދ އަތޮޅުގެ 1 ފަޅު ހިމެނެއެވެ.

Advertisement

އެ ވުޒާރާއިން ބުނީ، މި ވާ ރަށްރަށާއި ފަޅުތަކުގެ ލީޒް އެކުއިޒިޝަން ކޮސްޓް ހިސާބު ކުރެވޭނީ މިނިސްޓްރީ މިިދޔަ މޭ މަހުގެ 30 ވަނަ ދުވަހު އިޢުލާނުކޮށްފައިވާ ތާވަލާ އެއްގޮތްވާ ގޮތުގެ މަތިންކަމަށާއި، ކަމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް އެދޭ ކަމަށެވެ.

ޕްރޮޕޯސަލް ހުށަހަޅާއިރު، ޕްރޮޕޯސަލް ހުށަހަޅާ ފަރާތްތަކުން ފަޅުގެ ވަކި ސަރަޙައްދެއް ކުއްޔަށް ނެގުމަށް ހުށަހަޅާނަމަ އެސަރަޙައްދާއި އެ ސަރަޙައްދުގެ ބޮޑުމިން އިނގޭނެހެން ފާހަގަކޮށް ޕްރޮޕޯސަލްގައި ހިމަނަންވާނެކަމަށާއި، ޕްރޮޕޯސަލްއާ އެކު ހުށަހަޅަންޖެހޭ އެޕްލިކޭޝަން ފޯމް މި މިނިސްޓްރީގެ ވެބްސައިޓް (www.tourism.gov.mv) އިން ލިބެން ހުންނާނެ ކަމަށް ވެސް އެ ވުޒާރާއިން ވަނީ ހާމަކޮށްފައެވެ.

ހަމައެއާއިއެކު، މިކަމާއި ގުޅޭ އިތުރު މައުލޫމާތު ބޭނުންވާނަމަ އެ ވުޒާރާގެ އީމެއިލް [email protected] އަށް އީމެއިލް ކުރައްވައިގެން ސާފުކުރުމަށް ފަތުރުވެރިކަމާއި ބެހޭ ވުޒާރާއިން ވަނީ އެދިފައެވެ.